"මෙම ප්‍රකාශ වලින් එකක් වත් ඇත්ත නොවේ" - එක්සත් ජාතීන්ගේ මානව හිමිකම් කොමසාරිස් මිෂෙල් බැචලේ  "මෙම ප්‍රකාශ වලින් එකක් වත් ඇත්ත නොවේ" - එක්සත් ජාතීන්ගේ මානව හිමිකම් කොමසාරිස් මිෂෙල් බැචලේ 
Mar 28, 2019

"අතේ රෝල් එපා" - එක්සත් ජාතීන්ගෙන් ලංකාණ්ඩුවට තරවටුවක් (වීඩියෝ) Featured

ජිනීවා නුවර පැවති ඉහළ පෙලේ ජාත්‍යන්තර ද්විපාර්ශවික සාකච්ඡාවක් ගැන අසත්‍ය තොරතුරු කොළඹ පැමිණ ප්‍රසිද්ධියට පත් කිරීම සම්බන්ධයෙන් ශ්‍රී ලංකා ආණ්ඩුවේ උසස් බලධාරියකු එක්සත් ජාතීන්ගේ දැඩි දෝෂ දර්ශනයට ලක්වී සිටී.


ප්‍රහාරාත්මක ස්වරයෙන් මානව හිමිකම් පිලිබඳ මහකොමසාරිස් කාර්යාලයෙන් බදාදා (27) ප්‍රකාශයට පත් කර ඇති නිවේදනයක ප්‍රධාන ඉලක්කය වී ඇත්තේ ජනාධිපතිවරයා ජිනීවා යැවීමට තෝරාගත් උතුරේ ආණ්ඩුකාරයාය.

ජගත් මානව හිමිකම් මණ්ඩලයේ හතලිස් වැනි සැසියට සහභාගිවූ රජයේ නියෝජිතයන් සමග ශ්‍රී ලංකාවේ මානව හිමිකම් චර්යාව පිලිබඳ මහ කොමසාරිස් වාර්තාව පිළිබඳව මාර්තු 20 දා ජිනීවා නුවර පැවැති සාකච්ඡාව ආණ්ඩුකාර සුරේන් රාඝවන් විසින් "ඉතා බැරෑරුම් ආකාරයෙන් වැරදි ලෙස අර්ථකතනය කර ඇති " බව එක්සත් ජාතීන්ගේ මානව හිමිකම් කොමසාරිස් මිෂෙල් බැචලේ පවසා තිබේ.

ලංකාවේ මාධ්‍ය වාර්තා දැඩි විවේචනයට :

මානව හිමිකම් මණ්ඩලයේ ශ්‍රී ලංකාව සම්බන්ධ කටයුතු රටේ ජනමාධ්‍ය වාර්තා කරන ආකාරය ද ඇගේ විවේචනයට ලක් වී තිබේ.

උතුරේ ආණ්ඩුකාරයා පවසා තිබුනේ මහ කොමසාරිස් වරියගේ වාර්තාවේ දොස් දැක්වූ ශ්‍රී ලංකා නියෝජිත පිරිස නිවැරදි වාර්තාවක් සකස් කරන ආකාරය පිළිබඳව ඇයට උපදෙස් දුන් බවයි.

ශ්‍රී ලංකාව සම්බන්ධ වාර්තාවේ දෝෂ නියෝජිත මණ්ඩලය විසින් පෙන්වා දීමෙන් අනතුරුව “අඩුපාඩු බොහොමයක්” තිබෙන බව පිළිගත් මහකොමසාරිස් වරිය වාර්තාව සැකසූ දෙදෙනකු එවෙලේම කැඳවා “මීට පස්සේ වාර්තාව සකසද්දී කරුණාකර මීට වැඩිය ශාස්ත්‍රීය වෙන්න ඕනේ,” යි නියම කළ බව ආණ්ඩුකාර රාඝවන් කොළඹදී මාධ්‍යවේදීන් ට කියා තිබුනි.

දෙමළ ඩයස්පෝරාවේ දායකත්වය:

වාර්තාව සකස් කිරීමේදී දෙමළ ඩයස්පෝරාවේ දායකත්වය ලැබුණු බවට ඔහු චෝදනාවක්ද කළේය.

