පෙබරවාරි මාසය වන විට වාහන ආනයනය සඳහා අවසර ලැබුණත් වාහන ආනයනය බලපත්‍රවලට වාහන ගෙන්වීමට අවසර නොලැබෙන බව ජනාධිපති අනුර කුමාර දිසානායක මහතා පවසයි.

පෞද්ගලික රූපවාහිනී නාලිකාවක ඊයේ (21) පැවති දේශපාලන සාකච්ඡාවකට එක්වෙමින් ඔහු මෙම අදහස් පළ කලේය.

එහිදී ජනාධිපතිවරයා සඳහන් කළේ වාහන ආනයන බලපත්‍ර සඳහා වෙනත් ක්‍රමවේදයක් හඳුන්වා දීමට අපේක්ෂා කරන බවය.

වාහන ආනයනයගැන තීරණය ගනු ලැබුවේ ශක්තිමත් ඩොලර් සංචිත නිර්මාණය කර ඇති පසුබිමක නොවන බවත් ආර්ථිකය තවදුරටත් ඉදිරියට තල්ලු කර වාහන වෙළඳපොළ විවෘත කරගැනිමේ අරමුණෙන් බවත් අනුර කුමාර දිසානායක මහතා තවදුරටත් සඳහන් කලේය.

ඒ අනුව, මහ බැංකුව සමඟ සාකච්ඡා කර කොතරම් ඩොලර් ප්‍රමාණයක් වෙන් කළ හැකිද යන්න පිළිබඳව තීරණය කළ බවත් ඩොලර් බිලියන 1.2ක ප්‍රමාණයේ වාහන ආනයන වියදම රඳවාගන්න කටයුතු කරන බවත් ඔහු වැඩිදුරටත් පවසා සිටියේය.

“අවුරුදු පහක් වාහන ආනයනය නතර කරලා තිබුණා. 2018 දී ඩොලර් බිලියන 1.95ක් වාහන ආනයනය කරලා තියෙනවා. 2019 ඩොලර් බිලියන 1.4ක වාහන ආනයනය කරලා තියෙනවා. ඩොලර් බිලියන 1-2 අතර ප්‍රමාණයක තමයි වාහන ආනයනය කරලා තියෙන්නේ.

නැවත වාහන ආනයනය කරන්න යනවා. මේ තීරණ්‍ය ගන්නේ ශක්තිමත් ඩොලර් ශක්තියක් නර්මාණය කරගෙන නෙවෙයි. ආර්ථිකය ඉස්සරහට තල්ලු කිරීම සඳහා වාහන වෙළඳපොළ විවෘත කරනවා කියන ස්ථාවරයේ ඉඳලා. එතකොට ඩොලර් සංචිතයට විශාල බලපෑමක් ඇති නොවිය යුතුයි. වාහන වෙළඳපොළ විසින් ඩොලර් සංචිතවලට බලපෑමක් ඇති කරන්න බෑ. දෙවැන්න මිල ගණන්. දැනට තියෙන්නේ 2019 දී ඩොලරය 190 වෙද්දී වාහන මිල. දැන් ඩොලරයේ අගය අනුවම සීයට 40ක විතර මිල වැඩිවීමක් වෙනවා. අනෙක වැට් බද්ද එකතු කරලා තියෙනවා.

වාහනවල සකන්ඩ් හෑන්ඩ් මාකට් එකක් තියෙනවා. බොහෝ අය ලීසිං දාලා සකන්ඩ් හෑන්ඩ් අරගෙන තියෙන්නේ. මේ වෙළඳපොළයි, අලුත් වාහන වෙළඳපොළයි අතර තරගයක් අත්හැරුණොත් ලීසිං ගෙවන්නේන නැතිව අත්හරින්න පුළුවන්. සකන්ඩ් හෑන්ඩ් වාහන වෙළඳපොළ අර්බුදයට ගියොත් ලීසිං සහ බැංකු අර්බුදයට යන්න පුලුවන්.

තුන්වැනි එක අපි මහබැංකුව සමඟ සාකච්ඡා කරලා ආවා මේ වසරේ ඩොලර් කොච්චර ප්‍රමාණයක් වෙන් කළ හැකිද කියලා. ඩොලර් අවශ්‍යතාවෙන් කොච්චර ප්‍රමාණයක් වෙන් කළ හැකිද කියලා. හතරවැනුව,  අනෙක ඩොලර් කොපමණ ප්‍රමාණයක් වැය වෙනවාද කියන එක සලකා බැලුවා. අපි පෙබරවාරි මාසයේදීම සියලු වාහන ආනයනය කළොත්, ඩොලර් වැය වීමේ පීඩනය එම මාසයටම එකතු වෙනවා. ඩොලර් බිලියන දෙකම පෙබරවාරි මාසයට එකතු කළ නොහැකියි.

