OPEN

#

OPEN

#

Jun 16, 2019

සහ්රාන්ගේ ප්‍රහාර ගැන තොරතුරු SIS එක ටක්කෙටම දුන් බවට වාර්තාවක් Featured

අප්‍රේල් 21දා සිදුකළ මරාගෙන මැරෙන බෝම්බ ප්‍රහාර සම්බන්ධ තොරතුරු ඊට පෙර හිටපු පොලිස්පති හා ආරක්ෂක ලේකම්ට සහතික ලෙස නිශ්චිතව තහවුරු කර ලබාදුන් බවට වන ලිඛිත සාක්ෂි සහිත ලේඛනයක් මේ සම්බන්ධයෙන් අධිකරණයේ පවතින නඩුවලට ඉදිරිපත් කිරීමට රජයේ බුද්ධි සේවය සකස්කරමින් සිටින බව වාර්තා වේ.

එහි වැදගත් ලිඛිත ශාක්ෂි කිහිපයක්ම ඇතැයි ද වාර්තා වේ.

මේ තොරතුරු හෙළිවූයේ සතිඅන්ත පුවත්පතක් විසින් රාජ්‍ය බුද්ධි සේවාවේ ප්‍රධානියා විසින් එම ප්‍රහාරය සම්බන්ධයෙන් අප්‍රේල් මස 09 වැනිදා පොලිස්පති පූජිත ජයසුන්දර මහතාට ලබාදුන් වාර්තාව මගින් ප්‍රහාරය සම්බන්ධ තොතුරු නිශ්චිතව තහවුරු කර නොමැති බවට පලවන වාර්තා සම්බන්ධයෙන් ශ්‍රී ලංකා මිරර් කළ සොයා බැලීමකදීය.

මේ අතර, අප්‍රේල් 16 වැනිදා කාත­න්කු­ඩියේ පිහිටි වත්තක යතු­රු­පැ­දි­යක ඇටවූ අධි­බ­ලැති බෝම්බ­යක් පිපිරවීම සහ්රාන් හෂීම්ගේ වැඩක් බව SIS එක විසින් හිටපු පොලිස් පතිවරයාට ලිඛිතව දැනුම් දී තිබූ බවද වාර්තා වේ.

පුපුරාගිය යතුරු පැදියේ ලියා­ප­දිංචි අයි­ති­කරු කැල­ණිය ප්‍රදේ­ශයේ කාන්තා­වක් බවත්, ඇය එම යතු­රු­පැ­දිය වසර දෙක­හ­මා­රක් පමණ භාවිත කර කදානේ පිහිටි ඒජ­න්සි­ය­කට අලෙවි කිරී­මට භාරදී ඇති බවත් පොලිසිය හෙළිකරගෙන තිබී ඇත.

කඳානේ යතුරුපැදි අලෙවි සැලෙන් එම යතුරු පැදි­යත් තවත් යතුරු පැදි­ය­කුත් දෙදෙ­නකු පැමිණ මිලදී ගෙන ඇති බව පොලිස් පරීක්ෂණවලදී හෙළිව තිබී ඇති අතර එම යතු­රු­පැදි දෙක මිලදී ගත් පුද්ග­ලයා සිය අන­න්‍ය­තාව තහ­වුරු කර ඇත්තේ ජාතික හැඳු­නු­ම්ප­තක් ඉදිරිපත් කර බවද පැවසේ. එසේ ලබාදී තිබුණේ ගාල්ලේ පදිංචි පුද්ග­ල­ය­කුට අයත් හැඳුනුම්පතක් වන අතර හැඳුනුම්පත අයිතිකරු පවසා තිබුණේ එය පුත්තලමේදී නැතුවූ බවයි.

තවද, රජයේ බුද්ධි සේවය ආරක්ෂක ලේකම්වරයා හා පොලිස්පතිවරයාට අප්‍රේල් 20 වැනිදා හවස 5.00ට හෝටල් සහ පල්ලිවලට නියත වශයෙන්ම ප්‍රහාරයක් එල්ලවන බව දන්වා ඇති අතර එය ලිඛිතව හා දුරකථනයෙන් දැනුම්දීම සම්බන්ධ තොරතුරු වාර්තාව අධිකරණයට ඉදිරිපත් කිරීමට නියමිත බවද ශ්‍රී ලංකා මිරර් වෙත වාර්තා වේ.

සබැදි පුවත්
පාස්කු ප්‍රහාරයට පෙර බුද්ධි තොරතුරු සනාථ නොකළ බවට පුවත් වාර්තාවක්

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - [email protected] දුරකථන - +94 114 546 362

Top