"රනිල් වික්‍රමසිංහ එක්ක කොයි විදියටවත් ආණ්ඩුවක් කරන්නේ නෑ'' - ජනපති ශ්‍රීලනිප මන්ත්‍රීවරුන්ට කියයි   "රනිල් වික්‍රමසිංහ එක්ක කොයි විදියටවත් ආණ්ඩුවක් කරන්නේ නෑ'' - ජනපති ශ්‍රීලනිප මන්ත්‍රීවරුන්ට කියයි  
Nov 17, 2018

ජනපති තව තවත් මුරණ්ඩු වේ : රනිල්ට බෑ කියයි - සම්බන්ධන්ව මඟ හරි ! Featured

අගමැති ධුරයෙන් පහකරන ලද එජාප නායක රනිල් වික්‍රමසිංහ මහතාට පාර්ලිමේන්තුවේ 113 කට වැඩි බහුතර බලයක් ඇතයි සහතික කලත් තමා ජනාධිපති ධුරයේ සිටින තෙක් ඔහුට යළි අගමැති ධුරය ලබා නොදෙන බව ජනාධිපතිවරයා දැඩි ලෙස අවධාරණය කර ඇතැයි දේශපාලන ආරංචිමාර්ග පවසයි.


මේ වන විට රනිල් වික්‍රමසිංහ මහතා අගමැති කිරීමට සහය පළකරමින් පාර්ලිමේන්තු මන්ත්‍රීවරුන් 113කට වැඩි පිරිසක් විසින් ලබාදී ඇති දිව්රුම් ප්‍රකාශ බාරදීමට හා ඉදිරි ක්‍රියාමාර්ග සාකච්ජා කිරීම සඳහා වෙලාවක් ලබාදෙන්නැයි එක්සත් ජාතික පෙරමුණේ මන්ත්‍රීවරුන් කිහිප දෙනෙකු ඊයේ පස්වරුවේ ජනාධිපතිවරයා ගෙන් ඉල්ලා සිටි අවස්ථාවේ දී, රනිල් වික්‍රමසිංහ මහතාට යලි අගමැතිකම නොදෙන බවත් තමා අගමැති මහින්ද රාජපක්ෂ මහතා සමග සුළුතර ආණ්ඩුවක් පවත්වාගෙන යන බවත් පවසා ඇතැයි ඉහත ආරංචිමාර්ග තවදුරටත් පවසයි.

එජාප මන්ත්‍රීවරුන්ට ඊයේ රාත්‍රීයේ ඔහු හමුවීමට වේලාවක් ලබාදී නොමැති ජනාධිපතිවරයා, දෙමල ජාතික සන්ධානයේ නායක ආර්. සම්බන්ධන් මහතා කල එවැනි ඉල්ලීමක් ද මඟ හරිමින් සිටින බව ඉහත ආරංචිමාර්ග වැඩිදුරටත් සඳහන් කර සිටියි.

තානාපතිවරුන්ට පොරොන්දුවක් !

කෙසේවුවද ඊයේ විශ්වාස භංගයට පෙර ලංකාවේ සිටින ප්‍රධාන පෙලේ තානාපතිවරුන් සිව් දෙනෙකු ජනාධිපතිවරයා හමුවූ අවස්ථාවේදී ඊයේ දිනය නිමවීමට පෙර අර්බුදය සමතයකට පත්කිරීමට පියවර ගන්නා බවට ජනාධිපතිවරයා ඔවුන් හමුවේ පොරොන්දු වී ඇත.

එසේ ජනාධිපතිවරයා හමුව ඇත්තේ, ශ්‍රී ලංකාවේ සිටින බ්‍රිතාන්‍ය මහ කොමසාරිස්, ජපාන තානාපති, යුරෝපා සංගමයේ තානාපති සහ ඇමරිකානු තානාපතිනිය යි. 

ශ්‍රී ලංකාවේ වත්මන් දේශපාලන අර්බුදය සම්බන්ධයෙන් බලවත් සේ කනස්සල්ල පළකර ඇති එම රාජ්‍යතන්ත්‍රීකයින් මේවන විට අගමැතිවරුන් දෙදෙනෙකු සිටින රටක් ලෙස ශ්‍රී  ලංකාව හැල්ලුවට ලක්වෙමින් පවතින බවත්  ජාත්‍යන්තර වශයෙන් එය රටට හිතකර නොවන බවත් පැහැදිලිකර දී ඇත.

ශ්‍රීලනිප මන්ත්‍රීවරුන්ට කියපු කතාව :

මේ අතර ජනාධිපති මෛත්‍රීපාල සිරිසේන මහතා ශ්‍රී ලංකා නිදහස් පක්ෂයේ මන්ත්‍රීවරුන් කැඳවා ඊයේ (16) පාර්ලිමේන්තුවේදී එක්සත් ජාතික පෙරමුණ ඇතුළු පක්ෂ විශ්වාසභංග යෝජනාව සම්මත කරගත් ආකාරය පිළිගත නොහැකි බව දැනුම් දී තිබේ.

