ජපන් රජය “Clean Sri Lanka” වැඩසටහනට සහය දැක්වීමට ජපානයේ කැපවීම යලි තහවුරු කරමින් ජපන් යෙන් මිලියන 300 ක ආධාර ප්‍රදානයක් සැපයීම සඳහා අද (03) දිනයේදී ශ්‍රී ලංකා රජය සමඟ හුවමාරු සටහන් පත්‍රයක් අත්සන් කළේය. 

අත්සන් තැබීමේ උත්සවය ජනාධිපති ලේකම් කාර්යාලයේදී කම්කරු අමාත්‍ය සහ ආර්ථික සංවර්ධන නියෝජ්‍ය අමාත්‍ය – මහාචාර්ය අනිල් ජයන්ත ප්‍රනාන්දු මහතා සහ ජපානයේ විදේශ කටයුතු පිළිබඳ පාර්ලිමේන්තු උප අමාත්‍ය අකිකෝ ඉකුඉනා මහත්මිය අතර සිදූවිය. 

මෙම හුවමාරු සටහන් පත්‍රයට අත්සන් කරන ලද්දේ ශ්‍රී ලංකාවේ ජපන් තානාපති ගරු අකිඔ ඉසොමතා මහතා සහ මුදල්, ක්‍රමසම්පාදන සහ ආර්ථික සංවර්ධන අමාත්‍යාංශයේ ලේකම් කේ.එම්.එම්.සිරිවර්ධන මහතා විසින්ය.

මෙම ප්‍රදානය යටතේ ජපන් සමාගම් විසින් නිෂ්පාදනය කරන ලද උසස් තත්ත්වයේ කසළ සම්පීඩක 28ක් රාජ්‍ය පරිපාලන, පළාත් සභා සහ පළාත් පාලන අමාත්‍යාංශය යටතේ ඇති ජාතික ඝණ අපද්‍රව්‍ය කළමනාකරණ මධ්‍යස්ථානය (NSWMSC) හරහා බස්නාහිර, උතුරු සහ නැගෙනහිර පළාත් සඳහා ලබා දෙනු ඇත. මෙම ව්‍යාපෘතිය මගින් ඉහත පළාත් වල අපද්‍රව්‍ය එකතු කිරීම සහ ප්‍රවාහනය කිරීමේ ධාරිතාව වැඩි දියුණු කිරීම, වඩාත් සනීපාරක්ෂක සහ පාරිසරික වශයෙන් තිරසාර අපද්‍රව්‍ය කළමනාකරණයක් සහතික කිරීම ප්‍රධාන වශයෙන් අරමුණු කරයි.

අපද්‍රව්‍ය ජනනය මගින් මහජන සෞඛ්‍යයට සහ වායුගෝලයේ ගුණාත්මක භාවයට ඒල්ලවන අභියෝග සහ එහි බලපෑම මැඩලීමේ හදිසි අවශ්‍යතාවය හඳුනා ගනිමින්, ජපානය, බස්නාහිර පළාත් ඝණ අපද්‍රව්‍ය කළමනාකරණ ප්‍රධාන සැලැස්ම සැකසීම සහ අපද්‍රව්‍ය බැහැර කිරීමේ යටිතල පහසුකම් වැඩිදියුණු කිරීම ඇතුළුව අපද්‍රව්‍ය කළමනාකරණයේ ශ්‍රී ලංකාවේ ප්‍රයත්නයන් සඳහා නිරන්තරයෙන් සහාය ලබා දී ඇත. ශ්‍රී ලංකාවට පාරිසරික අභියෝග වලට මුහුණ දීමට හැකිවනු පිණිස, තිරසාර සංවර්ධනය ප්‍රවර්ධනය කිරීම සඳහා ජපානය දක්වන දිගුකාලීන කැපවීම, මෙම නවතම ආධාර ප්‍රදානය මගින් අවධාරණය කරයි.