මිහින්තලේ මරදන්කුලම ප්‍රදේශයේ මිහින්තලේ රක්ෂිත වනය නමින් හඳුන්වන ප්‍රදේශයේ අක්කර 18ක් එළිපෙහෙළි කර ඉන් අක්කර 6ක් ගිනි තබා විනාශ කර නීති විරෝධීව අත්පත් කර ගැනීමට උත්සාහ දරන විත්තිකාර ව්‍යාපාරිකයාට එරෙහිව අධිකරණය හමුවේ නඩු පවරන ලෙස අනුරාධපුර අතිරේක මහේස්ත්‍රාත් කංචනා නර්තනා අභිමානි සෙනවිරත්න මෙනෙවිය අනුරාධපුර අඩවි වන නිලධාරි සුමිත් සුවාරිස් මහතාට නියෝග කළාය.

වන සංරක්ෂණ දෙපාර්තමේන්තුව පවසන පරිදි අදාළ ප්‍රශ්නගත ඉඩම සඳහා සකස් කර ඇති බලපත්‍ර හතරම ව්‍යාජ ඒවා නම් ඒ සම්බන්ධයෙන් අනුරාධපුර විශේෂ අපරාධ විමර්ශන අංශයට පැමිණිලි කර ඉදිරි නීතිමය ක්‍රියාමාර්ග ගන්නා ලෙසට ද අතිරේක මහේස්ත්‍රාත්වරිය අඩවි වන නිලධාරි සුමිත් සුවාරිස් මහතාට තවදුරටත් නියෝග කරන ලදී.

අනුරාධපුර අතිරේක මහේස්ත්‍රාත්වරිය මෙසේ නියෝග කළේ මිහින්තලේ ප්‍රාදේශීය ලේකම් කොට්ඨාසයේ අංක 586 ග්‍රාම නිලධාරි තුලානේ පිහිටි මරදන්කුලම ප්‍රදේශයේ මිහින්තලේ රක්ෂිත වනය නමින් හඳුන්වන ප්‍රදේශයේ අක්කර 18ක් නීති විරෝධීව එළිපෙහෙළි කර ඉන් අක්කර 6ක් ගිනි තබා විනාශ කර අදාළ රක්ෂිත භූමිය නීති විරෝධීව අත්පත් කර ගැනීමට උත්සාහ දරන බවට විත්තිකාර ව්‍යාපාරිකයකුට එරෙහිව අනුරාධපුර අතිරේක මහේස්ත්‍රාත් අධිකරණය හමුවේ පවතින බී/123/2024 අංක දරන නඩුව අනුරාධපුර අතිරේක මහේස්ත්‍රාත් අධිකරණය හමුවේ කැඳවූ අවස්ථාවේදීය.

මෙම සිද්ධිය සම්බන්ධයෙන් අධිකරණයට කරුණු දක්වමින් වන සංරක්ෂණ දෙපාර්තමේන්තුවේ අනුරාධපුර අඩවි වන නිලධාරි සුමිත් සුවාරිස් මහතා කියා සිටියේ මිහින්තලේ ප්‍රාදේශීය ලේකම් කොට්ඨාසයේ මිහින්තලේ මරදන්කුලම පිහිටි මිහින්තලේ රක්ෂිත වනය නමින් හඳුන්වන ප්‍රදේශයේ අක්කර 18ක භූමියක් විත්තිකාර ව්‍යාපාරිකයා විසින් නීති විරෝධීව අල්ලාගෙන ඉන් අක්කර 6ක් ගිනි තබා විනාශ කර ඇති බවයි.

එකී භූමිය සඳහා තමන්ට බලපත්‍ර 4ක් ඇති බව පවසමින් විත්තිකරු බලපත්‍ර 4ක් ඉදිරිපත් කර ඇති බව ද අධිකරණයට කියා සිටි අඩවි වන නිලධාරිවරයා එකී බලපත්‍රවල නීත්‍යනුකූලභාවය සම්බන්ධයෙන් වන සංරක්ෂණ අධ්‍යක්ෂ ජනරාල්වරයා මිහින්තලේ ප්‍රාදේශීය ලේකම්වරයාගෙන් ලිඛිතව විමසීමක් කළ බව ද කියා සිටියේය. 