එමෙන්ම ඔවුන් බහුතරය පෙන්වූ ආකාරය ද ජනාධිපතිවරයා ප්‍රතික්ෂේප කළ බව ජනාධිපතිවරයා විසින් පත්කර සිටි ඇමතිවරයෙකු වූ ලක්ෂ්මන් යාපා අබේවර්ධන මන්ත්‍රීවරයා මාධ්‍යවේදීන් හමුවේ සඳහන් කළේය.

"රනිල් වික්‍රමසිංහ එක්ක කොයි විදියටවත් ආණ්ඩුවක් කරන්නේ නෑ කීව. පාර්ලිමේන්තුවේ බහුතරය පෙන්නලා අපිට වැඩ ටික කරගෙන යන්න කීව," ඔහු පැවසීය.

ජනාධිපතිවරයා එම අදහස් පළ කර තිබෙන්නේ විශ්වාසභංග යෝජනාවෙන් අනතුරුව ඊයේ පස්වරුවේ ශ්‍රී ලංකා නිදහස් පක්ෂයේ මන්ත්‍රීවරුන් හමු වූ අවස්ථාවේදීය. 

තමන්ට පාර්ලිමේන්තුවේ බහුතර බලය තිබෙන්නේ යයි ඉදිරි දින තුන ඇතුළත පෙන්වන මෙන් ද ජනාධිපති මෛත්‍රීපාල සිරිසේන එහිදී සිය පාක්ෂිකයන්ට උපදෙස් දී තිබේ.
Lakshmanyapa 670px 02 06 17                           ''රනිල් අගමැති කිරීම ජනතාවගේ අභිලාශය නොවේ''  - ලක්ෂ්මන් යාපා 

රනිල් වික්‍රමසිංහ යනු ශ්‍රී ලංකාවේ වත්මන් අගමැතිවරයා නොවන බව සඳහන් කළ ලක්ෂ්මන් යාපා අබේවර්ධන මන්ත්‍රීවරයා, ඔහු යළි අගමැති පදවියට පත්කිරීම ශ්‍රී ලංකාවේ ජනතාවගේ අභිලාශය නොවන බවත් කියා සිටියේ මාධ්‍යවේදීන් මතු කළ ප්‍රශ්නවලට පිළිතුරු දෙමිනි.

එහිදී අදහස් දැක්වූ සුසන්ත පුංචිනිලමේ මන්ත්‍රීවරයා කියා සිටියේ, පාර්ලිමේන්තුවේදී "විනයක් ඇතිව, නීති රීතිවලට අනුකූලව සහයෝගයෙන් ක්‍රියාකරන" මෙන් ජනාධිපතිවරයා උපදෙස් දුන් බවය.

තවමත් රට පාලනය කරන්නේ තමන්ගේ ආණ්ඩුව බවත් ලක්ෂමන් යාපා මන්ත්‍රීවරයා සඳහන් කළේය.
fightපාර්ලිමේන්තු පද්ධතියට එල්ලවූ මරු පහරක්....

ජනාධිපතිවරයා විසින් පත්කරන ලද අගමැති මහින්ද රාජපක්ෂ මහතාගේ ප්‍රධානත්වයෙන් යුත් ආණ්ඩුවට එරෙහි දෙවෙනි විශ්වාසභංග යෝජනාව ද සිකුරාදා (16) පාර්ලිමේන්තුවේදී සම්මතවීමෙන් අනතුරුව විදේශීය මාධ්‍යවේදීන් හමුවේ අදහස් දැක්වූ එක්සත් ජාතික පක්ෂයේ නායකයා, තමන් බලයෙන් පහකරන ලද ඔක්තෝබර් 26 වෙනි දින සිටම තමන්ට පාර්ලිමේන්තුවේ බහුතර බලය තිබෙන බව කීපවරක්ම කියා සිටියේය.

ආසියාවේ පැරණි ප්‍රජාතන්ත්‍රවාදී දේශයක් ලෙසින් ශ්‍රී ලංකාව ජාත්‍යන්තර වශයෙන් කීර්තියක් අත්කරගෙන සිටි බව පවසන එක්සත් ජාතික පක්ෂයේ නායකයා, පසුගිය සති කීපය තුළ සිදුවූ ක්‍රියාදාමය විස්තර කළේ පාර්ලිමේන්තු පද්ධතියට එල්ලවූ පහරක් ලෙසිනි.

"ඒ ගැන මම කම්පාවට වගේම කනගාටුවට පත්වෙනවා." ඔහු සඳහන් කළේය.

