විදෙස්ගත ශ්‍රමිකයන් සදහා වන විද්‍යුත් වාහන ආනයන සඳහා අලුතින් බලපත්‍ර ලබාදීම මේවන විට අත්හිටුවා ඇතැයි කම්කරු හා විදේශ රැකියා අමාත්‍යංයේ ප්‍රකාශිකාවක කියා සිටියාය.

ඇය වැඩිදුරටත් කියා සිටියේ ඉකුත් වසරේ ඔක්තෝබර් 31 වැනිදායින් පසුව විද්‍යුත් වාහන ආනයන සඳහා අලුතින් බලපත්‍ර ලබාදීම අත්හිටුවා ඇති බවයි.

කෙසේවුවද, එම කාලයට පෙර විද්‍යුත් වාහන ආනයන බලපත්‍ර ලබාගෙන සිටි විගමනික ශ්‍රමිකයනට වාහන ගෙන්වා ගැනීම සඳහා පමණක් ණයවර කාලය දිගු කර ඇතැයි ද ඇය පැවසුවාය.

2023 බලපත්‍ර ලාභී වාහන ලියාපදිංචිය 79 යි – මෝටර් රථ ප්‍රවාහන කොමසාරිස්

මේ අතර, අප පසුගිය කාලයේ විගමනික ශ්‍රමිකයන් සදහා වන විද්‍යුත් වාහන ආනයන බලපත්‍ර ලබා ගිමින් මෝටර් රථ කීයක් මෝටර් රථ ප්‍රවාන දෙපාර්තමේන්තුවේ ලියාපදිංචි කර ඇත්දැයි එහි කොමසාරිස් ජනාරාල් නිශාන්ත අනුරුද්ධ වීරසිංහ මහතාගෙන් ශ්‍රී ලංකා මිරර් අප කළ විමසීමකදී ඔහු කියා සිටියේ ගිය වසරේ (2023) එවැනි මෝටර් රථ 79ක් පමණ ලියාපදිංචි කර ඇති බවයි.

කෙසේවුවද, පසුගිය මාස 4ක පමණ කාලය තුළ ද තවත් මෝටර් රථ 20කට ආසන්න ප්‍රමාණයක් ලියාපදංචි කර ඇති බවද ඔහු කීය.

_{විදසේගත ශ්‍රමිකයන් 900කට කාර් පර්මිට් දුන්නා – ඇමති මනූෂ}

කෙසේවුද, ඉකුත් ඇයවැය විවාද අතරේදී කම්කරු හා විදේශ රැකියා අමාත්‍ය මනූෂ නානයක්කාර මහතා කියා සිටියේ විදෙස්ගත ශ්‍රමිකයන් සදහා වන විද්‍යුත් වාහන ආනයන බලපත්‍ර දල වශයෙන් 900ක් නිකුත් කර ඇති බවයි.

අයවැය ඉදිරිපත් කර මේ වන විට මාස 4කට වැඩි කාලයක් ගතව ඇතත්ත අදාළ මෝටර් රථ තවමත් ලංකාවට ආනයනය කර නොතීබීම ගැටලු සහගත බව ව්‍යාපාරික කේෂත්‍රයේ ප්‍රවීනයෝ කියා සිටිති.

Overland කෙරුවාව 

මේ අතර, විදෙස්ගත ශ්‍රමිකයන් සදහා වන විද්‍යුත් වාහන ආනයනට පළමු බලය ලත් මෙරට නියෝජිතයා ලෙස පත් කෙරුණු දහම් පෙරේරා මහතාට අයත් ඕවර්ලෑන්ඩ් ඔටෝ මොබයිල් පුද්ගලික සමාගම (Overland Automobiles Pvt Ltd) විසින් සාමාජ මාධ්‍ය ඔස්සේ දැන්වීම් පලකරමින් අලෙවි කරනු ලබන මෝටර් රථ සම්බන්ධයෙන්ද ශ්‍රී ලංකා මිරර් සොයා බැලීමක් සිදු කළ‍ේය.

