Connect with us

පුවත්

රක්ෂණ සභාපතිට වෙඩි තිබ්බට මාතර සභාපති ඇතුළු 4ක් අල්ලයි!

Published

on

මීගොඩ ගැමුණු මාවත ප්‍රදේශයේදී සමුපාකාර රක්ෂණ සමාගමේ නව සභාපති දර්ශන ලලිත් සමරවික්‍රම මහතා ට වෙඩි තබා තුවාල සිදු කිරීමේ සිද්ධිය සම්බන්ධයෙන් මාතර සමුපාකාර රක්ෂණ සමාගමේ සභාපතිවරයා ඇතුළු පුද්ගලයන් සිවුදෙනකු බස්නාහිර දකුණ දිසා අපරාධ කොට්ඨාසයේ නිලධාරීන් විසින් ඊයේ (11) සවස අත්අඩංගුවට ගෙන තිබේ.

මෙසේ අත්අඩංගුවට ගෙන ඇති සෙසු සැකකරුවන් අතර බස් රථ හිමි ව්‍යාපාරිකයෙක්, යුද හමුදාවේ සේවය හැර ගිය සෙබළෙකු සහ බස් කොන්දොස්තරවරයෙකු ද සිටින බව පොලීසිය කියයි.

වෙඩි තැබීමට යොදා ගත් ගිනි අවියත් වෙඩික්කරුවන් ගමන් ගත් යතුරුපැදියක් සහ ත්‍රිරෝද රථයක්ද බස්නාහිර පළාත් දකුණු දිසා අපරාධ කොට්ඨාසයේ නිලධාරීන් විසින් සිය භාරයට ගෙන තිබේ.

හිටපු සභාපතිවරයාගේ සමීපතමයෙකු වන මාතර චමින්ද නැමැත්තා විසින් කළුතර වරකාගොඩ පදිංචි පුද්ගලයෙකුට ලබාදුන් කොන්ත්‍රාත්තුවකට අනුව මෙම වෙඩි ප්‍රහාරය එල්ලකර තිබෙන බව හෙළිවී තිබේ. 

වරකාගොඩ පදිංචි පුද්ගලයා පුද්ගලික ආරක්ෂක අංශයක සේවයේ නිරතව සිටින අයෙකු බවත් ඔහු කුලියාපිටියේ පදිංචි හිටපු හමුදා සෙබළෙකුට රුපියල් ලක්ෂ එකහමාරක මුදලක් ලබා දෙමින් රක්ෂණ සමාගමේ නව සභාපතිවරයාගේ ඝාතනයට යොදවා ඇති බව අනාවරණය වී ඇත. 

අවස්ථා කිහිපයකදීම වර්තමාන සභාපතිවරයාට වෙඩි තැබීම සදහා පැමිණිය ද එය මඟ හැරි ඇතැයි පොලීසිය කියයි.

වෙඩික්කරුවා සමඟ යතුරුපැදිය පදවා ඇත්තේ කළුතර වැල්ලපිටිය පදිංචි අයෙක් බවද අනාවරණය වී ඇත. 

ඒ අනුව මාතර චමින්ද නැමැත්තා ඔහු විසින් ඝාතන කොන්ත්‍රාත්තුව ලබා ගත් වරකාගොඩ පදිංචි පුද්ගලයාත් වෙඩික්කරු සහ යතුරුපැදිකරු අත්අඩංගුවට ගත් සැකකරුවන් අතර, සිටින බව බස්නාහිර පළාත් දකුණ දිසා අපරාධ කොට්ඨාසයේ උසස් නිලධාරියෙක් සඳහන් කළේය.

මෙම ඝාතන කොන්ත්‍රාත්තුව ලබා දී ඇත්තේ මාස කිහිපයකට පෙර බවද සැකකරුවන්ගෙන් ප්‍රශ්න කිරීමේදී හෙළිව තිබේ.

පසුගිය මැයි 25 වැනිදා වෙඩික්කරු සහ ඔහුගේ සහායකයා නව සභාපතිවරයාගේ නිවස පිහිටි ප්‍රදේශයේ සැරිසරමින් ඔහු සම්බන්ධයෙන් තොරතුරු රැස්කර ඔහුගේ මුහුණ හඳුනාගෙන ඇති බවද සැකකරුවන්ගෙන් ප්‍රශ්න කිරිමේදී හෙළිව තිබේ. 

