ශ්‍රීලන්කන් ගුවන් සේවා සත්කාරක කාර්ය මණ්ඩල (cabin crew) සාමාජිකයන්ගේ සංගමය අකුරට වැඩ කිරීමේ ව්‍යාපාරයක් දියත් කර ඇති බැවින් වහාම ක්‍රියාත්මක වන පරිදි එම ක්ෂේත්‍රයේ පළපුරුද්දක් සහිත විශ්‍රාමිකයින් සේවයට කැඳවීමට ශ්‍රී ලන්කන් පාලනාධිකාරිය තීරණය කර ඇතැයි වාර්තා වේ.
ආහාර දීමනාව නැවත ලබාදීම ඇතුළු ඉල්ලීම් කිහිපයක් මුල් කරගනිමින් ගුවන් සේවා සත්කාරක කාර්ය මණ්ඩලය අප්‍රේල් මාසයේදී මෙම අකුරට වැඩ කිරීමේ ව්‍යාපාරය දියත් කර අඅති බව පැවසේ.
ශ්‍රීලන්කන් ගුවන් සේවා සත්කාරක කාර්ය මණ්ඩලය මේවනවිට සිය සේවා සපයනු ලබන්නේ අඩු කාර්ය මණ්ඩලයක් සමගින් බවද වාර්තා වේ.
ඊට හේතුවී ඇත්තේ, ශ්‍රීලන්කන් ගුවන් සේවා සත්කාරක කාර්ය මණ්ඩලයේ සිටි පළපුරුදු ජ්‍යෙෂ්ඨ කාර්ය මණ්ඩල සාමාජිකයින් විශාල පිරිසක් පසුගියදා විශ්‍රාම ගන්වනු ලැබීම නිසාය.
ඒ, වයස 60ට වැඩි කිසිවකු ආයතනයේ රඳවා නොගන්නා බවට දැනුම් දෙමින් එම විශ්‍රාම ගැන්වීම සිදුකර ඇත.
තම සේවා වයස් සීමාව දීර්ඝ කර ගැනීමට ඔවුන් ආයතනයේ කළමනාකාරිත්වය සමග දිගින් දිගටම සාකච්ජා කලද එය පලරහිත වූ බවද පැවසේ.
එම තත්වය තුල එම පිරිස ජනාධිපති අනුර කුමාර දිසානායක මහතා දැනුවත් කරමින් පසුගිය (2024) දෙසැම්බර් 12 දා ලිඛිත ඉල්ලීමක් කර ඇතත් මේ දක්වා ඒ සම්බන්ධයෙන් නිසි ප්‍රතිචාරයක් ලැබී නොමැත.
විශ්‍රාම යාමට ආසන්නව සිටි එම සේවකයින් ජනාධිපතිවරයා වෙත යොමුකර තිබු ලිපියේ මෙසේ සඳහන්ව තිබේ.
ජනාධිපතිතුමනි,
ශ්‍රී ලංකන් ගුවන් සේවයේ, ගුවන් සේවා සත්කාරක කාර්ය මණ්ඩලයේ ( Cabin Crew ) විශ්‍රාමික වයස දීර්ඝ කර ගැනීම.
ශ්‍රී ලංකන් ගුවන් සේවය, ගෞරවනීය තලයකට ඔසවා තබන්නට දශක ගණනාවක් තිස්සේ කැප වූ සේවක සමුහයක් වන අප, ඔබේ කාරුණික අවධානය සඳහා මෙම ලිපිය ඉදිරිපත් කරමු.
වර්ථමාන ගෝලීය ප්‍රවණතා හඳුනාගත් බොහෝ ජාත්‍යන්තර ගුවන් සමාගම්, වඩාත් උත්කෘෂ්ට ප්‍රතිලාභ ලබාගන්නා අටියෙන්, විශේෂඥ දැනුමින් හා පළපුරුද්දෙන් පරිපූර්ණ ගුවන් සේවක කාර්ය මණ්ඩල සාමාජිකයින්ගේ සේවා කාලය දීර්ඝ කරයි. මේ ප්‍රවණතාවයේ පිහිටමින් ශ්‍රී ලංකන් ගුවන් සමාගමද, සිය ගුවන් නියමුවන්ගේ විශ්‍රාමික වයස අවුරුදු 65 දක්වාත්, ශ්‍රී ලංකා සිවිල් ගුවන් සේවා අධිකාරිය තම සේවකයින්ගේ විශ්‍රාමික වයස අවුරුදු 62 දක්වාත් දීර්ඝ කරමින් පූර්වාදර්ශයක් සපයා තිබීම අපගේ ප්‍රශංසාවට හේතු වෙයි.
