මාර්ගගත ක්‍රමවල සුරක්ෂිතභාවය පිළිබඳ පනත (සමාජ මාධ්‍ය පනත ) යටතේ ශ්‍රී ලංකාවේ මුල් වතාවට Google – WhatsApp  සමාජමාධ්‍ය ජාලා වලට හා පුද්ගලයින් 6 දෙනෙකුට එරෙහිව පවරා ඇති නඩුව නිරීක්ෂණයට තමා මැදිහත්වන බව ශ්‍රී ලංකා නීතීඥ සංගමයේ සභාපති ජනාධිපති නීතීඥ කෞශල්‍ය නවරත්න මහතා විසින් කොළඹ අතිරේක මහේස්ත්‍රාත් තරංගා මහවත්ත මහත්මියට ඊයේ දැනුම් දෙන ලදී.

තම පෞද්ගලික තොරතුරු අන්තර්ජාලයේ සංසරණය වීම වළක්වාලන ලෙස ඉල්ලා සිටිමින් ශ්‍රී ලංකා මහජන උපයෝගීතා කොමිෂන් සභාවේ හිටපු සභාපති ජනක රත්නායක මහතා විසින් 2024 අංක 9 දරන මාර්ගගත ක්‍රමවල සුරක්ෂිතභාවය පිළිබඳ පනතේ 24 වන වගන්තිය යටතේ නඩුවක් ගොණු කිරීම සිදුවිය.

පෙත්සම්කාර ජනක රත්නායක මහතාට මහේස්ත්‍රාත් අධිකරණයේ මෙම නඩුව පවත්වාගෙන යෑමට නීතිමය හැකියාවක් නැතිබව වගඋත්තරකරුවන්ගේ  නීතීඥවරුන් පෙන්වා දෙන දුන්හ.

ඔවුන් විසින් වැඩිදුරටත් පෙන්වා දෙන ලද්දේ, සමාජ මාධ්‍ය පනත අපරාධ නීතියට යටත් කරමින් නඩු පැවරීමේදී අධිකරණ බලය පිළිබඳ ගැටලු මතුවන බවත් එම මූලික විරෝධතාව නිරාකරණයෙන් අනතුරුව නඩුව විභාග කල යුතු බවත් ය.

මෙලෙස මූලික විරෝධතාවයන් ඉදිරිපත් කිරීමෙන් පසුව, කරුණු විභාග කර බැලීමෙන් අනතුරුව මහේස්ත්‍රාත්වරිය විසින් මූලික මූලික විරෝධතාවන් පිළිබඳ නඩු විභාගය මැයි 02 දිනට කල් තැබුවාය.

ශ්‍රී ලංකා නිදහස් පක්ෂයේ වත්මන් අර්බුදකාරී තත්ත්වය සම්බන්ධයෙන් ඉදිරියේදී සාකච්ඡා කරන බවත්,  ඒ පිළිබද අවසන් තීරණයක් ගෙන නොමැති බවත්, ජාතික මැතිවරණ කොමිෂන්  සභාව‍ේ සභාපති ආර්. එම්. ඒ. එල් රත්නායක මහතා සඳහන් කළේය. 

පක්ෂයේ දෙපිරිසක් විසින් මේ වනවිට තමා වෙත යොමු කර ඇති සියලු ලිපිලේඛන කොමිසම හමුවට ඉදිරිපත් කරන බවත් එහි සභාපති ආර්. එම්. ඒ. එල් රත්නායක මහතා පවසයි.

ශ්‍ර‍ී ලංකා නිදහස් පක්ෂයේ පසුගිය දිනවල සිදුකළ පත් කිර‍ීම්වලට එරෙහිව එහි වැඩබලන මහ ලේකම්වරයා මැතිවරණ කොමිසම හමුවේ සිය විරෝධතා ඉදිරිපත් කර තිබුණි.

ශ්‍රී ලංකා නිදහස් පක්ෂයේ වැඩබලන මහ ලේකම් පාර්ලිමේන්තු මන්ත්‍රි දුෂ්මන්ත මිත්‍රපාල මහතා සඳහන් කළේ, පක්ෂ ව්‍යවස්ථාවට අනුව සියලු කටයුතු සිදුවිය යුතු බවට මැතිවරණ කොමිසමට දැනුම් දුන් බවයි.

මේ අතර, පසුගියදා ශ්‍රි ලංකා නිදහස් පක්ෂ දේශපාලන මණ්ඩලයේදී ගත් නව තීන්දු සම්බන්ධයෙන් ශ්‍රී ලංකා නිදහස් පක්ෂයේ තවත් පිරිසක් ජාතික මැතිවරණ කොමිසම හමුවේ කරුණු වාර්තා කර තිබේ.

ඒ දේශපාලන මණ්ඩල රැස්වීමේදී කරන ලද නව පත්කිරීම් සහ ඊට අදාළව කරුණු දක්වමින් ය.

ශ්‍රී ලංකා නිදහස් පක්ෂයේ ජාතික සංවිධායක දුමින්ද දිසානායක මහතා සඳහන් කළේ, ශ්‍රී ලංකා නිදහස් පක්ෂයේ සභාපතිවරයා ලෙස හිටපු ජනාධිපති මෛත්‍රිපාල සිරිසේන මහතා කටයුතු කිරීම වළක්වාලමින් නිකුත් කර තිබෙන වාරණ නියෝගය සම්බන්ධයෙන් මැතිවරණ කොමිසම සමග සාකච්ඡා කළ බවයි.

මුල්‍ය වංචා සම්බන්ධයෙන් මේ වන විට බන්ධනාගාර ගතව සිටින රංගන ශිල්පිනී දමිතා අබේරත්න සහ ඇයගේ සැමියාට එරෙහිව තවත් පැමිණිල්ලක් පෑලියගොඩ කොට්ඨාස අපරාධා විමර්ශන කාර්යංශයට ලැබී ඇති බවට තොරතුරු වාර්තා වේ.

වත්තල ප්‍රදේශයේ පදිංචිකරුවෙකු වන පැටිකෝරළලාගේ ප්‍රසන්න නම් අයෙක් විසින් මෙම පැමිණිල්ල ඉදිරිපත් කර ඇති අතර තමන් විදේශගත කරන බව පවසමින් රුපියල් ලක්ෂ 34ක මුදලක් වංචා කළේ යැයි  මෙම පැමිණිල්ල අධිකරණය හමුවේ ගොනුකර තිබේ.

මේ සම්බන්ධව විමර්ශනය මේවන විට ආරම්භ කර තිබේ.