කොළඹ වරායේ නැංගුරම්ලා තිබු විදෙස් නෞකාවකට හොරෙන් ඇතුලු වී නිතිවිරෝධී ලෙස විදේශගත වීමට උත්සාහ කළ පුද්ගලයන් හතර දෙනා රිමාන්ඩ් කර තිබේ.

ඊයේ (10) සවස ඔවුන් සිවුදෙනාව ගාල්ල වරායේ ආගමන විගමන නිලධාරින්ට බාරදී ඇති අතර, ඔවුන්ව අප්‍රේල් 18 දක්වා රිමාන්ඩ් කරන මෙන් ගාල්ල වැඩබලන මහේස්ත්‍රාත් ප්‍රේමරත්න තිරාණගම මහතා නියෝග කළේය.

(පෙර පුවත: 2023 අප්‍රේල් 11, පෙ.ව.10:17)

යාපනයේ 4ක් නැවකට හොරෙන් රිංගා රටපනින්න හදලා!

කොළඹ වරායේ නැංගුරම්ලා තිබු විදෙස් නෞකාවකට හොරෙන් ඇතුලුවි නිතිවිරෝධී ලෙස විදේශගත වීමට උත්සාහ කළ පුද්ගලයන් හතර දෙනකු නෞකාවේ සිටියදී එහි සේවකයන් විසින් හඳුනා ගැනිමෙන් අනතුරුව අත් අඩංගුවට ගෙන තිබේ.

නෞකාව ඊයේ (10) සවස ගාල්ල වරායට පැමිණ ඔවුන් සිවුදෙනා ගාල්ල වරායේ ආගමන විගමන නිලධාරින්ට බාරදී ඇත.

ඔවුන් කොළඹ වරායට මාර්තු 24 දින පැමිණ තිබූ ඇමෙරිකා එක්සත් ජනපදයට අයත් එම්.වී.සී.එම්.ඒ.සී.ජී.එම්.පැනමා නැමැති නෞකාවට හොරෙන් ඇතුළු වී ඇති අතර, එම නෞකාව මාර්තු 25දින කොළඹ වරායෙන් පිටත්ව යුරෝපය බලා ගමන් ආරම්භ කර තිබේ.

කෙසේවෙතත්, මෙම පුද්ගලයන් සිව්දෙනා පිළිබඳව කරුණු අනාවරණය වීමත් සමග, මෙම නෞකාවේ කපිතාන්වරයා විසින් මේ පිළිබඳව සිය මව් සමාගම දැනුවත් කර, ඔවුන්ගේ උපදෙස් පරිදි ශ්‍රී ලංකාව දෙසට පැමිණෙන එම සමාගමට අයත් එම්.වී.ජැක්සන් බේ නෞකාව වෙත මාර්තු 28 දින ඔවුන්ව භාර දී තිබේ.

මෙසේ අත් අඩංගුවට ගෙන ඇත්තේ යාපනය වේලනයි, තොන්ඩමනාරු, පුදුකුඩිඉරුප්පු සහ අරාලි උතුර යන ප්‍රදේශවල පදිංචි 21,22,35 යන වයස්වල පසුවන තරුණයන් සිවුදෙනෙකි.
ආගමන විගමන නිලධාරින් පැවසුවේ තම පරික්ෂණ අවසන්විමෙන් පසු අධිකරණයට ඉදිරිපත් කිරිම සඳහා ඔවුන් වරාය පොලිසිය වෙත බාරදෙනු ලබන බවය.