ශාන්ත අන්තෝනි දේවස්ථානය ශාන්ත අන්තෝනි දේවස්ථානය
Apr 28, 2019

"දෙව් මැදුර වසා දැමුවේ වසර 160 කට පස්සේ" Featured

කතෝලික දේවස්ථාන සහ සංචාරක හෝටල් කිහිපයක් ඉලක්ක කරගනිමින් පාස්කු ඉරිදා එල්ල වූ ප්‍රහාරයට සතියක් ගතවන ඉරිදා (අප්‍රේල් 28) දින දිවයින පුරා කතෝලික දේවස්ථාන සාම්ප්‍රදායික දේව මෙහෙය නොපැවැත්වීමට ශ්‍රී ලංකා කතෝලික සභාව පියවර ගෙන තිබිණ.

ඒ රට පුරා පවතින ආරක්ෂක වාතාවරණය හේතුවෙනි.

ප්‍රහාරයට ලක් වූ කොළඹ ශාන්ත අන්තෝනි දේවස්ථානය ඉදිරිපස විශේෂ දේව මෙහෙයක් පැවැත්වුන අතර, අගමැති රනිල් වික්‍රමසිංහ ද එයට සහභාගි වී සිටියේය.

මේ අතර කොළඹ අගරදගුරු කාදිනල් මැල්කම් රංජිත්ගේ ප්‍රධානත්වයෙන් අගරදගුරු මන්දිරයේ පැවති දිව්‍ය පූජා යාගය රූපවාහිනී ඔස්සේ විකාශය කෙරිණ.

 ජනාධිපති මෛත්‍රීපාල සිරිසේන, අගමැතිවරයා සහ විපක්ෂනායක මහින්ද රාජපක්ෂ ද එයට සම්බන්ධ වූ අතර, බොහෝ ජනතාව නිවෙස් වල සිට දේව මෙහෙයට එක්වූහ.

පාස්කු ඉරිදා දිනයේ වැඩිම පිරිසක් මියගියේ මීගමුව කටුවාපිටිය දේවස්ථානයට එල්ල වූ මරාගෙන මැරෙන ප්‍රහාරයෙනි.

ඒ හේතුවෙන් හලාවත ආසන දෙව්මැදුර ඇතුළු වයඹ බටහිර වෙරළ තීරයේ කතෝලික හා ක්‍රිස්තියානි දේවස්ථානවලට පොලිස් හා යුද හමුදා ආරක්ෂාව ලබා දී තිබූ අයුරු දක්නට ලැබිණි.

දේවස්ථාන ඉදිරිපිට ඉරිදා දිව්‍ය පූජා යාගය නොපැවැත්වෙන බව සඳහන් දැන්වීම් අලවා තිබුණු අතර, පසුගිය ඉරිදා ප්‍රහාරය එල්ල වූ පෙරවරු 8:45 ට දේවස්ථාන වල සීනුව නාද කෙරිණ.

 දිව්‍ය පූජා යාගය නොපැවැත්වෙන බව කලින් දැනුම් දී තිබුණ ද සැලකිය යුතු පිරිසක් දේවස්ථාන වෙත පැමිණ කඳුළු සලමින් යළි නිවෙස් බලා යන අයුරු දක්නට ලැබිණ.

හලාවත ආසන දෙව් මැදුර මෙසේ වසා දමනු ලැබුවේ වසර 160 කට පසු බව බැතිමත්තු සඳහන් කළහ. ආරක්ෂක වාතාවරණය යටතේ පවා එය වසා දැමීම ගැන ඇතැමුන් විරෝධය පළ කළ ආකාරය ද දකින්නට ලැබිණ.

"මේවා සහ ගහන අපරාධ. මම කවදාවත් ඉරිදා පුජාවට සහභාගි නොවී ඉඳල නැහැ. අද තමයි මට දිව්‍ය පූජා යාගය නැතිවුනේ. ආරක්ෂාව දලා හරි ලබන සතියේ පූජාව තියන්න ඕනෑ.," එක පුද්ගලයෙක් පැවසීය.

ඇතැම් දේවස්ථාන වල කතෝලික ආගමික පියතුමන් ද රූපවාහිනියෙන් විකාශය වූ දිව්‍ය පූජා යාගයට එක්ව සිටි අතර බොහෝ ජනතාව නිවෙස් වල සිට එම දිව්‍ය පූජා යාගයට සම්බන්ධ වූහ.

 106625398 399a4815
හලාවත ආසන දෙව් මැදුර අසල ආරක්ෂාව

(බීබීසී සිංහල සේවය)

Leave a comment

Make sure you enter all the required information, indicated by an asterisk (*). HTML code is not allowed.

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top