එම ප්‍රකාශවලට ජනමාධ්‍ය මගින් මහත් ප්‍රචාරයක් දී තිබුනි.

"මෙම ප්‍රකාශ වලින් එකක් වත් ඇත්ත නොවේ" යි පවසන මහ කොමසාරිස්වරියගේ අවධානයට යොමුවී තිබුනේ ඩේලිමිරර් පුවත්පත පලකළ වාර්තාවය.

"පුවත්පත, ආණ්ඩුකාරවරයා නිවැරදිව වටහා ගෙන නැත, එසේ නැතහොත් ආණ්ඩුකාරයා මා වැරදි ලෙස උපුටා දක්වා ඇත," යි පැවසූ මහ කොමසාරිස් වරිය ඇගේ වාර්තාව සහ මානව හිමිකම් කවුන්සිලයට ඉදිරිපත්කරන ලද වාච්‍ය ප්‍රකාශ යන දෙකම වෙනුවෙන් ඇය මුලුමනින්ම පෙනී ඉන්නා බව සහ ඒවා ශ්‍රී ලංකාවේ තත්වය පිළිබඳව අපක්ෂපාතී සහ සාධාරණ පිළිබිඹුවක් ලබා දෙන බව කියා සිටී.



මාරපනත් එකම බෝට්ටුවේ !

මහ කොමසාරිස් වරිය සමග ජිනීවාහිදී පැවති සාකච්ඡා සම්බන්ධයෙන් ආචාර්ය රාඝවන් පලකරන අදහස් ශ්‍රී ලංකා නියෝජිත කණ්ඩායමේ නායකයා ද අනුමත කර තිබුනි.

“මේ වාර්තා සකස් කිරීමේදී භුමියේ කරුනු සහතික කරගැනීම සඳහා අදාළ දේශීය ආයතන සහ ස්වාධීන ආයතන සමග සමීපව කටයුතු කිරීමේ වැදගත්කම ශ්‍රී ලංකාවේ නියෝජිත කණ්ඩායම විසින් (මහ කොමසාරිස් වරියට) අවධාරණය කරන ලදී,” යි විදේශ අමාත්‍ය තිලක් මාරපන ජිනීවා ගොස් ආ පසු නිකුත් කළ නිවේදනයක දැක්වේ.

සියරට පැමිණීමෙන් අනතුරුව ශ්‍රී ලංකා නියෝජිතයන් කියන කතා මෙන්ම ජනමාධ්‍ය වාර්තා ගැන ද මහකොමසාරිස් වරිය දැඩි කලකිරීම පල කොට තිබේ.

"ශ්‍රී ලංකා නියෝජිත පිරිස මා සමග පැවති සාකච්ඡාව අතේ රෝල් කිරීම පිළිබඳව මම දැඩි ලෙස කළකිරී සිටිමි," යි පැවසු මිචෙල් බැෂලේ ශ්‍රී ලංකාවේ ජනමාධ්‍ය පවා ජිනීවාහී මානව හිමිකම් මණ්ඩලයේ කාර්ය පටිපාටිය දිගින් දිගටම සාවද්‍ය ලෙස හා වැරදි ලෙස අර්ථකතනය කරන බවට චෝදනා කරයි.

සාමාජික රටවල් 47 කින් සැදි මානව හිමිකම් මණ්ඩලයේ සාමාන්‍ය ක්‍රමවේදයට අනුකූලව, ශ්‍රී ලංකාව පිළිබඳ වාර්තාව ප්‍රකාශයට පත්වීමට පෙර රජය වෙත ලබා දෙන ලද බව මහකොමසාරිස් නිවේදනය පවසයි.

එහි වැඩිදුරටත් දැක්වෙන පරිදි වාර්තාව සකස් කිරීමේ දී රජයේ අදහස් ද සළකා බලා ඇති අතර පෙබරවාරියේ දිවයිනට පැමිණි මුල් පෙලේ මානව හිමිකම් කාර්යාල නියෝජිතයන් පිරිසක් ආණ්ඩුවේ නිලධාරීන් ගණනාවක් සමග එහි අන්තර්ගතය සාකච්ඡා කර තිබේ.

(gagana.lk)

Leave a comment

Make sure you enter all the required information, indicated by an asterisk (*). HTML code is not allowed.

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top