Jul 15, 2018

'හිට්ලර් කෙනෙක් බලයට ආවොත් රටම ඉවරයි' - වෙල්ගම හා වාසු අනතුරු අඟවයි (වීඩියෝ) Featured

දකුණෙන් හිට්ලර් කෙනෙක් බලයට පත්වුවහොත් අපේ රටට යන කල දසාව කුමක්දැයි ඒකාබද්ධයේ පාර්ලිමේන්තු මන්ත්‍රී කුමාර වෙල්ගම මහතා විමසයි.

ඒකාබද්ධ විපක්ෂයේ රැස්වීමක් අමතමින් ඊයේ (14) ඔහු එහි රැස්ව සිටි පාක්ෂිකයින් ගෙන් එබව විමසා සිටියේය.

වෙල්ගම මන්ත්‍රීවරයා එහිදී වැඩිදුරටත් මෙසේද පැවසිය.

 ''විජයකලා ගිහිල්ලා උතුරේ කියනවා අපිට ඕනේ ප්‍රභාකරන්, ප්‍රභාකරන් ප්‍රජාතන්ත්‍රවාදී නායකයෙක්ද? ප්‍රභාකරන් කියන්නේ ඒකාධිපතියෙක්. එතකොට සමහර දකුණෙ අය කියනවා, අපිට ඕනේ හිට්ලර් කෙනෙක් කියලා ..

එතකොට අරෙහෙන් ඒකාධිපති කෙනෙක් ඉල්ලනවා දකුණෙන් හිට්ලර් කෙනෙක් ඉල්ලනවා. එතකොට අපේ රටට යන කල දසාව මොකක්ද? එතකොට තමුන්නාන්සේලාට ජීවත් වෙන්න පුළුවන්ද? රෑට නිදාගන්න පුළුවන්ද?

එදා ඒ ආණ්ඩු දෙකම රජය විවේචනය කරොත් රෑට නිදාගැනීම බොරු, ගමේ පොලිසියවත් දන්නේ නැහැ මේ මිනිහට මොකද වුණේ කියලා. ඒ නිසා අපි ඒකාධිපති පාලනයකට කැමති නැහැ ''

 එකා පිස්සෙක් !

 පාර්ලිමේන්තු මන්ත්‍රී කුමාර වෙල්ගම මහතා ආණ්ඩුව විසින් බ්ලැක්මේල් කර ඇති බවට ගෝඨාභය රාජපක්ෂ මහතාගේ ප්‍රකාශකයකු ලෙස කටයුතු කරන විශ්‍රාමික හමුදා නිලධාරී අජිත් ප්‍රසන්න මහතා පසුගියදා මාධ්‍ය හමුවකදී කල ප්‍රකාශය සම්බන්ධයෙන් මාධ්‍යවේදීන් කල විමසීමේදී පිළිතුරුදුන් වෙල්ගම මහතා, අජිත් ප්‍රසන්න මහතාව හැඳින්වුයේ 'පිස්සකු' ලෙසය.

''ප්‍රසන්නලට උත්තර දෙන්න මට අවශ්‍යතාවයක් නහැ. ගමත් අතහැරලා ගහිල්ලා වෙන ප්‍රදේශයක පදිංචියට ගිය මිනිහෙක්. ඡන්ද පන්දාහක්වත් ගන්න බැරි මුළු රටම දන්න පිස්සෙක් එක්ක මම මොකටද කතා කරන්නේ'' මන්ත්‍රීවරයා වැඩිදුරටත් කියා සිටියේය.

VasudewaN 600px 17 01 03

'ගෝඨා පසුපස සිටින බලවේගය අතිශය භයානකයි'- වාසුදේව

මේ අතර ඊයේ පැවති මාධ්‍ය හමුවකදී අදහස් දැක්වූ පාර්ලිමේන්තු මන්ත්‍රී වාසුදේව නානායක්කාර මහතා, ''ගෝඨාභය රාජපක්‍ෂ මහතා පසුපස සිටින බලවේග අතිශය භයානක බව'' පැවසිය.

ඉතාම දැඩි මිලිටරි ආණ්ඩුවක් ගොඩනැගීමට එම පිරිස සුදානම්වන බවට මන්ත්‍රීවරයා අනතුරු ඇඟවිය.

ගෝඨාභය රාජපක්‍ෂ මහතා දේපාලඥයෙකු නොවන බවත් ඔහු හුදෙක්ම හමුදා නිලධාරියෙක් පමණක් බවද මන්ත්‍රීවරයා එම මාධ්‍ය හමුවේදී අවධාරණය කර සිටියේය.

වාසුදේව නානායක්කාර මහතා එහිදී වැඩිදුරටත් මෙසේද පැවසිය.

 හමුදා ආණ්ඩුවක් හදාගැනීමේ අභිප්‍රායෙන් :

''මේ රටේ ප්‍රජාතන්ත්‍රවාදී බලවේගවල කැමැත්තක් නැහැ. අපි අරගෙන බැලුවොත් පක්ෂ හැටියට වමේ පක්ෂ කවුරුත් එකඟ නැහැ. පෙරටුගාමී පක්ෂයත් එකඟ නැහැ. ජේවීපී ගත්තොත් එගොල්ලොත් එකඟ නැහැ. දෙමළ සන්ධානයත් එකඟ නැහැ. යූඑන්පී එකත් එකඟ නැහැ. මේ අපේ ජේඕ එකෙත් කොටසක් එකඟ නැහැ.

හමුදාවේ විශ්‍රාමික නිලධාරීන්, ඉහල මැද පංතියේ ඉංග්‍රීසි කතාකරන මහත්තුරු නෝනලා, වෘත්තීයවේදී කට්ටිය, කර්මාන්ත කරුවෝ, මහා ධනපතියොන්ට මේ රටේ උද්ඝෝෂණ තියෙන්න බැහැ. වැඩ වර්ජන තියෙන්න බැහැ. මේ රටේ අයිතිවාසිකම් ගැන කතා කරන්න බැහැ. ඒවා හරියට මර්ධනය කරන්න පුළුවන් කෙනෙක් තමයි ඒගොල්ලෝ හොයන්නේ.

දෙවෙනි එක හමුදා නිලධාරීන්. හමුදා ආණ්ඩුවක් හදාගැනීමේ අභිප්‍රායෙන්.

වියත් මගේ සම්පූර්ණ බලඇණිය තමයි ඔය කියන වෘත්තීයවේදීන්, දේශීය මහා ධනවතුන් හා මහා ව්‍යාපාරිකයින් තමයි ඒකේ ප්‍රධාන බලඇණිය. මහින්ද මහත්තයාගේ චරිතයේ ලක්ෂණ නෙවෙයිනෙ තියෙන්නේ. අපිට ඕනේ මහින්ද මහත්මයාගේ නායකත්වය. දැන් එතුමා දාන්න බැහැනෙ මේකට. ඒ නිසා එතුමාගේ නායකත්වයක් වැනි නායකත්වයක් අපිට උවමනායි.''

 

Leave a comment

Make sure you enter all the required information, indicated by an asterisk (*). HTML code is not allowed.

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top