Mar 18, 2018

NGO අතකොළු කරගැනීමට රහස් කැබිනට් පත්‍රිකාවක්

‘සමාජ සේවා සංවිධාන පනත් සංශෝධනය‘ හරහා සිවිල් සංවිධාන ආණ්ඩුවේ අතකොළු සංවිධාන කර ගැනීමට ආණ්ඩුව උත්සහ කරන බවට කැෆේ සංවිධානය චෝදනා කරයි.

1980 අංක 31 දරණ ස්වේච්ඡා සමාජ සේවා සංවිධාන පනත සංශෝධන කිරිම මුවාවෙන් රජය තමන් සමග කටයුතු නොකරන සිවිල් සංවිධාන මර්ධනය සදහා පනත් කෙටුම්පතක් හරහා උත්සහ දරමින් සිටින බව කැෆේ සහ ශ්‍රී ලංකා මානව හිමිකම් කේන්ද්‍ර‍ය ඒකාබද්ධ නිවේදනයක් නිකුත් කරමින් පවසයි.

කැෆේ සහ ශ්‍රී ලංකා මානව හිමිකම් කේන්ද්‍ර‍ය විධායක අධ්‍යක්ෂ, කීර්ති තෙන්නකෝන් මහතාගේ අත්සනින් යුතුව නිකුත්කළ නිවේදනයක එබව සඳහන්වේ.

එම නිවේදනයේ වැඩිදුරටත් මෙසේද දැක්වේ.

මර්ධනාකාරී ලියවිල්ලක් :

පසුගිය දා හොර රහසේ කැබිනට් අනුමැතිය ලබා ගෙන ඇති ‘සමාජ සේවා පනත‘ සංශෝධනය සදහා වන කෙටුම්පත ‘සිවිල් සංවිධාන රාජ්‍යයේ අවශ්‍යතාව මත මෙහෙයවීම සදහා ද, රජය විවේචනය කරන සංවිධාන මර්ධනය සදහා ද සැකසූ මර්ධනාකාරී ලියවිල්ලකි.

යෝජිත සංශෝධන මගින් ස්වේච්ජා සමාජ සේවා සංවිධාන පනතේ මුලික ව්‍යුහය හා ව්‍යවහාරයන් සම්පූර්ණයෙන්ම අත්තනෝමතික වෙනසකට ලක් කොට ඇත.

ජනපති, අගමැති, අමාත්‍යවරුන් ගේ අවශ්‍යතාවන් ඉටු නොකරන සිවිල් සංවිධාන අකර්මන්‍ය කිරීම මෙම පනත් සංශෝධනයේ සැලසුම වී ඇත.

යම් පනතකට සංශෝධනයක් ඉදිරිපත් වන්නේ නම් එහි මුලික හරය විනාශ නොවිය යුතු නමුත්, යෝජිත සංශෝධන මගින් රජයේ අනුග්‍ර‍හයක් නොමැති කිසිදු සංවිධානයකට සිය කටයුතු සිදු කිරීමට නොහැකි තත්වයක් නිර්මාණය වේ.

කිසිදු ව්‍යවස්ථාමය හෝ නෛතික පදනමක් නොමැති ‘රාජ්‍ය නොවන සංවිධාන ලේකම් කාර්යාලය‘ ට නෛතික පදනමක් ලබා දී, අධ්‍යක්ෂ ජෙනරාල්වරයෙකු හරහා සිවිල් සංවිධාන පාලනය කිරීමට රජයට අවස්ථාව ලැබේ.

උපදේශක කමිටුවට නොසලකා හැරලා :

රාජ්‍ය නොවන සංවිධාන ලේකම් කාර්යාලය විසින් එක් දේශපාලන පක්ෂයකට හිතවත් නාමික සිවිල් සංවිධාන කිහිපයක් හා එක්ව මෙම මර්ධනකාරී පනත් සංශෝධනය සකස් කොට ඇත.

‘රාජ්‍ය නොවන සංවිධාන උපදේශක කමිටු සාමාජිකයින් ලෙස කටයුතු කළ නිමල්කා ප්‍ර‍නාන්දු, සුදර්ශන ගුණවර්ධන, වෛද්‍යා වින්යා ආරියරත්න විසින් ඉදිරිපත් කළ කමිටු යෝජනාවන්ට සම්පූර්ණයෙන්ම පරිබාහිරව මෙම සංශෝධනය සැකසී ඇත.

අවම වශයෙන් උපදේශන කමිටුව සමග සම්බන්ධ වූ සිවිල් සංවිධාන කිසිවක් සමග හෝ නව සංශෝධිත කෙටුම්පත කැබිනට් මණ්ඩලයට ඉදිරිපත් කිරීමට පෙර සාකච්ඡාවක් හෝ පවත්වා නැත.

ඒ අනුව, ‘රජ්‍ය නොවන සංවිධාන ලේකම් කාර්යාලය ක්‍ර‍ම විරෝධී හා ව්‍යවහාර විරෝධී ප්‍රවේශයකින් කටයුතු කර ඇති බව පැහැදිලිය.

ගමේ මරණාධාර සමිතියේ සිට විවිධ සමාජ ස්ථර හා පුද්ගලයින්ගේ එකමුතු, සමාගම් හා සංගම්, සංස්ථා ලෙස ක්‍රියාත්මක වන සංවිධාන ‘වචනයේ පරිසමාප්තාර්ථයෙන්ම ‘සිවිල් සංවිධාන‘ ලෙස පැවතිය යුතු අතර, කුමන ලෙසකින් හෝ රජයේ අතකොළු බවට පත් නොවිය යුතු බව කැෆේ සංවිධානය අවධාරණය කරයි.

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - [email protected] දුරකථන - +94 114 546 362

Top