Connect with us

පුවත්

මිහින්තලේ දැවැන්ත වන සංහාරයක්

Published

on

මිහින්තලේ මරදන්කුලම ප්‍රදේශයේ මිහින්තලේ රක්ෂිත වනය නමින් හඳුන්වන ප්‍රදේශයේ අක්කර 18ක් එළිපෙහෙළි කර ඉන් අක්කර 6ක් ගිනි තබා විනාශ කර නීති විරෝධීව අත්පත් කර ගැනීමට උත්සාහ දරන විත්තිකාර ව්‍යාපාරිකයාට එරෙහිව අධිකරණය හමුවේ නඩු පවරන ලෙස අනුරාධපුර අතිරේක මහේස්ත්‍රාත් කංචනා නර්තනා අභිමානි සෙනවිරත්න මෙනෙවිය අනුරාධපුර අඩවි වන නිලධාරි සුමිත් සුවාරිස් මහතාට නියෝග කළාය.

වන සංරක්ෂණ දෙපාර්තමේන්තුව පවසන පරිදි අදාළ ප්‍රශ්නගත ඉඩම සඳහා සකස් කර ඇති බලපත්‍ර හතරම ව්‍යාජ ඒවා නම් ඒ සම්බන්ධයෙන් අනුරාධපුර විශේෂ අපරාධ විමර්ශන අංශයට පැමිණිලි කර ඉදිරි නීතිමය ක්‍රියාමාර්ග ගන්නා ලෙසට ද අතිරේක මහේස්ත්‍රාත්වරිය අඩවි වන නිලධාරි සුමිත් සුවාරිස් මහතාට තවදුරටත් නියෝග කරන ලදී.

අනුරාධපුර අතිරේක මහේස්ත්‍රාත්වරිය මෙසේ නියෝග කළේ මිහින්තලේ ප්‍රාදේශීය ලේකම් කොට්ඨාසයේ අංක 586 ග්‍රාම නිලධාරි තුලානේ පිහිටි මරදන්කුලම ප්‍රදේශයේ මිහින්තලේ රක්ෂිත වනය නමින් හඳුන්වන ප්‍රදේශයේ අක්කර 18ක් නීති විරෝධීව එළිපෙහෙළි කර ඉන් අක්කර 6ක් ගිනි තබා විනාශ කර අදාළ රක්ෂිත භූමිය නීති විරෝධීව අත්පත් කර ගැනීමට උත්සාහ දරන බවට විත්තිකාර ව්‍යාපාරිකයකුට එරෙහිව අනුරාධපුර අතිරේක මහේස්ත්‍රාත් අධිකරණය හමුවේ පවතින බී/123/2024 අංක දරන නඩුව අනුරාධපුර අතිරේක මහේස්ත්‍රාත් අධිකරණය හමුවේ කැඳවූ අවස්ථාවේදීය.

මෙම සිද්ධිය සම්බන්ධයෙන් අධිකරණයට කරුණු දක්වමින් වන සංරක්ෂණ දෙපාර්තමේන්තුවේ අනුරාධපුර අඩවි වන නිලධාරි සුමිත් සුවාරිස් මහතා කියා සිටියේ මිහින්තලේ ප්‍රාදේශීය ලේකම් කොට්ඨාසයේ මිහින්තලේ මරදන්කුලම පිහිටි මිහින්තලේ රක්ෂිත වනය නමින් හඳුන්වන ප්‍රදේශයේ අක්කර 18ක භූමියක් විත්තිකාර ව්‍යාපාරිකයා විසින් නීති විරෝධීව අල්ලාගෙන ඉන් අක්කර 6ක් ගිනි තබා විනාශ කර ඇති බවයි.