මෙම ලිපිය ඔබ වෙත යොමු කරන අප, ශ්‍රී ලන්කන් ගුවන් සේවයේ, සාම්ප්‍රදායික විශ්‍රාම වයස වන, වසර 60 ආසන්නයට පැමිණ සිටින්නෝ පිරිසක් වෙමු. එසේ, ජ්‍යෙෂ්ඨ පුරුවැසි කඩ ඉමට ආසන්නයේ සිටියද, අප බහුතරය ඉතා විශිෂ්ට සෞඛ්‍ය තත්ත්වයේ පසුවන්නෝ වෙමු. අපගේ යෞවනය සහ වැඩිහිටි ජීවිතය, ගුවන් සේවයේ උන්නතිය වෙනුවෙනුත්, සමාගමේ කීර්ති නාමය ආරක්ෂා කරගැනීම වෙනුවෙනුත්, අත්‍යන්තයෙන් කැප කළ පිරිසක් වෙමු.
අපගේ විශ්‍රාමික වයස අවුරුදු 65 දක්වා දීර්ඝ කිරීම මගින්, ශ්‍රී ලංකන් ගුවන් සමාගමට, සිය මෙහෙයුම් හැකියාවන් ප්‍රවර්ධනය කරගැනීමටත්, ජාත්‍යන්තර මට්ටමේ සංචාරක ගමනාන්තයක් ලෙස මෙරට ඔසවා තැබීමේ කාර්යයටත් ඉමහත් පිටුබලයක් වන්නට හැකි වෙනවා නොඅනුමානයි.
අප ජ්‍යෙෂ්ඨ කාර්ය මණ්ඩලයේ වැටුප, පවතින ව්‍යුහය තුලම ස්ථානගත වෙන නිසා සමාගමට අමතර පිරිවැයක් දරන්නට සිදු නොවෙයි. තරුණ කාර්ය මණ්ඩලයට අපගේ උපදේශනය සහ මගපෙන්වීම මහත් අස්වැසිලක් වෙන අතර, සමාගම කෙරේ පක්ෂපාතිත්වය සහ සංවිධාන ශක්තිය වැඩි කරයි.
එමිරේට්ස්, සිංගප්පූර් එයාර්ලයින්ස්, කටාර් සහ එටි හැඩ් වැනි ජාත්‍යන්තරව වැජඹෙන ගුවන් සමාගම්, අපගේ පළපුරුදු වෘත්තිකයන් ඉහල වැටුප් ගෙවමින් ඔවුන්ගේ සේවාවන්ට අනුයුක්ත කරගන්නා වග නොරහසක්. ගුවන් යානා සත්කාරක කාර්ය මණ්ඩලය, ඉංජිනේරුවන්, කාර්මික ශිල්පීන් සහ අනෙකුත් සියළුම ආකාරයේ පෙරටුගාමී කාර්ය මණ්ඩල සාමාජිකයින්, ශ්‍රී ලංකන් ගුවන් සේවයේ ශ්‍රම බලකාය තුල රඳවා තබා ගැනීම, සමාගමේ සාර්ථකත්වයට මෙන්ම, ආගන්තුක සත්කාරයේ ප්‍රමුඛයා ලෙස, ජාතියේ කීර්ති නාමය ආරක්ෂා කරගැනීම සඳහාත් ප්‍රයෝජනවත් වෙයි.
මෙම කාලීන යෝජනාව සලකා බලා, අපට සාර්ථක පිළිතුරක් ලබාදෙනු ඇතැයි අප උදක්ම විශ්වාස කරමු. ”
