OPEN

#

OPEN

#

Jan 16, 2020

මහින්දානන්දට එරෙහි නඩුවේ විභාගය නවත්වන්නැයි ඉල්ලීමක්

පාර්ලිමේන්තු මන්ත‍්‍රී රන්ජන් රාමනායක මහතාගේ හඬපට පිළිබඳව සොයා බැලීමට පත්කර ඇති ජනාධිපති පරීක්‍ෂණ කොමිසමේ පරීක්‍ෂණ අවසන් වනතුරු රාජ්‍ය අමාත්‍ය මහින්දානන්ද අලුත්ගමගේ මහතාට එරෙහිව රුපියල් ලක්‍ෂ 39ක් සාවද්‍ය පරිහරණය කළ බවට පවරා ඇති නඩුවේ විභාගය නවතා දමන්නැයි ඔහු වෙනුවෙන් පෙනී සිටි ජනාධිපති නීතීඥ නලීන් ලද්දුවහෙට්ටි මහතා කොළඹ මහාධිකරණ විනිසුරු ආදිත්‍ය පටබැඳි මහතාගෙන් ඉල්ලා සිටියේය.

ශ්‍රී ලංකා නිදහස් කම්කරු කොංග‍්‍රසය යන වෘත්තීය සමිතියට අයත් රුපියල් ලක්‍ෂ 39ක් සාපරාධි අන්දමින් සාවද්‍ය පරිහරණය කළ බවට අලුත්ගමගේ මහතාට එරෙහිව පවරා ඇති නඩුව කැඳවනු ලැබු අවස්ථාවේදී එසේ ඉල්ලා සිටියේය.

විත්තිකරුට එරෙහි මෙම චෝදනා සනාථ කිරීම සඳහා සාක්කිකරුවන් 20 දෙනෙකු හා ලේඛණ 8ක් ඉදිරිපත් කිරීමට අපේක්‍ෂා කරන බව නීතීපතිවරයා විසින් අධිකරණයට දැනුම් දී තිබිණි.

පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජනරාල් තුසිත් මුදලිගේ මහතාගේ මෙහෙයවීම යටතේ මෙම නඩුව සම්බන්ධයෙන් ශ්‍රී ලංකා නිදහස් කම්කරු කොංග‍්‍රසය යන වෘත්තීය සමිතියේ භාන්ඩාගාරික නාවලගේ ඩග්ලස් මහතා සාක්කි දුන් අතර වැඩිදුර විභාගය පැවැත්විණි.

ඉදිරිපත් වු කරුණු සැළකිල්ලට ගත් විනිසුරුවරයා මෙම නඩුවේ වැඩිදුර විභාගය ලබන මාර්තු 10 වැනිදා තෙක් කල් තබන ලද අතර එදින මෙම නඩුව යළි කැඳවීමට ද නියම කෙරිණි.

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - [email protected] දුරකථන - +94 114 546 362

Top