එකී භූමිය සඳහා තමන්ට බලපත්‍ර 4ක් ඇති බව පවසමින් විත්තිකරු බලපත්‍ර 4ක් ඉදිරිපත් කර ඇති බව ද අධිකරණයට කියා සිටි අඩවි වන නිලධාරිවරයා එකී බලපත්‍රවල නීත්‍යනුකූලභාවය සම්බන්ධයෙන් වන සංරක්ෂණ අධ්‍යක්ෂ ජනරාල්වරයා මිහින්තලේ ප්‍රාදේශීය ලේකම්වරයාගෙන් ලිඛිතව විමසීමක් කළ බව ද කියා සිටියේය. 

විත්තිකරු විසින් ඉදිරිපත් කර ඇති බලපත්‍රවලට අදාළ කිසිදු සටහනක් හෝ ලේඛනයක් මිහින්තලේ ප්‍රාදේශීය ලේකම් කාර්යාලය සතුව නැති බව මිහින්තලේ ප්‍රාදේශීය ලේකම් එන්.බී.ජේ.ඒ. නායක බණ්ඩාර මහතා වෙනුවෙන් සහකාර ප්‍රාදේශීය ලේකම් එම්.එම්.කේ. චන්ද්‍රගුප්ත මහතා වන සංරක්ෂණ අධ්‍යක්ෂ ජනරාල්වරයාට ලිඛිතව දන්වා ඇති බව ද අඩවි වන නිලධාරිවරයා ප්‍රකාශ කළේය.

විත්තිකරු විසින් ඉදිරිපත් කර ඇති බලපත්‍ර 4 අතුරින් එක් බලපත්‍රයකට තබා ඇති අත්සන අනුරාධපුර හිටපු මහ දිසාපති ටී.කේ. දසනායක මහතාගේ බව කියන අත්සනක් බව ද අධිකරණයට ප්‍රකාශ කළ අඩවි වන නිලධාරිවරයා එකී අත්සන ද අනුරාධපුර හිටපු මහ දිසාපති ටී.කේ. දසනායක මහතාගේ නොවන බවට මිහින්තලේ හිටපු ප්‍රාදේශීය ලේකම් සිරිමෙවන් ධර්මසේන මහතා වන සංරක්ෂණ අධ්‍යක්ෂ ජනරාල්වරයාට ලිඛිතව දන්වා ඇති බව ද අවධාරණය කළේය. 

ඒ අනුව විත්තිකරු විසින් ඉදිරිපත් කර ඇති ඉඩම් බලපත්‍ර හතරම ව්‍යාජව සකසන ලද කූට ඒවා බවට සැක කරන්නේ යැයිද? අඩවි වන නිලධාරිවරයා කීවේය. මෙම සිද්ධිය සම්බන්ධයෙන් චෝදනා ලබා සිටින ව්‍යාපාරිකයා දැනට අධිකරණය මඟින් ඇප මත මුදාහැර සිටී. මෙසේ ඇප මත මුදාහැර සිටිනුයේ අනුරාධපුර තම්මැන්නාකුලම ඉසුරුපුර අංක 246/20 ලිපිනයේ ඔලුපොතගේ සුමින්ද සේනාධීර නමැත්තෙකි. 

පැමිණිල්ල වෙනුවෙන් වන සංරක්ෂණ අධ්‍යක්ෂ ජනරාල් මහතාගේ උපදෙස් මත අනුරාධපුර අඩවි වන නිලධාරි සුමිත් සුවාරිස් මහතා පෙනී සිටි අතර, විත්තිකරු වෙනුවෙන් නීතිඥ සුසිල් සිරිවර්ධන මහතා පෙනී සිටියේය. 

අනුරාධපුර අඩවි වන නිලධාරි සුමිත් සුවාරිස් මහතාගේ මෙහෙයවීම මත අනුරාධපුර අතිරේක අඩවි වන නිලධාරි චින්තානි ගුණසේකර මහත්මිය මිහින්තලේ බීට්ටු වන නිලධාරි චමින්ද ඒකනායක, බීට්ටු වන නිලධාරින් වන කේ.එම්. තුෂාර නලින්ද, වන ක්ෂේත්‍ර සහකාර එච්.බී. සුගත් යන මහත්වරුන් සහ විශේෂ කාර්ය බළකා කඳවුරේ අණ දෙන නිලධාරි ප්‍රධාන පොලිස් පරීක්ෂක බී.ඒ.එස්. බුලත්සිංහල මහතා ඇතුළු විශේෂ බළකා නිලධාරීන් කණ්ඩායමක් මෙම වැටලීම සිදු කර තිබිණි. 

