මෙරට ජනගහනයෙන් සියයට 5ක පමණ ප්‍රමාණයක් ග්ලුකෝමා රෝගයට ගොදුරු වී ඇති බව බවට ඇස්තමේන්තු ගත කර ඇති බව සෞඛ්‍ය අමාත්‍යංශ ලේකම් විශේෂඥ වෛද්‍ය පාලිත මහීපාල පවසයි.
ඔහු පවසන්නේ, ගෝලීය වශයෙන් මෙම තත්වය සියයට 3.54 ක් බවත්, ගෝලීය වශයෙන් මෙන්ම මෙරට තුළද ග්ලුකෝමා රෝගයට ගොදුරු වූවන් ප්‍රමාණයේ යම් ඉහළ යාමක් දක්නට ලැබෙන බවය.
“ලොකේ ගත්තත්, ලංකාව ගත්තත් අන්ධභාවයට පත්වෙන්න තුඩු දෙන එක ප්‍රධාන හේතුවක් තමා ග්ලුකෝමා රෝගී තත්ත්වය. ලෝකයේ සියයට කීයක් ඉන්නවද කිව්වොත් 3.54%යි. හැබැයි ලංකාවේ 5%කට ආසන්න ප්‍රමාණයක් ඉන්නවා. අපේ වැඩිහිටි ජනගහනය වැඩිවීම මෙයට එක් හේතුවක් වෙන්න පුළුවන්. ඒ නිසා අපේ රටේ 5%කට පමණ ආසන්න ප්‍රමාණයක් ඇස්තමේන්තු කරලා තියෙනවා මේ රෝගයෙන් පෙළෙනවා කියලා. ඒ නිසා ඇස් පරීක්ෂා කරගැනීම සඳහා යොමු කරන එක ඉතා වැදගත් වෙනවා. ප්‍රතිපත්තිමය වශයෙන් අපේ රටේ තියෙන අක්ෂි ආබාධ කල් ඇතිව හඳුනාගෙන වළක්වා ගත හැකි ආබාධ වළක්වා ගැනීමට වැඩසටහන් සම්පාදනය කරලා තියෙනවා,” යැයි ඔහු වැඩිදුරටත් පවසයි.
මේ වසරේ ග්ලුකෝමා සතිය ලෙස මාර්තු මස 10 – 16 දක්වා නම් ඇති අතර, මෙවර තේමාව ග්ලුකෝමා වලින් තොර ලෝකයක් සදහා එක් වෙමු යන්නයි.
මේ සම්බන්ධයෙයන් දිවයින පුරා අක්ෂි සායනවලින් රෝගීන් දැනුවත් කිරීමේ වැඩසටහන්, වෛද්‍යවරුන් දැනුවත් කිරීමේ වැඩසටහන් ඇතුළු ග්ලුකෝමා විශේෂ අක්ෂි සායන ක්‍රියාත්මක කිරීමට ගාල්ල, පුත්තලම, බදුල්ල, මහනුවර, යාපනය යන දිස්ත්‍රික්ක වල සිදු කිරීමට නියමිතය.
