Aug 13, 2020

අංගොඩ ලොක්කාගේ අනියම් බිරිඳගෙන් ප්‍රශ්න කිරීමට අවසර

ඉන්දියාවට පළාගොස් සිටියදී මරණයට පත්වූ බවට සැක කෙරෙන අංගොඩ ලොක්කා හෙවත් මද්දුමගේ ලසන්ත චන්දන පෙරේරාට නීතිවිරෝධී ලෙස ඉන්දියාවේ රැඳී සිටීමට උපකාර කළ බවට චෝදනා ලැබූ තිදෙනා දින තුනක් ඉන්දීය අපරාධ පරීක්ෂණ දෙපාර්තමේන්තුව භාරයේ තබාගෙන ප්‍රශ්න කිරීමට ඉන්දියාවේ කොයිම්බතූර් ප්‍රධාන මහේස්ත්‍රාත් අධිකරණය විසින් අවසර ලබාදී තිබේ.

මෙම අවසරය ලැබී ඇත්තේ පසුගිය සිකුරාදා ඉන්දීය අපරාධ පරීක්ෂණ දෙපාර්තමේන්තුව විසින් ගොනු කළ පෙත්සමක් විභාගයට ගත් අවස්ථාවේදීය.

ඒ අනුව අංගොඩ ලොක්කාගේ අනියම් බිරිඳ වූ අමානි තාන්ජි, නීතිඥවරියක වන සිවකාම සුන්දරී හා මදුරෙහි පදිංචි එස්. දියනේස්වරන් යන සැකකරුවන් තිදෙනා දින තුනක් රඳවාගෙන ප්‍රශ්න කිරීමට අවසර ලැබී තිබේ.

මෙම සැකකරුවන් තිදෙනාට එරෙහිව චෝදනා ගොනු කර ඇත්තේ අංගොඩ ලොක්කාට ප්‍රදීප් සිං නමැති ව්‍යාජ නමකින් ඉන්දීය පුරවැසියෙකු ලෙස පෙනී සිටීමට සහය දුන් බවට චෝදනා කරමින් බව වාර්තා වේ.
අංගොඩ ලොක්කාගේ ඥාතීන්ගේ DNA සාම්පල ඉන්දියාවට

ඉන්දියාවේදී මිය ගිය බවට සැක කෙරෙන අංගොඩ ලොක්කා හෙවත් මද්දුමගේ ලසන්ත චන්දන පෙරේරා ගේ ඩී. එන්. ඒ සමග සැසඳීම සඳහා ඔහුගේ පවුලේ ඥාතීන්ගේ සාම්පල ඉන්දියාවට යවා ඇති බව පොලිසිය සඳහන් කරයි.

මෙම සිද්ධිය සම්බන්ධයෙන් විමර්ශන කටයුතු සිදුකිරීම සඳහා ඉන්දීය අපරාධ පරීක්ෂණ දෙපාර්තමේන්තුව වෙත පවරා ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී ජාලිය සේනාරත්න මහතා පවසයි.

 

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top