Oct 01, 2020

මාලගමුවට රට යන්න අවසර

ප්‍රංශය ඇතුළු රටවල් කිහිපයක පැවැත්වෙන ‘ලැම්බෝගිනි සුපර් ට්‍රෝෆියෝ 2020’ තරගාවලිය සඳහා සහභාගී විමට ධාවන ශූර ඩිලන්ත මාලගමුව මහතාට විදේශ ගතවීමට කොළඹ මහාධිකරණය විනිසුරු ධම්මික ගනේපොළ මහතා ඊයේ (30) අවසර දුන්නේය.

‘ලැම්බෝගිනි සුපර් ට්‍රෝෆියෝ 2020’ තරගාවලිය සඳහා සහභාගී වන ශ්‍රී ලංකා කණ්ඩායමේ නායකත්වය දරණ ඩිලන්ත මාලගමුව මහතාට විදේශ ගතවීමට අවසර දෙන්නැයි නීතීඥ ජීවන්ත ජයතිලක මහතා කළ ඉල්ලීමක් පිළිගනිමින් විනිසුරුවරයා ඒ සඳහා අවසර දුන්නේය.

සුපිරි නිවාස සංකීර්ණයක් ඉදිකිරීම සඳහා ජපන් ජාතිකයකුගෙන් ඇමෙරිකානු ඩොලර් ලක්‍ෂ 6ක මුදලක් ලබාගෙන වංචා කළ බවට ඩිලන්ත මාලගමුව මහතා ඇතුළු විත්තිකරුවන් තිදෙනෙකුට එරෙහි නඩුව කැඳවනු ලැබු අවස්ථාවේදී ඉදිරිපත් වූ කරුණු සළකා බලා විනිසුරුවරයා එලෙස නියම කළේය.

මෙම නඩුවේ ඇප නියම කිරීමේදී තම සේවාදායකයාට එරෙහිව විදේශගතවීම වැළැක්වීමේ නියෝගයක් පනවා නැතත් විදේශගත වීමට පෙර ඒ බව දැනුම් දීමට ඔහු අධිකරණයට පැමිණි බව දැනුම් දුන් නීතීඥ ජීවන්ත ජයතිලක මහතා ඒ අනුව අදාළ තරගාවලියට සහභාගීවීම සඳහා විදේශ ගතවීමට ඔහුට අවසර දෙන්නැයිද ලබන 19 වැනිදා පැවැත්වෙන නඩු විභාගය ඔහු නොමැතිව පැවැත්වීමට අවසර දෙන්නැයිද අවසර ඉල්ලා සිටියේය.

ඒ සඳහා අවසර දුන් විනිසුරුවරයා මෙම නඩු විභාගය සඳහා ලබන 19 වැනිදා කැඳවීමට නියම කළේය.

 

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - [email protected] දුරකථන - +94 114 546 362

Top