විත්තිකරු විසින් ඉදිරිපත් කර ඇති බලපත්‍රවලට අදාළ කිසිදු සටහනක් හෝ ලේඛනයක් මිහින්තලේ ප්‍රාදේශීය ලේකම් කාර්යාලය සතුව නැති බව මිහින්තලේ ප්‍රාදේශීය ලේකම් එන්.බී.ජේ.ඒ. නායක බණ්ඩාර මහතා වෙනුවෙන් සහකාර ප්‍රාදේශීය ලේකම් එම්.එම්.කේ. චන්ද්‍රගුප්ත මහතා වන සංරක්ෂණ අධ්‍යක්ෂ ජනරාල්වරයාට ලිඛිතව දන්වා ඇති බව ද අඩවි වන නිලධාරිවරයා ප්‍රකාශ කළේය.

විත්තිකරු විසින් ඉදිරිපත් කර ඇති බලපත්‍ර 4 අතුරින් එක් බලපත්‍රයකට තබා ඇති අත්සන අනුරාධපුර හිටපු මහ දිසාපති ටී.කේ. දසනායක මහතාගේ බව කියන අත්සනක් බව ද අධිකරණයට ප්‍රකාශ කළ අඩවි වන නිලධාරිවරයා එකී අත්සන ද අනුරාධපුර හිටපු මහ දිසාපති ටී.කේ. දසනායක මහතාගේ නොවන බවට මිහින්තලේ හිටපු ප්‍රාදේශීය ලේකම් සිරිමෙවන් ධර්මසේන මහතා වන සංරක්ෂණ අධ්‍යක්ෂ ජනරාල්වරයාට ලිඛිතව දන්වා ඇති බව ද අවධාරණය කළේය. 

ඒ අනුව විත්තිකරු විසින් ඉදිරිපත් කර ඇති ඉඩම් බලපත්‍ර හතරම ව්‍යාජව සකසන ලද කූට ඒවා බවට සැක කරන්නේ යැයිද? අඩවි වන නිලධාරිවරයා කීවේය. මෙම සිද්ධිය සම්බන්ධයෙන් චෝදනා ලබා සිටින ව්‍යාපාරිකයා දැනට අධිකරණය මඟින් ඇප මත මුදාහැර සිටී. මෙසේ ඇප මත මුදාහැර සිටිනුයේ අනුරාධපුර තම්මැන්නාකුලම ඉසුරුපුර අංක 246/20 ලිපිනයේ ඔලුපොතගේ සුමින්ද සේනාධීර නමැත්තෙකි. 

පැමිණිල්ල වෙනුවෙන් වන සංරක්ෂණ අධ්‍යක්ෂ ජනරාල් මහතාගේ උපදෙස් මත අනුරාධපුර අඩවි වන නිලධාරි සුමිත් සුවාරිස් මහතා පෙනී සිටි අතර, විත්තිකරු වෙනුවෙන් නීතිඥ සුසිල් සිරිවර්ධන මහතා පෙනී සිටියේය. 

අනුරාධපුර අඩවි වන නිලධාරි සුමිත් සුවාරිස් මහතාගේ මෙහෙයවීම මත අනුරාධපුර අතිරේක අඩවි වන නිලධාරි චින්තානි ගුණසේකර මහත්මිය මිහින්තලේ බීට්ටු වන නිලධාරි චමින්ද ඒකනායක, බීට්ටු වන නිලධාරින් වන කේ.එම්. තුෂාර නලින්ද, වන ක්ෂේත්‍ර සහකාර එච්.බී. සුගත් යන මහත්වරුන් සහ විශේෂ කාර්ය බළකා කඳවුරේ අණ දෙන නිලධාරි ප්‍රධාන පොලිස් පරීක්ෂක බී.ඒ.එස්. බුලත්සිංහල මහතා ඇතුළු විශේෂ බළකා නිලධාරීන් කණ්ඩායමක් මෙම වැටලීම සිදු කර තිබිණි. 

