විදේශ කටයුතු අමාත්‍යාංශයේ ප්‍රදූත (කොන්සියුලර්) අංශය, 2024 මැයි මස 02දා සිට ක්‍රියාත්මක වන පරිදි බත්තරමුල්ල, ශ්‍රී සුභූතිපුර පාරේ පිහිටි “සුහුරුපායේ” 16 වැනි මහලෙහි ඇති නව කාර්යාල පරිශ්‍රය වෙත රැගෙන යනු ඇති බව එම අමාත්‍යංශය පවසයි. 

සඳුදා සිට සිකුරාදා තෙක් පෙ.ව. 8.30 සිට ප.ව. 4.15 දක්වා සාමාන්‍ය කාර්යාල වේලාව තුළ මෙම නව කාර්යාල පරිශ්‍රයේ සිට මහජනතාවට කොන්සියුලර් සේවාවන් සැපයෙනු ඇතැයි විදේශ කටයුතු අමාත්‍යාංශය විසින් නිකුත් කළ මාධ්‍ය නිවේදනයක දැක්වේ.

එම නිවේදනයේ වැඩිදුරටත් මෙසේද දැක්වේ :සුහුරුපායේ පිහිටි නව කාර්යාල පරිශ්‍රය වෙත ඉලෙක්ට්‍රොනික ලේඛන සත්‍යාපන පද්ධතිය (e-DAS) මාරු කිරීමේ කටයුතුවලට පහසුකම් සලසනු පිණිස  2024 අප්‍රේල් මස 29 සහ 30 යන දෙදින තුළ, ප්‍රදූත අංශයෙන් මහජනතාවට සැපයෙන සත්‍යාපන සේවා තාවකාලිකව අත්හිටවනු ලැබේ.

කෙසේවුවද, ඉහත කී  සංක්‍රාන්ති කාලය ඇතුළත යාපනය, ත්‍රිකුණාමලය, කුරුණෑගල, මහනුවර සහ මාතර යන නගරවල පිහිටි ප්‍රාදේශීය ප්‍රදූත කාර්යාල සාමාන්‍ය කාර්යාල වේලාවන්හි මහජනතාවට විවෘතව පවතියි. ලේඛන සත්‍යාපනය සඳහා වූ අයැදුම්පත් සාමාන්‍ය පරිදි මෙම ප්‍රාදේශීය කාර්යාල වෙත ඉදිරිපත් කළ හැකි අතර සත්‍යාපනය කරනු ලැබූ ලේඛන යළි අයැදුම්කරුවන්/කාරියන් වෙත ලබා දෙනුයේ 2024 මැයි 02 වැනි බ්‍රහස්පතින්දා දින පමණි.

සිදුවිය හැකි කිසියම් අපහසුතාවන් මඟහරවා ගැනීම සඳහා, සත්‍යාපනය කිරීම පිණිස යම් හදිසි ලේඛන ඇතොත් ඒවා 2024 අප්‍රේල් මස 26 වැනි දින ප.ව. 4.15 ට පෙර කොළඹ පිහිටි ප්‍රදූත අංශයට හෝ ඕනෑම ප්‍රාදේශීය ප්‍රදූත කාර්යාලයකට හෝ භාරදෙන ලෙසද මහජනතාවට මෙයින් දැනුම් දෙනු ලැබේ.

යුද හමුදාවේ හා ශ්‍රී ලංකා ඔටෝමෝබයිල් සංගමයේ සංවිධානයෙන් පසුගිය 21 දා පැවති නරියාකන්ද සුපර් ක්‍රොස් මෝටර් රථ ධාවන තරගාවලියේ සිදුවූ මාරක රිය අනතුරින් පසු තරගාවලිය නතර කර දැමුණද එදින රාත්‍රියේ සංවිධායකයන් විසින් ගාලා විනෝද සැණකෙලියක් හා සංගීත ප්‍රසංගයක් පවත්වා තිබේ.

