අඩු ආදායම්ලාභී ජනතාවට සහන මිලට ලබාදීම සඳහා ලංකා සීනි සමාගම නිකුත් කරන රතු සීනි තොග සමුපකාර සමිතිවල නම් භාවිත කරමින් පෞද්ගලික අංශයට අලෙවි කිරීමේ ජාවාරමක් සම්බන්ධ තොරතුරු හෙළිව තිබේ.
ලංකා සීනි සමාගම යටතේ පාලනය වන සෙවණගල සහ පැල්වත්ත සීනි සමාගම්වල නිපදවන රතු සීනි තොග අඩු ආදායම්ලාභී ජනතාවට බෙදාහැරීම සඳහා සහණදායි පියවරක් ලෙස සමුපකාර සමිති වලට ලබාදීම සිදු කෙරේ.
අවසන් ටෙන්ඩරයේදී ලංකා සීනි සමාගම විසින් පෞද්ගලික ගැණුම්කරුවන්ට රතු සීනි කිලෝවක් රුපියල් 340 බැගින් අලෙවි කරද්දී, සමුපකාර සමිතිවලට කිලෝවක් අලෙවි කර ඇත්තේ රුපියල් 300 කටය.
සමුපකාර සමිති මගින් මෙලෙස ලබාගන්නා සීනි තොග වැඩි මිලට පෞද්ගලික අංශයට අලෙවි කර ඇති බව පැවසේ.
කෙසේ වෙතත් අඩු මිලට සීනි නිකුත් කරන සමුපකාර සමිති තෝරා ගනු ලබන්නේ දේශපාලන මැදිහත්වීම් මත බව පෞද්ගලික ගැනුම්කරුවෝ පවසති.
සීමාසහිත හසලක විවිධ සේවා සමුපකාර සමිතියට සීනි කිලෝ පනස් දහසක් ලබා ගැනීම සඳහා රුපියල් එක් කෝටි හතළිස් තුන් ලක්ෂ පනස් දහසක මුදලක් තැන්පත් කළ බවට ලිපියක් ලංකා සීනි සමාගමට ඉකුත් මාර්තු මස 07 වැනිදා යොමුකර ඇති අතර, මෙම සීනි තොගය රැගෙන යෑමට මාර්තු මස 08 වැනිදා ලොරි දෙකක් යොමු කරන බව ද එහි සඳහන් කර තිබේ.
නමුත් මේ සම්බන්ධයෙන් හසලක විවිධ සේවා සමුපකාර සමිතිය කියා සිටියේ එවැනි සීනි තොගයක් සමිතියට නොලැබුණු බවය.
ඒ අනුව පෙනී යන්නේ එම සමුපකාර සමිතිය නමින් ලබාගත් සීනි මගින් වංචනිකව රුපියල් ලක්ෂ 20 ක් උපයා තිබෙන බවය.
මේ ආකාරයෙන් ගාල්ල දිස්ත්‍රික්කයේ හබරාදූව සහ ඉහළ ලේල්වල සමුපකාර සමිති නමින් ද සීනි මිටි 700 ක් යවා වංචනිකව මුදල් උපයා ඇතැයි පැවසේ.
ලංකා සීනි සමාගමේ පරිපාලනය කියා සිටින්නේ මෙවැනි ආකාරයෙන් සීනි වංචාවක් සිදුවී තිබෙන බවට තහවුරු වුවහොත් ඊට විරුද්ධව පියවර ගන්නා බවය.