එහිදී නව සභාපතිවරයාගේ වාහනය ගමන් ගන්නා මාර්ගය පවා හොඳින් නිරීක්ෂණය කර ඝාතන සැලසුම සකස් කර ඇති බවද අනාවරණය වී ඇත.

නව සභාපතිවරයාට වෙඩි තැබීමෙන් පසු හයිලෙවල් මාර්ගයට පැමිණ ඇති මෙම වෙඩික්කරු සහ යතුරුපැදිකරු හොරණ මාර්ගය ඔස්සේ පාදුක්කට පැමිණ ඒ ඔස්සේ කළුතර වරකාගොඩට පැමිණ ඇති බවද ප්‍රශ්න කිරීමේදී සැකකරුවන් හෙළි කර ඇත.

මාතර චමින්ද නැමැති පුද්ගලයා මෙම රක්ෂණ සමාගමේ කොටස් කරුවෙකු බවද විමර්ශනවලින් පෙනී ගොස් ඇත. 

හිටපු සභාපතිවරයාගේ අනුදැනුම මත මෙම වෙඩි තැබීම සිදුකර ඇති බව හෙළිවී ඇත්තේ මාතර චමින්ද නැමැති පුද්ගලයා විසින් බව පොලිස් තොරතුරු අනාවරණය කළේය. 

වෙඩික්කරු 2010 වසරේ යුද හමුදාවෙන්  ඉවත්වූ අයෙකු බවද විමර්ශනවලින් අනාවරණය වී තිබේ. 

වරකාගොඩ පදිංචි ඝාතන කොන්ත්‍රාත්තුව භාරගත් පුද්ගලයා ළහිරු මනරම් නමැති අයකු බවත් වෙඩික්කරු ප්‍රසන්න කුමාර නමැත්තකු බවත් පොලිසිය කියයි. 

ප්‍රසන්න කුමාර නමැති වෙඩික්කරු ප්‍රශ්න කිරීම්වලදී පවසා ඇත්තේ සාර්ථකව මෙම ඝාතන සැලැස්ම ක්‍රියාත්මක කළහොත් විශාල වශයෙන් මුදල් මෙන්ම උපකාර ද කරන බව පැවසූ බවයි.

වෙඩි තැබීමට යොදා ගත් ගිනි අවිය චීනයේ නිෂ්පාදිත එකක් බවද පරීක්ෂා කිරීමේදී අනාවරණය වී ඇත.

සැකකරුවන් පැය 48ක රඳවා ගැනීමේ නියෝග මත දීර්ඝ ලෙස ප්‍රශ්න කර අපරාධයේ සුලමුල හෙළි කර ගැනීමෙන් අනතුරුව හෝමාගම මහේස්ත්‍රාත් අධිකරණය වෙත ඉදිරිපත් කිරීමට නියමිතය.

පුවත්

බොරු මැණික් විකිණීමට ගිය 6ක්  අත්අඩංගුවට

Published

on

By

නිධානයකින් ලබාගත් ලද බවට පවසමින් ව්‍යාජ මැණික්ගල් පෙන්වා මුදල් වංචා කිරීමට තැත්කළ කාන්තාවක් ඇතුළු සැකකරුවන් 06 දෙනෙකු අත්අඩංගුවට ගෙන තිබේ.

ඊයේ (25) දහවල් කාලයේදී කටුගස්තොට පොලීසියට ලද තොරතුරක් මත කටුගස්තොට නගරයේදී එම සැකකරුවන් අත්අඩංගුවට ගෙන ඇත.

අත්අඩංගුවට ගත් සැකකරුවන් අවුරුදු 35 හා 51 අතර වයස්වල පසුවන හෙයියන්තුඩුව, ගාල්ල, හිනිදුම සහ ඇතුල්කෝට්ටේ ප්‍රදේශවල පදිංචිකරුවන් වන අතර සැකකාරිය හබරකඩ ප්‍රදේශයේ පදිංචි 35 හැවිරිදි කාන්තාවකි.

