ජාතික ඖෂධ නියාමන අධිකාරි පනතට අනුව ඖෂධ සඳහා පනවා ඇති උපරිම සිල්ලර මිල ඉක්මවා ඖෂධ 11ක් අලෙවි කිරීම සම්බන්ධයෙන් නගා තිබූ චෝදනා සියල්ලටම වරද පිළිගත් ආසිරි මෙඩිකල් රෝහලේ අධ්‍යක්ෂ මණ්ඩලයට අද (21)  අධිකරණය හවුවේ පෙනී සිටින ලෙස දන්වමින් මාලිගාකන්ද මහෙස්ත්‍රාත් අධිකරණය නොතිසි නිකුත් කර තිබේ.

ඒ අනුව අද (21) දින මෙම නඩුවේ 1 සිට 11 දක්වා වූ සියලු විත්තිකරුවන් විවෘත අධිකරණයට ඉදිරිපත් විය යුතු බවට නියෝග නිකුත් කර ඇත.

ජාතික ඖෂධ නියාමන අධිකාරිය විසින් පැවැරූ මෙම නඩුවේ විත්තිකරුවන් ලෙස අදාළ පෞද්ගලික රෝහල සහ එහි අධ්‍යක්ෂ මණ්ඩල සාමාජිකයන් වන විශාල් බාලි, අශෝක කාරියවසම් පතිරගේ, අන්කූර් නාන්ද් තදානි, කරුණාමුනි මංජුල ප්‍රසන්න කරුණාරත්න, සුදර්ශන් අහංගම, ගාර්දිය ලොකුගේ හරින් ප්‍රේමරත්න, සිවකුමාර සෙල්ලයියා, හරේෂ් කුමාර් කයිමාල්, අජිත් කරුණාරත්න සහ එම රෝහලේ සහකාර කළමනාකාරිනී (බිල්පත්) ඩී.බී. සඳතිසරු නම් කර තිබිණි.

අදාළ රෝහලේ අධ්‍යක්ෂ මණ්ඩලයට අද දින අධිකරණය හමුවේ පෙනී සිටින ලෙස නොතිසි නිකුත් කිරීම සම්බන්ධයෙන් විත්තියේ නීතිඥවරුන්ගේ විරෝධතාවය ප්‍රතික්ෂේප කරමින් මාලිගාකන්ද මහෙස්ත්‍රාත් ලෝචනී අබේවික්‍රම, එම නියෝගය නිකුත් කළාය.

විත්තිකාර රෝහල වෙනුවෙන් පෙනී සිටි නීතිඥ ජීවන්ත ජයසිංහ මහතා කරුණු ඉදිරිපත් කරමින් කියා සිටියේ නඩුවක් අවසන්වීමෙන් අනතුරුව එම අධිකරණයෙන්ම ලබාදුන් නියෝගයක් ප්‍රතිශෝධනයට ලක්කිරීමට බලයක් නොමැති බවයි.

විත්තියේ නීතිඥ

“රෝහලේ අධ්‍යක්ෂවරුන් මෙම නඩුවේ විත්තිකරුවන් ලෙස නම් කරපු පලියට මුල් අවස්ථාවේදී ඔවුන් මෙවැනි නඩුවලට ඉදිරිපත් කිරීමට අවශ්‍යතාවයක් නැහැ. ස්වාමීනි, මෙම රෝහල කොටස් වෙළෙඳපොළේ ලැයිස්තුගත ලියාපදිංචි සමාගමක්. සමහර අධ්‍යක්ෂවරුන් පිටරටින් ආයෝජනය කරපු අධ්‍යක්ෂවරුන්. අදාළ සමාගම වෙනුවෙන් බලයලත් නියෝජිතයකු ඉදිරිපත් කර තිබෙනවා. එම නියෝජිතයා නඩුවේ චෝදනාවලට වරද පිළිගෙන තිබෙනවා. එම නිසා විත්තිකාර සමාගමට සහ එම සමාගමේ අධ්‍යක්ෂ මණ්ඩලයට නැවත වරක් පෙනී සිටීමට නොතිසි නිකුත් කිරීම පිළිබඳව විරෝධතාවය ප්‍රකාශ කරනවා.”

අගතියට පත් පාර්ශ්වය වෙනුවෙන් පෙනී සිටි නීතිඥ දිල්ෂාන් මහයාගොඩ මහතා කරුණු ඉදිරිපත් කරමින් මෙම නඩුව නියමිත ආකාරයට අද (21) දින කැඳවන ලෙස ඉල්ලා සිටියේය.