''රටේ නීත්‍යානුකූලව පිහිටවපු ආණ්ඩුව අපියි''.

"අපිට මේ අරාජික තත්වය තවදුරටත් බලා ඉන්න බෑ. අපිට බහුතරය තියෙනවා. අපිට ඒක ඔප්පු කරන්න පුළුවන්. මේ රටේ නීත්‍යානුකූලව පිහිටවපු ආණ්ඩුව අපියි. අපිට ඒ ආණ්ඩුව පවත්වාගෙන යන්න පුළුවන්." රනිල් වික්‍රමසිංහ මහතා පැවසීය.

කතානායකවරයා විසින් ජනාධිපතිවරයා වෙත යොමුකරන ලද ලිපියට ප්‍රතිචාරයක් බලා සිටින අතර, අවශ්‍ය නම් යළිත් වරක් ජනාධිපතිවරයා මුණගැසීමට එක්සත් ජාතික පෙරමුණේ පක්ෂ නායකයන් සූදානම් බව ද විදේශීය මාධ්‍යවේදීන් කළ විමසීමකට පිළිතුරු දෙමින් රනිල් වික්‍රමසිංහ මහතා පැවසීය.

"ඕනෑම වේලාවක හමුවෙන්න අපේ පක්ෂ නායකයන් සූදානම්. අපිට අනෙක් සියලු දේ කතා කරලා විසඳගන්න පුළුවන්. නමුත් රටේ ස්ථාවර ආණ්ඩුවක් පවත්වාගෙන යන්න පුළුවන් එකම කණ්ඩායම අපි බව පිළිගන්න ඕනේ," ඔහු පැවසීය.

"ඒක නොපිළිගන්නා තුරු රටේ අරාජික තත්ත්වයක් තියේවි. අපිට අරාජික තත්ත්වයක් අවශ්‍ය නෑ."

ජුනි මාසයට ප්‍රථම මහ මැතිවරණයක් !

Ranilwicramasingha 670px 20 11 16''ජුනි මාසයට ප්‍රථම මහ මැතිවරණයක් කැඳවීමට ක්‍රියාකරනවා''  රනිල් වික්‍රමසිංහ

මේ අතර ශ්‍රී ලංකාවේ අනෙක් දේශපාලන පක්ෂ ද සමග සාකච්ඡා කොට ලබන වසරේ ජුනි මාසයට ප්‍රථම මහ මැතිවරණයක් කැඳවීමට ක්‍රියාකරන බව ජනාධිපතිවරයා විසින් බලයෙන් පහකරන ලද අගමැති රනිල් වික්‍රමසිංහ මහතා සඳහන් කළේය.

මහ මැතිවරණයක් කැඳවීම ගැන වැඩිදුරටත් කරුණු විස්තර කළ බලයෙන් පහ කෙරුණු අගමැතිවරයා, ඒ සම්බන්ධයෙන් පාර්ලිමේන්තුව නියෝජනය කරන සියලුම පක්ෂ සමග මුලින්ම සාකච්ඡා කරන බවත් සඳහන් කළේය.

ඉන්පසුව ලබන ජුනි මාසයට ප්‍රථම මහා මැතිවරණයක් කැඳවීම සම්බන්ධයෙන් පාර්ලිමේන්තුවේ යෝජනාවක් සම්මත කරගැනීම ඔහුගේ අදහස වී තිබේ.

ආර්ථිකය යළිත් යථා තත්වයට ගැනීම පිණිස සිය ආණ්ඩුවට මාස කීපයක කාලයක් අවශ්‍ය බව සඳහන් කළ ඔහු, ඉන් අනතුරුව ජනතාව හමුවට යාම සිය අභිලාෂය බවත් කියා සිටියේය.

සිකුරාදා පාර්ලිමේන්තුවේ සිදු වූ පහරදීම් "ඉතාම නරක," බව විදේශීය මාධ්‍යවේදීන් හමුවේ කියා සිටි රනිල් වික්‍රමසිංහ වැඩිදුරටත් පැවසුවේ "පාර්ලිමේන්තුවට බෝම්බ හැහුව දවසේ පවා මම හිටියා. ඒත් මේ වගේ දවසක් මම දැකල නෑ," යනුවෙනි.

සිකුරාදා හටගත් ගැටුම ශ්‍රී ලංකා පාර්ලිමේන්තු ඉතිහාසයේ "අඳුරු දිනයක්" පමණක් නොව "අඳුරු පරිච්ඡේදයක්" බව ද රනිල් වික්‍රමසිංහ විදෙස් මාධ්‍යවේදීන් හමුවේ පැවසීය.

(උපුටා ගැනීම් -බීබීසී සිංහල සේවය)

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - [email protected] දුරකථන - +94 114 546 362

Top