මෙම සැකකරුවන් ව්‍යාජ මැණික්ගල් තැරැවුකරුවන් මාර්ගයෙන් ගැණුම්කරුවෙකු සම්බන්ධකර විකිණීම සඳහා ගාල්ල, නෙළුව ප්‍රදේශයේ සිට කටුගස්තොට ප්‍රදේශයට පැමිණ ඇත.

තරැවුකරුවන් විසින් මෙම මැණික්ගල් ව්‍යාජ මැණික්ගල් බවට අනාවරණය කරගෙන ඒ සම්බන්ධයෙන් කටුගස්තොට පොලීසිය දැනුම්වත් කිරීමෙන් පසු සැකකරුවන් අත්අඩංගුවට ගෙන තිබේ.

සැකකරුවන් හා සැකකාරිය ඊයේ (25) මහනුවර මහෙස්ත්‍රාත් අධිකරණය වෙත ඉදිරිපත් කිරීමෙන් පසු හෙට (27) දක්වා රක්ෂිත බන්ධනාගාර ගත කර ඇති අතර කටුගස්තොට පොලීසිය වැඩිදුර විමර්ශන සිදුකරයි.

Continue Reading

පුවත්

තද සුළං ගැන අනතුරු ඇඟවීමක්

Published

on

By

කාලගුණවිද්‍යා දෙපාර්තමේන්තුව විසින් තද සුළං පිළිබඳ අවවාදාත්මක නිවේදනයක් නිකුත් කර තිබේ.

අද (26) පෙ.ව 10.30ට නිකුත් කරන ලද එම නිවේදනය හෙට (27) පෙ.ව 10.30 තෙක් වලංගුවන බව කාලගුණ විද්‍යා දෙපාර්තමේන්තුව සඳහන් කරයි.

මධ්‍යම කඳුකරයේ බටහිර බෑවුම් ප්‍රදේශවල සහ උතුරු මැද, දකුණු, වයඹ පළාත් සහ ත්‍රිකුණාමලය දිස්ත්‍රික්කය සඳහා මෙම නිවේදනය වලංගුවන බව කාලගුණවිද්‍යා දෙපාර්තමේන්තුව පවසයි.

දිවයින හරහා නිරිතදිග මෝසම් සුළං ප්‍රවාහයේ වැඩිවීම හේතුවෙන්, මධ්‍යම කඳුකරයේ බටහිර බෑවුම් ප්‍රදේශවල සහ උතුරු, උතුරු මැද, බස්නාහිර, දකුණු සහ වයඹ පළාත්වලත් ත්‍රිකුණාමලය දිස්ත්‍රික්කයේත් විටින් විට හමන පැ.කි.මී. 50-60ක පමණ තද සුළං ඇතිවිය හැකිය.

දිවයිනේ සෙසු ප්‍රදේශවල විටින් විට හමන පැ.කි.මී 30-40 පමණ තරමක තද සුළං ඇතිවිය හැකි බව කාලගුණ විද්‍යා දෙපාර්මේන්තුව වැඩිදුරටත් නිවේදනය කරයි.

Continue Reading

පුවත්

“ලංකාවේ ලොකුම සන්ධානය අපි හදනවා”

Published

on

By

ඉදිරි මැතිවරණ ඉලක්ක කරමින් ශ්‍රී ලංකාවේ ලොකුම හා ශක්තිමත්ම සන්ධානය ශ්‍රී ලංකා නිදහස් පක්ෂය ප්‍රමුඛ කරගනිමින් ආරම්භ කරන බව කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා පවසයි.

පාර්ලිමේන්තුව නියෝජනය කරන පක්ෂ ගණනාවක් මෙන්ම පාර්ලිමේන්තුව නියෝජනය නොකරන පක්ෂ ගණනාවක් දැනටමත් තම සන්ධානයට සහයෝගය පළ කර ඇති බව අමාත්‍යවරයා සඳහන් කරන්නේය.

එමෙන්ම විවිධ පක්ෂ නියෝජනය කරන පාර්ලිමේන්තු මන්ත්‍රීවරු රැසක් අම්බලන්තොට රැලියට ජුනි 8 වැනිදා සහභාගී වීමට නියමිතව ඇතැයි අමාත්‍ය මහින්ද අමරවීර මහතා පැවසීය.

Continue Reading
Advertisement

Trending

Copyright © 2023 Sri Lanka Mirror. All Rights Reserved