මුල්‍ය ආරවුල් විසඳීම සඳහා විශේෂ වර්ගයේ සමථ මණ්ඩල පිහිටුවීමට අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යාංශය තීරණය කර ඇත.
විවිධ ආයතන අතර පවතින මුල්‍ය ආරවුල් මෙන්ම පුද්ගලයන් සහ ආයතන අතර ව්‍යාපාර ගනුදෙනුවලින් ඇති වන මුල්‍ය ආරවුල් විසඳීම මෙම විශේෂ සමථ මණ්ඩල මඟින් සිදුකරයි.
මෙම විශේෂ සමථ මණ්ඩල කොළඹ, ගම්පහ, මහනුවර, මොණරාගල, පොලොන්නරුව සහ අනුරාධපුරය යන දිස්ත්‍රික් 06 කේන්ද්‍ර කර ගනිමින් ක්‍රියාත්මක වීමට නියමිත අතර එහිදී නිරවුල් කර ගත හැක්කේ, රුපියල් ලක්ෂ 05කට වඩා අඩු මුල්‍ය වටිනාකමක් සහිත ගනුදෙනු පමණි.
මෙම සමථකාරවරුන්ගේ මූල්‍ය මණ්ඩලයක සාමාජිකයෙකු ලෙස පත් වීම සඳහා අවශ්‍ය සුදුසුකම් පිළිබඳ යෝජනාවට අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යාංශයේ උපදේශක කාරක සභාවේ එකඟතාව හිමිව ඇත.
එම කාරක සභාව ඊයේ (23) පස්වරුවේ පාර්ලිමේන්තු සංකීර්ණයේ දී අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය ජනාධිපති නීතිඥ, ආචාර්ය විජයදාස රාජපක්ෂ මහතාගේ ප්‍රධානත්වයෙන් රැස් විය.
2023 ජනවාරි මස 14 වනදා පළකරන ලද 2314/80 දරන අතිවිශේෂ ගැසට් පත්‍රයෙහි අදාළ සුදුසුකම් දක්වා ඇත.
ඒ අනුව වයස අවුරුදු 35ත් 75ත් අතර විය යුතු වීම, අඛණ්ඩව වසර පහක කාලයක් මාණ්ඩලික නිලධාරී මට්ටමේ නිලතල දරන හෝ දැරූ නිලධාරියකු විය යුතුය.
එමෙන්ම පෞද්ගලික අංශයේ, රාජ්‍ය නොවන සංවිධානයක, බැංකුවක හෝ සංස්ථාවක ජ්‍යේෂ්ඨ කළමනාකාර තනතුරක් දැරූ තැනැත්තකු විය යුතුය.
නැතිනම් කිසියම් ලිඛිත නීතියක් මඟින් හෝ යටතේ ස්ථාපිත, පිළිගත් වෘත්තිය හෝ අධ්‍යාපන සුදුසුකමක් ලබා තිබිය යුතු වන අතර, සමථකාරවරයන්ගේ මූල්‍ය මණ්ඩලයක සාමාජිකයෙතු ලෙස කටයුතු කිරීම සඳහා මනා මානසික සහ ශාරීරික යෝග්‍ය තත්ත්වයක් සහිත විය යුතුය.
සමථකරණයේ පළපුරුද්ද හෝ සමථකරණයෙහි සිද්ධාන්ත සහ ප්‍රධාන ලක්ෂණ පිළිබඳ දැනුම අමතර සුදුසුකමක් ලෙස විශේෂ වර්ගවල ආරවුල් පිළිබඳ සමථකාරවරුන් පත් කිරීමේ දී සලකා බලන බවත් ගැසට් නිවේදනයෙහි දක්වා ඇත.
(මූලාශ්‍රය : අද දෙරණ)
