විසි දෙවෙනි ආණ්ඩු ක්රම ව්යවස්ථා සංශෝධනයට අදාළ ගැසට් නිවේදනය ජනාධිපතිවරණය අවසන් වන තෙක් නිකුත් කිරීම නොකරන ලෙසට තමා අමාත්යාංශ ලේකම්වරයාට උපදෙස් දුන්නේ ජනතාව ගැන සිතා සද්භාවයෙන් බව අධිකරණ බන්ධනාගාර කටයුතු සහ ආණ්ඩුක්රම ව්යවස්ථා ප්රතිසංස්කරණ අමාත්ය ආචාර්ය විජයදාස රාජපක්ෂ මහතා කියයි.
ඒ මහතා මේ බව ලංකාදීප පුවත්පතට පවසා තිබේ.
මෙවැනි ගැසට් නිවේදනයක් නිකුත් කිරීමෙන් ජනාධිපතිවරණය කල් දැමීමට උත්සාහ දරනවා දැයි ජනතාව අතරේ භීතියක් ඇතිවන හෙයින් එය වැළැක්වීමේ අරමුණින් තමා එම ක්රියාමාර්ගය ගත් බවත් ඇතැමුන් ඊට වෙනස් මතයක සිටින්නේ නම් ඒවායේ ප්රතිඵල ඒ අයම බාරගත යුතු බවත් ඒ මහතා වැඩිදුරටත් පවසා ඇත.
පෙරේදා (18) මෙම සංශෝධනයට අදාළ නිවේදනය ගැසට් කිරීමෙන් වළකින ලෙසට අධිකරණ අමාත්ය ආචාර්ය විජයදාස රාජපක්ෂ මහතා නිවේදනය කර තිබූ අතර ඊයේ (19) ජනාධිපති රනිල් වික්රමසිංහ මහතා එම ගැසට් නිවේදනය පල කිරීමට නියමකර තිබිණි.
මෙම සංශෝධනය ගෙන එන්නේ ජනාධිපතිවරයාගේ ධුර කාලය සම්බන්ධයෙන් ආණ්ඩුක්රම ව්යවස්ථාවේ 83 (ආ) ව්යවස්ථාවේ සඳහන් වසර 06ක් ඉක්මවා යන වචනය වෙනුවට වසර 05ක් ඉක්මවා යන වචනය ආදේශ කිරීම වෙනුවෙනි.
ව්යවස්ථා සංශෝධනවලට බයවෙන්න එපා – ජනපති
මේ අතර, ජනාධිපතිවරණය නිසි කාලයේදී පවත්වන බව ජනාධිපති රනිල් වික්රමසිංහ මහතා මාධ්ය ආයතන හිමිකරුවන් හමුවේ ඊයේ (19) පවසා තිබිණි.
සර්වජන ඡන්ද බලය හිමි වීමෙන් පසුව ප්රජාතන්ත්රවාදය අඛණ්ඩව ක්රියාත්මක එකම රට ශ්රී ලංකාව වන බවත් එම තත්ත්වය ඉදිරියටත් රැක ගැනීමට තමන් කැප වන බැවින් ව්යවස්ථා සංශෝධන සම්බන්ධයෙන් කිසිදු බියක් ඇති කර නොගත යුතු බවත් ජනාධිපති රනිල් වික්රමසිංහ මහතා එහිදී කියා තිබිණි.
ව්යවස්ථා සංශෝධන සිදු කිරීමේදී තමන් එහි වගකීම බාර දුන්නේ විෂය සම්බන්ධ පළපුරුදු අයකුට බව කී ජනාධිපතිවරයා එවැනි කටයුතු පෙරදී සිදු කළේ කේ. එන් චොක්සි වැනි නීතිඥවරුන් සමඟ බව ජනාධිපතිවරයා එහිදී වැඩිදුරටත් පවසා තිබිණි.
කෙසේ වුවත් 2015 වසරේ ව්යවස්ථා සංශෝධනය සිදු කරන අවස්ථාවේදී චොක්සි මහතා ජීවතුන් අතර නොසිටි බැවින් එම කටයුත්ත ජයම්පති වික්රමරත්න නීතිඥවරයාට බාර දීමට සිදු වූ බවද ජනාධිපති රනිල් වික්රමසිංහ මහතා පවසා ඇත.
එම අවස්ථාවේ ඔහුගෙන් සිදු වූ අතපසුවීමක් නිසා වත්මන් ගැටළු සහගත තත්ත්වය ඇති ව තිබෙන බවද ඔහු එහිදී සඳහන් කර තිබේ.
සබැඳි පුවත්:
22 වැනි සංශෝධනය ගැසට් කරයි
විජේ 22 අත්හිටුවයි!