මුලින්ම එම දැන්වීම් වල ඇති විදුලි මෝටර් රථයක් මිලදී ගැනීමට එහි සදහන්වන දුරකථන අංකයකින් අප විමසීමසීමක් කළ අතර දුරකථනයට පිළිතුරු දුන් කාන්තාව මුලින්ම විමසා සිටියේ වාහන ගෙන්වීමට බලපත්‍රයක් ඇත්දැයි කියාය.

ඊට පිළිතුරු වශයෙන් අප එවැනි බලපත්‍රයක් නොමැති බවත්, එවැනි බලපත්‍රයක් නොවන්නේ නම් විද්‍යුත් මෝටර් රථයක් මිලදී ගැනීමට නොහැකි දැයි විමසීය.

ඊට පිළිතුරු ලෙස කාන්තාව කියා සිටියේ එවැනි බලපත්‍රයක් නැතත් විදුලි මෝටර් රථයක් මිලදී ගත හැකි බවයි.

පසුව අප එහි වූ MG4 මෝටර් රථය කීයක් වනවාදැයි විමසා සිටියේය. පිළිතුරු ලෙස කාන්තාව කියා සිටියේ අපට MGX වර්ගයේ මෝටර් රථයක් රුපියල් මිලියන 21කට ලබාදිය හැකි බවයි.

එවිට අපි අපගේ නමටම එය ලියා පදිංචි කර ගත හැකිදැයි විමසා සිටි අතර ඊට පිළිතුරු ලෙස ඇය කියා සිටියේ එයද කළ හැකි බවයි.

එසේ කිරීමට නම් අදාළ මෝටර් රථයේ පිරිවැය, රක්ෂණය සහ භාණ්ඩ ප්‍රවාහන (CIF) වටිනාකම‍ට (Cost, Insurance, And Freight (CIF) Value) අදාළව 10% ක බදු මුදලක් මෝටර් රථ ප්‍රවාන දෙපාර්තමේන්තුවට ගෙවිය යුතු බව කියා සිටියාය.

ඒ අනුව අපි MGX වර්ගයේ මෝටර් රථයක CFI වටිනාකම විමසා සිටියේය. එවිට ඇය පැවසුවේ එය අ‍ැමෙරිකානු ඩොලර් 21,000ක් පමණ වනු ඇති බවයි.

එසේ නම් එහි දළ වටිනාකම රුපියල් ලක්ෂ 63 කි. එසේ නම් අදාළ ආයතනය පවසන මිලියන 21න් ලක්ෂ 63ක් අඩුවූ පසුව ඉතිරිවන 14,700,000 කට ආසන්න මුදලට සිදුවන්නේ කුමක්ද, ඒ සම්බන්ධයෙන් ආදායම් බදු දෙපාර්තමේන්තුවට තොරතුරු වාර්තා වනවාද යන්න පිළිබඳව ද සැක මතුවෙයි.

වාහන ගෙන්වීමේදී අක්‍රමිකතා වෙලා – හර්ෂ

මේ අතර, විදෙස් ශ්‍රමිකයන් සඳහා විද්‍යුත් වාහන එකසිය පනහක් ගෙන්වීමේදී අක්‍රමිකතා රැසක් සිදුවී ඇති බව, රජයේ මුදල් පිළිබඳ පාර්ලිමේන්තු කාරක සභාවේ සභාපති මන්ත්‍රී ආචාර්ය හර්ෂද සිල්වා මහතා පාර්ලිමේන්තුවේදී කීය. 

ඒ මහතා එසේ කියා සිටියේ පසුගිය අප්‍රේල් 01 වැනිදා රජයේ මුදල් පිළිබඳ පාර්ලිමේන්තු කාරක සභාවේ වාර්තාවක් ඉදිරිපත් කරමිනි.

මේ සම්බන්ධයෙන් නිලධාරීන් පාර්ලිමේන්තු කමිටුව නොමග යැවූ බව තහවුරුවහොත් ඔවුන්ට එරෙහිව දැඩි ක්‍රියාමාර්ග ගන්නා බවද ඔහු එහිදී කීය.

මේ පිළිබඳ තවත් තොරතුරු අප ඉදිරියේදී හෙළිකරන්නෙමු.