“මෙම නඩුව වැඩබලන මහෙස්ත්‍රාත්වරිය ඉදිරියේ ඉකුත් ජනවාරි 17 වැනිදා කැඳවා තිබෙනවා. එදින නීතිඥ ධනුෂ්ක වීරසිංහගේ මෝසමක් මත පළමු වැනි විත්තිකරු වන රෝහල වෙනුවෙන් කරන ලද ඉල්ලීම සලකා බලා නඩුවට අදාළ නියෝග නිකුත් කර තිබෙනවා. එහිදී වැඩබලන මහෙස්ත්‍රාත්වරිය කාර්ය පටිපාටිය අනුගමනය කිරීමේදී නෛතික දෝෂයක් සිදුව ඇති බව බැලූ බැල්මට මෙන්ම එතුමියගේ කාර්යය සටහන්ද පරික්ෂා කර බැලීමේදී නිරීක්ෂණය වෙනවා. එතුමියගේ කාර්යය සටහන පහත පරිදිය.”

උපුටා ගැනීම…..

‘චූදිතයන් වන අධ්‍යක්ෂවරුන් වෙනුවෙන් බලයලත් නියෝජිත කැලුම් හිමේන්ද්‍ර ජයසූරිය යන අය පෙනී සිටී. චූදිත වරද පිළිගැනීමට සූදානම් බව දක්වයි. ඒ අනුව චෝදනා කියවා දෙමි. චෝදනා සියල්ලටම දඩ නියම කරමි. ඒ අනුව සමුච්චිත ලෙස අදාළ චෝදනාවලට වෙන් වෙන්ව දඩ පැවැරීමකින් තොරව රුපියල් 25,000ක දඩ මුදලක් නියම කොට ඇති අතර එකී දඩ නොගෙවන්නේ නම් මාස 6ක සිරදඬුවම් නියම කොට ඇත.’

උපුටා ගැනීම අවසන්….

මෙම නඩුව ඉකුත් ජනවාරි 17 වැනිදා වැඩබලන මහෙස්ත්‍රාත්වරිය ඉදිරියේ කැඳවන අවස්ථාවේදී අගතියට පත් පාර්ශ්වය හෝ මෙම නඩුවේ පැමිණිල්ල වූ ඖෂධ නියාමන අධිකාරිය හෝ පෙනී සිටීමක් සිදුව නොමැති අතර විත්තිය නියමිත දිනයට ප්‍රථම යොමුකරන සිය මෝසම පිළිබඳව පැමිණිල්ලට දැනුම් දීමක් සිදුකොට නොමැත.

ඒ අනුව වැඩබලන මහෙස්ත්‍රාත්වරියට අදාළ දිනයේදී දෙපාර්ශ්වයටම කන්දීමට අවස්ථාවක් ලැබී නොමැත.

නඩුවේ පළමුවැනි විත්තිකාර රෝහල පත් කළ නියෝජිතයා පළමු වැනි විත්තිකරු වෙනුවෙන් වරද පිළිගැනීමක් සිදුනොකර අධ්‍යක්ෂවරුන් වෙනුවෙන් වරද පිළිගැනීම සහ ඒ මත වැඩබලන මහෙස්ත්‍රාත්වරිය ලබාදී ඇති නියෝගය නීතිමය දෝෂ සහිත බවත් දන්වා සිටිමි.

ඒ අනුව මෙම නඩුවේ විත්තිකරුවන්ට නොතිසි නිකුත් කිරීම සම්බන්ධයෙන් වන විරෝධතාව ප්‍රතික්ෂේප කරමි. මෙම නඩුවේ විත්තිකරුවන් අධිකරණය අභියසට මෙතෙක් පැමිණ නොමැති හෙයින්, මෙම නඩුව සම්පූර්ණයෙන් අවසන් වූ නඩුවක් ලෙස ද සැලකිය නොහැකි බව අධිකරණයේ මතයයි.

සබැඳි පුවත්:
අශෝක් පතිරගේ හා ආසිරි රෝහල් ලොක්කන්ට දුන් තීන්දුව ගැන මහේස්ත්‍රාත්වරිය පුදුම වෙයි

වැඩිමිලට බෙහෙත් විකුණූ ආසිරි රෝහල් අධ්‍යක්ෂ මණ්ඩලයට දඩ 

ආසිරි හොස්පිට්ල් බෙහෙත්වලින් ගිණිකාලා අධ්‍යක්ෂවරු උසාවිය‍ට‍