පර්මිටුත් තියෙනවා සෑහෙන එළියේ.

මං හිතන්නේ පර්මිට්වලට අවස්ථාව ලැබෙන්නේ නෑ. පර්මිට් විසිදාහක් විතර තියෙනවා. අපි ඒකට වෙනම ක්‍රමවේදයක් කල්පනා කරමින් සිටිනවා. මේ අවස්ථාවේ පර්මිට්වලට ඉඩ ලැබෙන්නේ නෑ.

ඩොලර් බිලියන 1.2ක ප්‍රමාණයේ වාහන ආනයන වියදම රඳවාගන්න කටයුතු කරනවා. ඒ නිසා ආරම්භයේදී මිල ඉහළ යාවි. ක්‍රමිකව වෙළඳපොළ හැසිරෙන ආකාරය අනුව නිදහස් කරන්නේ කොහොමද කියලා බලනවා. පැති කිහිපයම බලමින් තමයි අපි කටයුතු කරන්නේ. මිල ගණන් පිළිබඳ සංවාදයක් රටේ යනවා. ඇත්ත. මිල යම් ප්‍රමාණයකට ඉහළ යයි.

ලංකාවේ ඇසෙම්බල් වාහනවල අපි බලන්න ඕනෑ කොච්චර අපි වැලිව් ඇඩ් කරනවාද කියලා. ඒත්, සීයට පහක්, හතක් අතර ප්‍රමාණයක තියෙන්නේ. තව අමතර කොටස් එකතු කරලා ඒක වර්ධනය කරගන්නවා නම් හොඳයි. ඒත්, දැනට ඒක ප්‍රමාණවත් නෑ.”

චීනයේ, වෙන්දු (Chengdu) නගරය ආශ්‍රිතව ශ්‍රී ලංකා කන්සියුලර් කාර්යාලයක් පිහිටුවීමට කටයුුතු කරන බව රජය පවසයි.

ජනාධිපති අනුර කුමාර දිසානායක මහතාගේ චීන සංචාරයේදී මේ සම්බන්ධයෙන් සාකච්ජාවට ලක්වූ බව විදේශ අමාත්‍ය විජිත හේරත් මහතා ප්‍රකාශ කළේය.

ජනාධිපතිවරයාගේ චීන සංචාරය සම්බන්ධයෙන් මාධ්‍ය දැනුවත් කිරීම සඳහා අද (22) රජයේ ප්‍රවෘත්ති දෙපාර්තමේන්තුවේ පැවති මාධ්‍ය හමුවකදී අමාත්‍යවරයා මේ බව පැවසීය.

වෙන්දු ප්‍රාන්තයේ ප්‍රාන්ත ප්‍රධානියා අදාළ කොන්සියුලර් කාර්යාලය පිහිටුවීම සඳහා අවශ්‍ය ඉඩකඩ නොමිලේ ලබා දීමට එකඟතාවය පළ කර ඇති බව මෙහිදී ප්‍රකාශ විය.

ජනාධිපතිවරයාගේ චීන සංචාරයේ දී දෙපාර්ශවය අතර ආර්ථික, දේශපාලනික හා සංස්කෘතික සහයෝගීතාවය වර්ධනය කරගැනීමට ගැඹුරු සාකච්ඡාවක නිරත වූ බව ද අමාත්‍යවරයා මෙහිදී කියා සිටියේය.

අධිකරණයට අපහාස කළ බවට චෝදනා කරමින් රක්ෂිත බන්ධනාගාරගත කර සිටින ආගමන හා විගමන පාලක හර්ෂ ඉලුක්පිටිය මහතා බන්ධනාගාර නිලධාරීන් විසින් ශ්‍රේෂ්ඨාධිකරණයට ඉදිරිපත් කර තිබේ.

විද්‍යුත් වීසා නිකුත් කිරීමට අදාළව ගොනුකර තිබූ මූලික අයිතිවාසිකම් පෙත්සම්වලට ශ්‍රේෂ්ඨාධිකරණය විසින් නිකුත් කළ අතුරු තහනම් නියෝග ක්‍රියාත්මක කිරීම පැහැර හැරීම තුළින් අධිකරණයට අපහාස කළ බවට චෝදනා කරමින් ආගමන හා විගමන පාලකවරයා පසුගිය සැප්තැම්බර් මස රක්ෂිත බන්ධනාගාරගත කෙරුණි.

එම පෙත්සම් අද (22) ශ්‍රේෂ්ඨාධිකරණය හමුවේ කැඳවීමට නියමිත වන අතර හර්ෂ ඉලුක්පිටිය මහතාව ඒ සඳහා අධිකරණයට ඉදිරිපත් කර ඇත.