Oct 13, 2021

බතික් ඇමතිට අගමැතිගේ පුතා අභියෝගයක් නොවන බව කියයි!

වයඹ පළාතේ ඉපදී හැදී වැඩුනු තමන්ට වයඹ මහ ඇමති සටනේදී අග්‍රාමාත්‍ය මහින්ද රාජපක්ෂ මහතාගේ රෝහිත රාජපක්ෂ කිසිදු ආකාරයක අභියෝගයක් නොවන බව බතික් අත්යන්ත්‍ර රෙදිපිළි සහ දේශීය ඇඟළුම් නිෂ්පාදන රාජ්‍ය අමාත්‍ය දයාසිරි ජයසේකර මහතා අද (13) කුරුණෑගලදී ප්‍රකාශ කළේය.

කුරුණෑගල පැවති රැස්වීමකට සහභාගි වීමෙන් අනතුරුව මාධ්‍යවේදීන් හමුවේ රාජ්‍ය අමාත්‍යවරයා මේ බව ප්‍රකාශ කළේය.

රෝහිත රාජපක්ෂ මහතා ඉදිරි වයඹ පළාත් සභා මැතිවරණයේදී මහ ඇමති ධූරයට තරඟ කරන බවට රාවයක් පමණක් පැතිර ඇති බවද ඔහු ඒ සඳහා පැමිණෙනවාද නැද්ද යන්න එදිනට තීරණය කළ හැකි බවද දයාසිරි ජයසේකර මහතා සඳහන් කළේය.

ඒ මහතා වැඩි දුරටත් මෙසේද සඳහන් කළේය. ඔය කියන කවුරුත් වයඹ පළාතේ ඉපදුනු මට අභියෝගයක් නොවෙයි. වයඹ පළාතේ ජනතාව එදා වගේම අදටත් මට හොඳින් සලකනවා. ඒ නිසා මේ පළාත් සභා මැතිවරණයේදීත් වයඹ ජනතාව මට හොඳින් සලකයි කියලා මම විශ්වාස කරනවා.

මේවනවිට රටේ ඇති වෙලා තියෙන පොහොර ප්‍රශ්නය මට නම් බලපෑමක් ඇති කරලා නැහැ. මොකද ගමේ ඉන්න මා ගැන ගමේ ජීවත් වෙන ගොවියෝ හොඳට දන්න නිසා මේ දයාසිරි ජයසේකරට ඔය අනික් අයට වගේ ගමට යන්න බැරි තත්ත්වයක් නම් උදා වෙලා නැහැ. මම හැමදාමත් හිටියේ ගමේ ජනතාවත් එක්ක. ඉදිරියටත් මම ඉන්නේ ගමේ ජනතාව සමගයි.

මේ කාබනික පොහොර ප්‍රශ්නයට ඉක්මණින් විසඳුමක් ලබා නොදුන්නොත් ඒක ජනාධිපතිතුමා වගේම මේ රජයත් විනාශ කරලා දමන ප්‍රශ්නයක් බවට පත් වෙයි යැයිද ජයසේකර මහතා ප්‍රකාශ කළේය.

 

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top