Connect with us

පුවත්

විදුහල්පති මාරුව මූලික අයිතිවාසිකම් කඩ කරලා – ශ්‍රේෂ්ඨාධිකරණය 

Published

on

2016 වසරේ නක්කාවත්ත ජාතික පාසලේ විදුහල්පතිවරිය වශයෙන් කටයුතු කළ කේ. ඩී. බන්දුලානි බස්නායක මහත්මිය රාජ්‍ය සේවා කොමිසමේ රීතීන්ට පටහැනිව කිසිදු හේතුවක් නොදන්වා පළාත් අධ්‍යාපන දෙපාර්තමේන්තුවට මාරු කර හැරීම තුළින් අධ්‍යාපන අමාත්‍යාංශයේ ලේකම්වරයා ඇයගේ මූලික අයිතිවාසිකම් උල්ලංඝනය කර ඇති බව ශ්‍රේෂ්ඨාධිකරණය තීන්දු කර තිබේ.

එම මූලික මිනිස් අයිතිවාසිකම් උල්ලංඝනය කිරීම වෙනුවෙන් පෙත්සම්කාරියට රුපියල් ලක්ෂයක වන්දියක් හා රුපියල් 50,000ක නඩු ගාස්තුවක් ගෙවීමට පියවර ගන්නා ලෙසත් ශ්‍රේෂ්ඨාධිකරණය විසින් රජයට නියෝග කළේය.

සිය ස්ථාන මාරුව අභියෝගයට ලක්කරමින් අදාළ විදුහල්පතිවරිය විසින් ගොනුකළ පෙත්සමක් විභාග කිරීමෙන් අනතුරුව බුවනෙක අලුවිහාරේ, අචල වෙංගප්පූලි යන විනිසුරුවරුන්ගේ එකඟත්වය ඇතිව ශ්‍රේෂ්ඨාධිකරණ විනිසුරු ජනක් ද සිල්වා මහතා විසින් එම තීන්දුව ප්‍රකාශයට පත් කළේය.

පෙත්සම්කාරිය කියා සිටින්නේ, නක්කාවත්ත ජාතික පාසලේ විදුහල්පතිනිය වශයෙන් පත්වන අවස්ථාවේ එම පාසලේ පරිපාලනය දැඩි අවුල් ජාලයක් බවට පත්ව තිබූ බවත් තමන් දැඩි පරිශ්‍රමයකින් කටයුතු කිරීමෙන් අනතුරුව එම පාසල “ඒ” ශ්‍රේණියේ පාසලක් දක්වා උසස් කිරීමට කටයුතු කළ බවත්ය.

ඉන්පසුව කිසිදු සාධාරණ හේතුවක් නොමැතිව 2016 වසරේ අගෝස්තු මස 10 වනදා රාජ්‍ය සේවා කොමිසමේ අනුමැතිය සහිතව අධ්‍යාපන අමාත්‍යංශයේ ලේකම්වරයා විසින් තමන්ව වයඹ පළාත් අධ්‍යාපන දෙපාර්තමේන්තුවට මාරු කිරීමට කටයුතු කළ බවත් පෙත්සම්කාරිය පවසන්නීය.

පසුව  පුරප්පාඩු වූ විදුහල්පති තනතුර සඳහා රෝහණ කරුණාරත්න නැමැත්තෙකු පත් කෙරුණු බවත් පෙත්සම්කාරිය කියා සිටියාය.

කිසිදු සාධාරණ හේතුවක් නොමැතිව තමන්ට ස්ථාන මාරුවීමක් ලබා දීමට කටයුතු කෙරුණු බව චෝදනා කරන පෙත්සම්කාරිය රෝහණ කරුණාරත්න නමැත්තා අදාළ විදුහලෙහි විදුහල්පති ලෙස පත් කිරීමේ යටි අරමුණින් මෙම මාරු කිරීම සිදුකර තිබෙන බවත් චෝදනා කර සිටී.