මෙම නඩුව ලබන ජුනි මස 26 වැනිදා යළි කැඳවීමට නියමිතය.

(dinamina.lk)

පුවත්

ඉරාන තානාපති කොළඹ සාප්පු සංකීර්ණයක රථගාලකදී ආරවුලක පැටලෙයි

Published

on

By

ඉරාන තානාපති ආචාර්ය  ඩෙල්ක්‍රොෂ් (A Delkhosh) මහතාට පහරදී , අනතුරකට ලක්කළ ව්‍යාපාරිකයෙකු අත්අඩංගුවට ගත් බව කොම්පඤ්ඤවීදිය පොලිසිය කියයි.

තානාපතිවරයා කොළඹ සාප්පු සංකීර්ණයක රථගාලට  රථය ඇතුල් කරන අවස්ථාවේදී තවත් මෝටර් රථයක රියදුරෙක් සමඟ ආරවුලක් හටගෙන ඇති අතර එහිදී එම පුද්ගලයා තානාපතිවරයාට පහරදී එම ස්ථානයෙන් පලා යාමට උත්සාහ දරා ඇතැයි පොලිසිය කියයි.

එහිදි තානාපතිවරයා සිය මෝටර් රථයෙන් බිමට බැස  පලායාමට උත්සාහ දරන මෝටර් රථයේ බොනොට්ටුවට අත තබාගෙන පොලිස් නිලධාරීන් පැමිණෙනතුරු සිටින ලෙස මෝටර් රථයේ රියදුරුට දැනුම් දී ඇත.

 එම අවස්ථාවේදී මෝටර් රථයේ රියදුරු විසින් මෝටර් රථය පණ ගන්වා  මීටර් 15ක්දි පමණ ඉදිරියට රිය  ධාවනය කර ඇතැයි පොලිසියේ සිදුකළ විමර්ශනවලදී අනාවරණය වී ඇත.

අත්අඩංගුවට ගත් සැකකරු කොළඹ හත වෝඩ් පෙදෙසේ පදිංචි. වයස අවුරුදු තිස්තුනක පුද්ගලයෙකි.

Continue Reading

පුවත්

මුදල් හා රන්බඩු කොල්ල කන්න පවුලක්ම මරලා!

Published

on

By

බාප්පා,පුංචි සහ සහෝදරයා මරා මුදල් හා රන් භාණ්ඩ සොරාගත් පුද්ගලයකු අත්අඩංගුවට ගත් බව නාල්ල පොලිසිය කියයි.

අද අලුයම හතරට පමණ මාලදෙනිය ප්‍රදේශයේ නිවසකදී මෙම අමානුෂික ඝාතනය සිදුව ඇතැයි ද පොලිසිය සඳහන් කරයි.

පාපැදියකින් ගමන් ගත් පුද්ගලයකු පරීක්ෂා කළ පොලිසිය ඔහු සතුව රුපියල් ලක්ෂ 3කට ආසන්න මුදලක් සහ රන් භාණ්ඩ තිබී හමුවී ඇත.

ඒ සම්බන්දයෙන් සැකකරු අත්අඩංගුවට ගෙන පොලිසියට රැගෙන ගොස් පරීක්ෂා කිරීමේදී ඔහු සතුව තිබූ ලිපියන් සම්බන්දයෙන් පරීක්ෂා කිරීමේදී මෙම ඝාතනයේ තොරතුරු අනාවරණය වූ බව පොලිසිය සඳහන් කරයි.