මෙම නඩුව ලබන ජුනි මස 26 වැනිදා යළි කැඳවීමට නියමිතය.

(dinamina.lk)

මැයි මස 08 වැනි දින අධිකරණය හමුවේ පෙනී සිට කරුණු දක්වන ලෙස දන්වා අභියාචනාධිකරණය විසින් හිටපු පාර්ලිමේන්තු මන්ත්‍රී හිරුණිකා ප්‍රේමචන්ද්‍ර  වෙත නොතීසි නිකුත් කර තිබේ.

ඒ, ගල්කිස්ස මහේස්ත්‍රාත් අධිකරණය විසින් ලබා දුන් නියෝගයක් විවේචනය කිරීම තුළින් අධිකරණයට අපහාසයක් සිදුකර ඇතැයි චෝදනා කරමින් ඉදිරිපත් කර තිබෙන පෙත්සමක් සම්බන්ධයෙනි.

දේශීය හෝ විදේශීය පාර්සල ලැබීමක් දක්වා ශ්‍රී ලංකා තැපෑල කිසිදු SMS පණිවුඩයක් ගනුදෙනුකරුවන් වෙත යැවීමක් සිදු කරන්නේ නැති බව ශ්‍රී ලංකා තැපැල් දෙපාර්තමේන්තුව විසින් නිවේදනයක් නිකුත් කරමින් සඳහන් කරයි.

තැපැල්පති  එස්. ආර්.ඩබ්.එම්. ආර්.පී. සත්කුමාර මහතා කියා සිටියේ, වංචනිකව සකස් කළ වෙබ් අඩවියක් සහ උපක්‍රමිකව සකස් කර ගත් ව්‍යාජ ජංගම දුරකතන  අංක යොදා ගනිමින් මහජනතාව රවටන වංචාවක් මේ වනවිට ක්‍රියාත්මක බවය.

ශ්‍රී ලංකා තැපෑල, ශ්‍රී ලංකා තැපැල් දෙපාර්තමේන්තුව ආදී නම් යොදා ගනිමින් ශ්‍රී ලංකා තැපැල් දෙපාර්තමේන්තුවේ නිල වෙබ් අඩවියද උපක්‍රමිකව වංචාවක් සඳහා යොදා ගැනීම  සිදු වෙමින් පවතින බව තැපැල්පතිවරයා පෙන්වා දෙයි.  

ශ්‍රී ලංකා තැපැල් දෙපාර්තමේන්තුව කෙටි පණිවුඩ (SMS) මගින් ණය කාඩ්පත් (Credit Card)  තොරතුරු විමසීමක් කිසිසේත් සිදු නොකරන අතර ණය කාඩ්පත් මගින් පාර්සල් සම්බන්ධ කිසිදු ගණුදෙනුවක් සිදු නොකෙරේ. 

මහජනතාව වෙත ලැබෙන කෙටි පණිවුඩයක් සඳහා සිය ණය කාඩ්පත් දත්ත වෙබ් අඩවියකට හෝ කෙටි පණිවුඩයක් මගින් හෝ වෙනත් කිසිදු ආකාරයකින් ලබා දීම සිදු නොකරන ලෙස ජනතාවගෙන් ඉල්ලා සිටින බවද හෙතෙම පෙන්වා දෙයි.

මේ සම්බන්ධයෙන් වැඩිදුර තොරතුරු දැන ගැනීම සඳහා පහත දුරකතන අංක වලින් විමසීම් කල හැකිය

තැපැල් දෙපාර්තමේන්තුවේ උපකාරක සේවාව -1950

තොරතුරු තාක්ෂණ අංශය – 011 2542104 /0112334728/ 0112335978/ 0112687229/ 0112330072