නඩු තීන්දුව ප්‍රකාශයට පත් කරමින් ශ්‍රේෂ්ඨාධිකරණය කියා සිටින්නේ, මෙම ස්ථාන මාරුව සිදුකිරීමට පෙර පෙත්සම්කාරියගෙන් ප්‍රකාශයක් සටහන් කරගැනීමට වග උත්තරකරුවන් අසමත් වී ඇති බවත් ඒ තුළින් රාජ්‍ය සේවා කොමිසමේ රීති 221 උල්ලංඝනය වී තිබෙන බවය.

එමෙන්ම අදාළ ස්ථාන මාරුව සම්බන්ධයෙන් හේතු පැහැදිලි කිරීමට වගඋතරකරුවන් අසමත් වී තිබෙන බවත් අධිකරණය සිය තීන්දුවේ සඳහන් කර තිබේ.

මේ තුළින් අධ්‍යාපන අමාත්‍යංශයේ ලේකම්වරයා මූලික මිනිස් අයිතිවාසිකම් උල්ලංඝනය කර තිබෙන බවත් ඒ අනුව අදාළ වන්දි හා නඩු ගාස්තු ගෙවීමට පියවර ගන්නා ලෙසත් රජය වෙත කළ නියෝගය වැඩිදුරටත් සඳහන් වේ.

මෙම පෙත්සමෙහි වගඋත්තරකරුවන් ලෙස අධ්‍යාපන අමාත්‍යංශයේ ලේකම්වරයා ඇතුළු 14 දෙනෙකු නම් කර තිබේ.

(දෙරණ)

පුවත්

උතුරු – නැගෙනහිරට සංවර්ධනයේ ප්‍රතිලාභ දෙන බව ජනපති කියයි

Published

on

By

යුද්ධය නිසා උතුරු නැගෙනහිරට බලපෑ ප්‍රශ්න කඩිනමින් අවසන් කර එම ජනතාවට ද සංවර්ධනයේ ප්‍රතිලාභ ලබා දෙන බව ජනාධිපති රනිල් වික්‍රමසිංහ මහතා පවසයි.

උතුරු පළාත තුළ උසස් මට්ටමේ සෞඛ්‍ය සේවාවක් සහතික කිරීම වෙනුවෙන් යාපනය රෝහල නුදුරේදීම ජාතික රෝහලක් බවට පත් කිරීමට කටයුතු කරන බවත් දකුණු පළාත තුළ පැවති දීර්ඝකාලීන අවශ්‍යතාවයක් ඉටු කරමින් කරාපිටිය රෝහල ජාතික රෝහලක් බවට පත් කිරීමට අදාළ කැබිනට් අනුමැතිය හිමිවී ඇති බවද ජනාධිපතිවරයා සඳහන් කළේය.

ජනපතිවරයා යාපනය විශ්වවිද්‍යාලයේ වෛද්‍ය පීඨයේ ඉදිකළ සායනික පුහුණු සහ පර්යේෂණ අංශ ගොඩනැගිල්ල විවෘත කිරීමේ අවස්ථාවට අද (24) පෙරවරුවේ මේ බව පැවසීය.

මේ අතර “උරුමය ”  වැඩසටහන යටතේ යාපනය දිස්ත්‍රික්කයේ ප්‍රාදේශීය ලේකම් කාර්යාල 15ම ආවරණය වන පරිදි සින්නක්කර ඔප්පු 1,286ක් ජනාධිපති රනිල් වික්‍රමසිංහ මහතා අතින් ජනතාවට ලබාදීම අද යාපනයේදී සිදුකෙරිණි.

එමෙන්ම උතුරු පළාතට අයත් මුලතිව්, කිලිනොච්චිය, වවුනියාව හා මන්නාරම දිස්ත්‍රික්කවලට අදාළව “උරුමය” වැඩසටහන යටතේ සින්නක්කර ඔප්පු 13,858ක් ඉදිරියේදී ලබා දීමට නියමිතව තිබේ.


