මෑතකදී කොටහේන ප්‍රදේශයේ සිදුවූ රිය අනතුරක් සම්බන්ධයෙන් පොලිසිය කඩිනමින් කටයුතු කර සිරිල් ගාමිණී පියතුමාට ඇප ලබාදීම පිළිබඳව ඔහු බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පතිවරයා ලෙස කටයුතු කළ දේශබන්දු තෙන්නකෝන් මහතාට ස්තූතිය පළකර ඇතැයි මහජන ආරක්ෂක ඇමැති ටිරාන් අලස් මහතා කියයි.

අමාත්‍යවරයා මේ බව කියා සිටියේ ජනාධිපති මාධ්‍ය කේන්ද්‍රයේ ඊයේ (21) පැවැති මාධ්‍ය හමුවකදීය.

පසුගිය දිනකදී කොටහේන ප්‍රදේශයේ රිය අනතුරක් සිදුවී තිබෙන බවත්, මෝටර් රථයක් යතුරු පැදියක ගැටීමෙන් එහි ගමන්ගත් පුද්ගලයාට තුවාල සිදුවීම නිසා මෝටර් රථය පැදවූ සිරිල් ගාමිණී පියතුමා පොලිස් භාරයට ගත් බවද ඇමැතිවරයා කීවේය.

මෙහිදී, කාදිනල්තුමා ළඟ සිටි පුද්ගලයෙකු ජ්‍යෙෂ්ඨ නියෝජ්‍ය පොලිස්පතිවරයාට දුරකථන ඇමතුමක් ලබාදී සිරිල් ගාමිණී පියතුමා පොලිස් භාරයට ගැනීම පිළිබඳ සොයා බලන ලෙස ඉල්ලා ඇතැයිද ඇමැතිවරයා කීවේය.

පොලිසිය සිරිල් ගාමිණී පියතුමාට පොලිස් ඇප දීමෙන් පසු ඔහු බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පතිවරයාට ස්තූතිය පළකර ඇතැයිද ඇමැතිවරයා පැවසීය.

වැඩ බලන පොලිස්පතිවරයා ලෙස දේශබන්දු තෙන්නකෝන් පත්කිරීම පිළිබඳ කාදිනල් හිමි එල්ල කරන චෝදනා සම්බන්ධයෙන් මාධ්‍යවේදියෙකු විමසූ අවස්ථාවේදී ඇමැතිවරයා මේ බව පැවසීය.

බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පතිවරයා ලෙස කටයුතු කරද්දී දේශබන්දු තෙන්නකෝන් මහතා විසින් ගැලනිගම ප්‍රදේශයේදී ලොරියක් නිදහස් කිරීම පිළිබඳ සිරිල් ගාමිණී පියතුමා මෙම මාධ්‍ය හමුවේදී චෝදනා කර තිබෙන බවද ඇමැතිවරයා කීවේය.

චීනයෙන් ආනයනය කරන ලද මාළු රැගෙන ගිය මෙම ලොරිය රේගුව විසින් නිදහස් කර ඇත්තේ අදාළ සියලු ලේඛන තිබීම නිසා බවත්, එම ලොරිය හොරණ නිරෝධායන මධ්‍යස්ථානයකට රැගෙන යද්දී පොලිසිය නතර කර පරීක්ෂා කර තිබෙන බවත් ඇමැතිවරයා කීවේය. 

මෙම ලොරියේ පණ තිබෙන මාළු සිටින බැවින්, එහි ඔක්සිජන් අවසන් වීමට පෙර ලොරිය පරීක්ෂාකර නිදහස් කරන ලෙස ලොරියේ අයිතිකරුවන් ජ්‍යෙෂ්ඨ නියෝජ්‍ය පොලිස්පතිවරයාගෙන් ඉල්ලීමක් කර තිබූ බවද ඔහු කීවේය. 

ඒ අනුව, පරීක්ෂණ කඩිනමින් අවසන් කර මාළු ලොරිය නිදහස් කර ඇතැයිද මෙවැනි ඉල්ලීම් ඕනෑම අයකු විසින් සිදුකරන බවද ඔහු පැවසීය