මෙසේ ඝාතනය කර ඇත්තේ තම බිරියගේ බාප්පා,පුංචි සහ ඔවුන්ගේ දරුවා බව මෙතෙක් සිදු කල පරීක්ෂණවලින් අනාවරණය වන බව ද පොලිසිය සඳහන් කරයි.

(ලංකාදීප)

Continue Reading

පුවත්

රුසියානු තානාපති කාර්යාලයේ වැඩ බැලීමට විදේශ සේවයේ විශ්‍රාමිකයකු යවයි

Published

on

By

රුසියාවේ ශ්‍රී ලංකා තානාපති ධූරය තවමත් හිස්ව පැවතීම නිසා නව තානාපතිවරයකු පත් කරන තුරු විදේශ සේවයේ ජ්‍යෙෂ්ඨ නිලධාරියෙකු එම තානාපති කාර්යාලයේ වැඩ බැලීමට යැවීමට රජය සැලසුම් කර ඇතැයි වාර්තා වේ.

මේ අතර විදේශ කටයුතු රාජ්‍ය අමාත්‍ය තාරක බාලසූරිය මහතා මාධ්‍යට පවසා ඇත්තේ, තානාපතිවරයෙකු නොමැති වීම හුදෙක් කාර්ය පටිපාටියේ පරතරයක් පමණක් බවත්, රුසියාවේ පවතින විශේෂ තත්ත්වය මත විදේශ කටයුතු අමාත්‍යාංශයේ ජ්‍යෙෂ්ඨ නිලධාරියෙකු එහි කටයුතු අධීක්‍ෂණය කිරීමට යොමු කරන බවයි.

මෙසේ යවන්නේ විශ්‍රාමික විදේශ සේවයේ ජ්‍යෙෂ්ඨයකු බවත්, දැනට තානාපතිවරයකු නොමැති වීම ප්‍රධාන ප්‍රශ්නයක් නොවන බවද ඔහු අවධාරණය කර තිබේ.

අමාත්‍යවරයා වැඩිදුරටත් පවසා ඇත්තේ එහි දැනටමත් විදේශ සේවයේ ජ්‍යෙෂ්ඨ නිලධාරියෙකු සිටින බවත්, සිදුවෙමින් පවතින හදිසි අවශ්‍යතාවය සැලකිල්ලට ගෙන, ඉතා ජ්‍යෙෂ්ඨ විදේශ සේවා නිලධාරියෙකු යවන්නේ දැනට රුසියාවේ සිටින නිලධාරියා ප්‍රමාණවත් නොවන නිසා නොවන බවද ඔහු කියා සිටී.

මෙහෙයුම ශක්තිමත් කිරීම සඳහා මෙය සිදු කරන බවත්, සාමාන්‍ය ප්‍රොටෝකෝලය අනුව කටයුතු සිදුවන බවද බාලසූරිය මහතා අවධාරණය කර ඇත.

කෙසේවුවද, රුසියාවට තානාපතිවරයකු පත් කර ඇතත් ඔහු කවුරුන්ද යන්න මාධ්‍යට හෙළි නොකිරීමට ද බාලසූරිය මහතා කටයුතු කර තිබේ.

රුසියානු සමූහ ආණ්ඩුවේ හිටපු ශ්‍රී ලංකා තානාපතිනිය වන මහාචාර්ය ජනිතා ඒ ලියනගේ මහත්මියට සේවා දිග තුනක් ලබාදී තිබුණු අතර, ඇය පසුගිය අප්‍රේල් 29 වැනිදා මොස්කව්හි ශ්‍රී ලංකා තානාපති කාර්යාලයේ සිය සේවය අවසන් කර ඇත.

වර්තමානයේ, රුවිනි කේ. මුනිදාස මහත්මිය තානාපති කාර්යාලයේ භාර නිලධාරිනිය ලෙස කටයුතු කරනු ලබයි.

Continue Reading
Advertisement

Trending

Copyright © 2023 Sri Lanka Mirror. All Rights Reserved