Continue Reading

පුවත්

පැපුවා නිව් ගිනියාවේ දරුණු  නායයාමක්

Published

on

By

පැපුවා නිව් ගිනියාවේ දුෂ්කර ගම්මාන හයකට බලපෑම් එල්ල කරමින් ඇති වූ නායයෑමෙන් ජීවිත රැසක් අහිමි වී ඇතැයි විදෙස් මාධ්‍ය වාර්තා කර තිබේ.

ඊයේ (23) සිදු වූ මෙම නායයෑමෙන් නිවාස 100කට වැඩි ගණනක් පස්වලින් සම්පූර්ණයෙන්ම යට වී ඇති බව විදෙස් වාර්තාවල දැක්වේ.

මෙහිදී සිදු වී ඇති ජීවිත හානි ගණන හෝ සුන්බුන් අතර කොපමණ පිරිසක් සිරවී ඇති ද යන්න නිශ්චිතවම තවමත් ප්‍රකාශ කළ නොහැකි බවද පැවසේ.

මෙම නායයෑම සිදු වූ  Enga නම් ප්‍රදේශයේ ආණ්ඩුකාරවරයා මාධ්‍යයට පවසා ඇත්තේ මෙය මීට පෙර සිදුනොවූ ස්වභාවික ව්‍යවසනයක් බවය.

එමෙන්ම පැපුවා නිව් ගිනියාවේ අග්‍රාමාත්‍ය James Marape පවසා ඇත්තේ, මළ සිරුරු ගොඩගැනීම සඳහා අවශ්‍ය සහන සේවා සැපයීමට සහ යටිතල පහසුකම් සඳහා අදාළ ස්ථානයට ආපදා නිලධාරීන් යොමු කර ඇති බවය.

Continue Reading

පුවත්

හලාවත ගොල්ෆ් පිටියක් හදන්න සැලසුම් කරයි

Published

on

By

හලාවත ගොල්ෆ් පිටියක් ඉදිකිරීමට සැලසුම් කරන බව කැබිනට් ප්‍රකාශක බන්දුල ගුණවර්ධන මහතා  නිවේදනය කළේය.

ඒ ඉරණවිල හා හලාවත ප්‍රදේශය සංචාරක කේන්ද්‍රස්ථානයක් ලෙස සංවර්ධනය කිරීමේ සමස්ත උපාය මාර්ගයේ කොටසක් ලෙස බවද ඔහු කීය.

මේවන විට ශ්‍රී ලංකාව තුළ දැනටමත් කොළඹ, මහනුවර සහ නුවරඑළියේ ගොල්ෆ් පිටි කිහිපයක් තිබේ.

සිදුරු 18කින් යුත් ගොල්ෆ් පිටි පහක් සහ සිදුරු 9කින් යුත් ‍ගොල්ෆ ක්‍රීඩාංගණ කිහිපයක් ද ශ්‍රී ලංකාව සතුවේ.

ගොල්ෆ් පිටියට අමතරව හලාවත සහ බිංගිරිය අතර සම්බන්ධක මාර්ගයක් ඉදිකෙරෙන අතර ඉන් අපනයන කලාපයක් පුළුල් කරන බව ද අමාත්‍ය ගුණවර්ධන මහතා පවසයි.

හලාවත – ඉරණවිල සංචාරක මධ්‍යස්ථානයේ සංවර්ධන කටයුතු බිංගිරිය ඒකාබද්ධ සංවර්ධන සැලැස්මට සම්බන්ධ කාර්ය සාධක බලකායක් මගින් අධීක්ෂණය කිරීමට නියමිත බවද පැවසේ.

Continue Reading
Advertisement

Trending

Copyright © 2023 Sri Lanka Mirror. All Rights Reserved