මියන්මාරයේ වංචනික සයිබර් ව්‍යාපාරවල බලහත්කාර සාපරාධී ක්‍රියාකාරකම් සිදු කිරීමේ ජාවාරම්වලට ගොදුරු වූ ශ්‍රී ලාංකිකයන් අට දෙනකු ආපසු සියරට ගෙන්වා ගැනීම සඳහා විදේශ කටයුතු අමාත්‍යාංශය, මියන්මාරයේ සහ තායිලන්තයේ ශ්‍රී ලංකා දූත මණ්ඩල සමඟ සම්බන්ධීකරණයෙන් යුතුව, සාර්ථකව පහසුකම් සැලසීය.  

 ශ්‍රී ලංකා රජය විසින් කරන ලද ඉල්ලීම අනුව නීතිය බලාත්මක කිරීමේ මියන්මාර බලධාරීන් විසින් 2024 අප්‍රේල් 4 වැනි දින මෙම ශ්‍රී ලාංකිකයන් මුදාගන්නා ලදී. බැංකොක් නුවර ශ්‍රී ලංකා තානාපති කාර්යාලයේ නිලධාරීන් විසින් 2024 අප්‍රේල් 11 වැනි දින තායිලන්තයේ මෑසොට් දේශසීමා ද්වාරයේදී ඔවුන් භාරගනු ලැබිණි. ඉන් අනතුරුව බැංකොක් නුවර වෙත කැඳවාගෙන එනු ලැබූ ඔවුන්, සංක්‍රමණය පිළිබඳ ජාත්‍යන්තර සංවිධානයේ සහය ඇතිව ආපසු සියරට පිටත් කරවා හැරීමට කටයුතු සම්පාදනය කරන තෙක් නවාතැන් පහසුකම් සපයනු ලැබිණි.

සංක්‍රමණය පිළිබඳ ජාත්‍යන්තර සංවිධානය මුදාගත් ශ්‍රී ලාංකිකයන් ආපසු සියරට පිටත් කරවා හැරීම සඳහා සහය ලබා දිණි. ඔවුන් ජාවාරම්කරුවන්ගෙන් මුදවා ගනු ලැබ මියවඩි පොලිස් ස්ථානයේ තාවකාලිකව රැඳී සිටි කාලය තුළදී, මියන්මාරයේ පිහිටි ඊඩ්න් පදනම නමැති පුණ්‍යායතනය මඟින්, මියන්මාරයේ ශ්‍රී ලංකා තානාපති කාර්යාලය විසින් ඔවුන්ට ආහාර සහ අනෙකුත් අවශ්‍යතා සපයනු ලැබිණි.

අදාළ පාර්ශ්වකරුවන් සමඟ සහයෝගයෙන් යුතුව විදේශ කටයුතු අමාත්‍යාංශයේ ප්‍රදුත අංශය මෙම පිරිස ආපසු සියරට ගෙන්වා ගැනීමේ ක්‍රියාවලිය සම්බන්ධීකරණය කළ අතර, එම අමාත්‍යාංශයේ ප්‍රදුත අංශයේ අධ්‍යක්ෂ ජනරාල් ඒ.එස්.කේ.සෙනවිරත්න මහතා බණ්ඩාරනායක ජාත්‍යන්තර ගුවන් තොටුපළේදී මෙම ශ්‍රී ලාංකිකයන් අට දෙනා පිළිගත්තේය. තමන් ශ්‍රී ලංකාව වෙත ආරක්ෂිතව නැවත පැමිණීම සහතික කිරීම සඳහා විදේශ කටයුතු අමාත්‍යාංශය විසින් දරනු ලැබූ අඛණ්ඩ ප්‍රයත්න පිළිබඳව මෙම ශ්‍රී ලාංකිකයෝ සිය ඉමහත් ප්‍රසාදය පළ කළහ.

මේ සම්බන්ධයෙන් ලබාදුන් සහය වෙනුවෙන් මියන්මාර සහ තායිලන්ත රජයන්ට මෙන්ම සංක්‍රමණය පිළිබඳ ජාත්‍යන්තර සංවිධානය ඇතුළු අනෙකුත් පාර්ශ්වකරුවන්ට විදේශ කටයුතු අමාත්‍යාංශය සිය අවංක කෘතඥතාව පළ කරයි.  

(විදේශ කටයුතු අමාත්‍යාංශය)

ඩයලොග් ආසිආටා පීඑල්සී (“Dialog”), ආසිආටා බර්හාඩ් සමූහය (“Axiata”) සහ භාරතී එයාර්ටෙල් සමාගම (“Bharti Airtel”) (යන “පාර්ශ්ව”) ශ්‍රී ලංකාවේ තම මෙහෙයුම් ඒකාබද්ධ කිරීමට අදාළ නිශ්චිත ගිවිසුම්, අත්සන් කර තිබේ.

මේ යටතේ භාරතී එයාර්ටෙල් සමාගමේ සමස්ත කොටස් නිකුතුව ඩයලොග් සමාගම විසින් අත්පත් කරගනු ලැබේ. ඒ සඳහා, Dialog සමාගමේ කොටස් ප්‍රමාණයෙන් 10.355% ක ප්‍රමාණයක් භාරතී එයාර්ටෙල් සමාගම වෙත ඡන්ද අයිතිය හිමි සාමාන්‍ය කොටස් හරහා නිකුත් කිරීමට නියමිතයි. 

මෙම ගිවිසුම ක්‍රියාත්මක කිරීම සඳහා ඩයලොග් සමාගමේ කොටස් හිමියන්ගේ අනුමැතිය සහ කොළඹ කොටස් හුවමාරුවේ (CSE) නිෂ්කාෂණ හා අනෙකුත් නියාමන ක්‍රියාවලීන්ද, කොටස් විකුණුම් ගිවිසුමෙහි සඳහන් නිශ්චිත කොන්දේසිද සපුරාලිය යුතු වෙයි.

දිවයිනේ විදුලි සංදේශ ක්ෂේත්‍රයෙහි උන්නතිය වෙනුවෙන් ඇති ඉදිරි දැක්මට අනුකූලව ශ්‍රී ලංකා විදුලි සංදේශ නියාමන කොමිෂන් සභාව (TRCSL), සමාගම් දෙක අතර මෙම යෝජිත ඒකාබද්ධ කිරීම සඳහා අනුමැතිය ලබා දී ඇත.

පාරිසරිකව සිදු කරන වැරදි සම්බන්ධයෙන් තොරතුරු ලබා දීම සඳහා විශේෂ දුරකථන අංකයන් හඳුන්වා දී තිබේ.  

ඒ 1997 සහ 1981 යන කෙටි දුරකථන අංකයි.

කැනීම් සිදුකිරීම, ගං ඉවුරු කාදනය සිදුකිරීම, කර්මාන්තශාලා අපද්‍රව්‍ය බැහැර කිරීම, පරිසර විනාශයන් ඇතුළු සියලුම පාරිසරිකව සිදුකරන හානි පිළිබඳව මෙම දුරකථන අංකය ඔස්සේ දැනුම් දීමේ හැකියාව ඇත.