මේ පිළිබඳව අදහස් දක්වන බොහෝ දෙනා පවසන්නේ තරග අවලංගු කළද හත් දෙනෙකුට මරු කැඳවමින් තවත් 21 දෙනෙකුට තුවාල සිදු කරවමින් සිදුවූ ඛේදවාචකය පැය කිහිපයකදී අමතක කොට ආෆ්ටර් පාටි සැණකෙළි ස්වරූපයෙන් පැවැත්වීම අනුමත කළ නොහැකි බවයි. 

මෙම අනතුරේ වරද මෝටර් රථ රියදුරන් දෙදෙනා පිට පැවරීමට මේ වන විට සංවිධායකයන් කටයුතු කරන නමුත් මෝටර් රථ තරගයක් අතර තුර සිදු වන මෙවැනි අනතුරකට රියදුරන්ට එරෙහිව නීති මගින් කටයුතු කළ නොහැකි බව නීති විශාරදයෝ පෙන්වා දෙති. 

මෙවැනි අනතුරක් සිදුව ඇත්තේ තනිකරම සංවිධායකයන්ගේ වරද නිසා බව කියවේ. 

මේ පිළිබඳ හෙළිදරව්වක් ඉදිරියේදී ශ්‍රී ලංකා මිරර් වෙතින් බලාපොරොත්තු වන්න.

මොරගහහේන ප්‍රදේශයේදී අණ නොතකා ධාවනය කළ ත්‍රිරෝද රථයකට පොලීසිය කළ වෙඩි තැබීමකින් පුද්ගලයින් දෙදෙනෙකු මියගොස් තිබේ.

පොලිස් මාධ්‍ය ඒකකය පැවසුවේ, අද (23) අලුයම 1.50ට පමණ මීගොඩ, දෙල්කැටිය හන්දිය ප්‍රදේශයේ පොලිස් මාර්ග බාධකයකදී ත්‍රිරෝද රථයක් පරීක්ෂා කිරීම සඳහා නැවැත්වීමට සූදානම් වන අවස්ථාවේ අදාළ ත්‍රිරෝද රථයේ සිටි පුද්ගලයින් පොලීසිය දෙසට වෙඩි තබා මොරගහහේන ප්‍රදේශයට පලාගොස් ඇති බවයි.

ඒ අනුව, මොරගහහේන පොලීසියට කළ දැනුම්දීමකදී, විමර්ශනයක් සඳහා එහි පැමිණ සිට කොළඹ දකුණ අපරාධ කොට්ඨාසයේ නිලධාරීන්  මෙම ත්‍රිරෝද රථය නැවැත්වීමට උත්සාහ කර ඇති අතර එහිදී ද එය අණ නොතකා ධාවනය කර ඇතැයි පොලීසිය විසින් පවසන ලදී.

අණ නොතකා ධාවනය කළ ත්‍රිරෝද රථයට මොරගහහේන මීපේ පාර, ටයර් කර්මාන්තශාලාව අසළදී කොළඹ දකුණ අපරාධ කොට්ඨාසයේ නිලධාරීන් වෙඩි තබා තිබේ.

පොලීසිය පැවසුවේ, වෙඩි තැබීමෙන් තුවාල ලැබූ පුද්ගලයින් දෙදෙනෙකු හොරණ රෝහලට ඇතුළත් කිරීමෙන් පසු මියගිය බවයි.

ත්‍රිරෝද රථයේ සිටි තවත් අයෙකු ඉන් පලාගොස් තිබේ.

සිද්ධියෙන් මියගියේ වයස අවුරුදු 42 තණමල්විල ප්‍රදේශයේ පදිංචි පුද්ගලයෙක් සහ 35 හැවිරිදි පුද්ගලයෙකි.

අදාළ ත්‍රිරෝද රථයේ තිබී ගිනිඅවියක් සොයාගත් බව ද පොලීසිය සඳහන් කළේය.