දින හතක් ඇතුළත තමන් මරා දමන බවට වැලිකඩ බන්ධනාගාර කාන්තා අංශයේ ප්‍රධාන ජේලර්වරියකට එම කාන්තා අංශයේ රඳවා සිටි සැකකාර කාන්තාවක් මරණීය තර්ජනය එල්ල කළ බව කියන සිද්ධිය සම්බන්ධයෙන් විමර්ශනයක් පවත්වන ලෙසට අධිකරණය පොලිසියට නියෝග කර තිබේ.

කොළඹ අතිරේක මහේස්ත්‍රාත් හර්ෂණ කැකුණවෙල විසින් ඊයේ (11) බොරැල්ල පොලිසියට මෙම නියෝගය නිකුත් කර තිබුණි.

එමෙන්ම බන්ධනාගාරගතව සිටින සැකකාර කාන්තාව පිටස්තර පුද්ගලයන් සමග දුරකථනය සංවාද පවත්වා තිබේද යන්න පිළිබඳව ද විමර්ශනය කිරීම සඳහා අදාළ දුරකථන සමාගම්වලින් දුරකථන වාර්තා කැඳවන ලෙසට පොලිසියට නියෝග කර ඇත.

සිද්ධිය සම්බන්ධයෙන් කරුණු දක්වමින් පොලීසිය අධිකරණය හමුවේ කියා සිටියේ මෙම සැකකාර කාන්තාව ජංගම දුරකථන භාවිතා කිරීම සෙසු සිරකාරියන් සමග අසභ්‍ය ආකාරයෙන් හැසිරීම ඇතුළු චෝදනා සැලකිල්ලට ගෙන ඇයව කළුතර බන්ධනාගාරයට මාරු කර යැවූ බවය.

කෙසේ වෙතත්, එසේ මාරු කරන ලද ඇයව යළි වැලිකඩ බන්ධනාගාර කාන්තා අංශය වෙත මාරුකර එවන ලෙසට කළුතර බන්ධනාගාර අධිකාරිවරයාට ලද ලිපියකට අනුව ඇයව යළි වැලිකඩ බන්ධනාගාර කාන්තා අංශය වෙත මාරු කර යවා තිබේ.

ඒ අනුව දූෂණ චෝදනා මත කළුතර බන්ධනාගාරය වෙත ස්ථාන මාරු කර යවන ලද සැකකාර කාන්තාව යළි වැලිකඩ බන්ධනාගාරය වෙත පැමිණියේ කෙසේද යන්න පිළිබඳව ප්‍රධාන ජේලර්වරියට සැකයක් මතුව තිබේ.

ඒ සම්බන්ධයෙන් සොයා බලමින් සිටියදී සැකකාර කාන්තාව එම කාන්තා අංශයේ වැසිකිළියක් තුළට ගොස් කෙසෙල්වත්තේ දිනුක නමැති පුද්ගලයකු සමග දුරකථනයෙන් සංවාද පවත්වමින් සිට ඇති බව පොලිසිය අධිකරණයට දන්වා තිබුණි.

එහිදී පැමිණිලිකාර ජේලර්වරිය අදාළ සැකකාර කාන්තාව වැසිකිළියෙන් එළියට ඇද ප්‍රශ්න කරන අතරතුරදී ඇය පොළොවේ දිගාවී සිය දෑතට වැලි ගෙන ජේලර්වරියක දෙසට දමා ගසමින් පරුෂ වචනයෙන් බැන වැදී තිබේ.

පොලිසිය අධිකරණයට කරුණු දක්වමින් ප්‍රකාශ කළේ ජේලර්වරිය හා ඇගේ පවුලේ සාමාජිකයින් දින හතක් ඇතුළත මරා දමන බවට ද තර්ජනය කර ඇති බවය.