රඹුක්කන ප්රදේශයේ නිවසකට පැන එහි සිටි කාන්තාවකට අඩන්තේට්ටම් කර ලිංගික අතවරයකට ලක්කිරීමට උත්සාහ කළ බව කියන පොලිස් සැරයන්වරයකුට නිවැසියන් පහරදී ගස්බැඳ සිටියදී රඹුක්කන පොලිසිය විසින් පසුගියදා (24) රාත්රියේ අත්අඩංගුවට ගෙන තිබේ.
රාත්රී ජංගම මුර සංචාරයක නිරතව සිටියදී නිල ඇඳුමින් සැරයන්වරයා අදාළ නිවසට ඇතුළු වී ඇත.
රඹුක්කන පරපේ ඉහළගම පිහිටි නිවෙසකට මෙම නිලධාරියා රෑ ඇතුළු වී ඇති බවත් ඔහු ලිංගික අතවර කර ඇත්තේ 60 හැවිරිදි කාන්තාවකට බවත් පොලිසිය කියයි.
මෙම සැරයන්වරයාගේ ප්රධානත්වයෙන් පොලිස් කොස්තාපල්වරු දෙදෙනකු පසුගිය 24 වැනිදා සවස 6.00 සිට 25 වැනිදා උදෑසන 6.00 දක්වා පොලිස් කැබ් රථයේ ජංගම සංචාරක ආරක්ෂක රාජකාරියේ යොදවා සිට ඇත.
මෙම කණ්ඩායම භාරව සිටි සැරයන්වරයා කැබ් රථයේ රාජකාරියේ නිරතව සිටියදී 24 වැනිදා රාත්රී 11.30ට පමණ හදිසියේම පොලිස් ස්ථානයට යා යුතු බව සෙසු නිලධාරීන්ට පවසා කැබ් රථයෙන් බැස පිටත්ව ගොස් ඇත.
ඔහු කැබ් රථයෙන් බැස ඇත්තේ පොලිසිය ආසන්න ප්රදේශයකින් බවත් ඉක්මනින්ම පොලිසියට ගොස් නැවත පැමිණෙන බවට පැවසූ බවත් සෙසු නිලධාරීන් සිය උසස් නිලධාරීන්ට පවසා ඇත.
මේ අතර මැදියම් රාත්රිය පසුවීමත් සමඟ රඹුක්කන පොලිසියට 119 හදිසි ඇමතුම් අංශයෙන් පණිවුඩයක් ලැබී ඇත්තේ රඹුක්කන පරපේ ඉහළගම පිහිටි නිවෙසකට සොරකු ඇතුළු වී ඇති බවටය.
ඒ අනුව වහාම ක්රියාත්මක වූ රඹුක්කන පොලිසියේ 119 හදිසි ඇමතුම් අංශයට අනුයුක්ත නිලධාරීන් දෙදෙනා යතුරුපැදියකින් ද රාත්රී ආරක්ෂක මුර සංචාරක කැබ් රථයේ රාජකාරියේ සිටි සෙසු නිලධාරීන් ද පණිවුඩයෙන් කියැවුණු ස්ථානයට ගොස් ඇත.
එහිදී එම නිලධාරීන් දැක ඇත්තේ නිවෙස ඉදිරිපිට නිල ඇඳුමින් ගැටගසා සිටි පොලිස් සැරයන්වරයාවය.
එම ස්ථානයේ පොලිස් සැරයන්වරයාට අයත් යතුරුපැදියක් ද තිබී ඇත.
විමර්ශනයේදී අනාවරණය වී ඇත්තේ මෙම නිලධාරියා පොලිස් ස්ථානයට ගොස් සිය පුද්ගලික යතුරුපැදියේ නැඟී මෙම නිවෙසට ගොස් ඇති බවය.
ප්රශ්න කිරීම් හමුවේ සැරයන්වරයා පොලිසියට පවසා ඇත්තේ 60 හැවිරිදි කාන්තාවගෙන් ලද ආරාධනාවකට අනුව ඇගේ නිවෙසට ගිය බවය.
එහෙත් එම කාන්තාව පවසා ඇත්තේ එම නිලධාරියා සමඟ තමාගේ කිසිදු සම්බන්ධයක් නැති බවත් ඔහු නිවෙසට ඇතුළු වී තමාට කරදර කළ බවත්ය.
ඇගේ ප්රකාශ මත මෙම නිලධාරියාව අත්අඩංගුවට ගත් රඹුක්කන පොලිසියේ නිලධාරීන් ඔහුව කෑගල්ල මහේස්ත්රාත් අධිකරණයට ඉදිරිපත් කර තිබේ.
එහිදී ඔහුව අගෝස්තු 3 වැනිදා දක්වා රක්ෂිත බන්ධනාගාරගත කර ඇත.
මෙම නිලධාරියා විසින් රාජකාරි වේලාව තුළ රාජකාරියේ නොසිට නිවෙසකට ඇතුළු වී කළ විෂමාචාර ක්රියාව සම්බන්ධයෙන් ඊයේ (26) වන විට ඔහුගේ වැඩ තහනම් කිරීමට ද උසස් පොලිස් නිලධාරීන් පියවර ගෙන තිබිණි.
