Apr 10, 2017

'වෛද්‍යවරු රජය පෙරලන්න හදනවා, දැඩි තීන්දු ගත යුතුයි'

රජයේ වෛද්‍ය නිලධාරින්ගේ සංගමයේ ඇතැම් නායකයින්ට සංයමයක් නොමැති බවත්, ඔවුන් රජය පෙරළා දැමිමට උත්සාහ කරන බවත්, ඊට එරෙහිව දැඩි තීන්දු ගත යුතු බවත් සෞඛ්‍ය ඇමැති පවසයි.

සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මහතා එබව සඳහන් කලේ අරලියගහ මන්දිරයේ දී අද (10) පැවති රැස්වීමකදීය. මෙහිදී හෙද හෙදියන් 1290 කට ඩිප්ලෝමා ප්‍රදානය කෙරුනි.

''යහපාලන රජය බණ්ඩාරනායක රජය වගේ ගුටිකෑමට සුදානම් නැහැ. මනුස්සකම දුර්වලකමක් ලෙස සිතන්න එපා. රජය ජනතාව වෙනුවෙන් කැප වෙනවා. මෙම රජය සෙළවීමට කාටවත් ඉඩ ලබාදෙන්නෙත් නැහැ.” යයි ඇමතිවරයා එහිදී අවධාරණය කළේය.

මෙහිදී අදහස් දැක් වූ සෞඛ්‍ය අමාත්‍යවරයා මෙසේද පැවසිය.

"සෞඛ්‍ය අමාත්‍යාංශයේ වෘත්තීය සමිති වැඩවර්ජනවලට කැමැතියි. වැඩවර්ජන පවත්වලා සාර්ථකයි කියනවා. මිනිස් ජීවිත සමගයි ඔවුන් සෙල්ලං කරන්නේ. එය තමයි සාර්ථකත්වය. වැඩවර්ජන දියත් කළ යුත්තේ සාකචිඡා බිදවැටිමෙන් පසුවයි. හැබැයි සෞඛ්‍ය වෘත්තීය සමිති මුලින්ම ප්‍රකාශ කරන්නේ බහිනවා” කියලා.

එය වෘත්තීය සමිතිවල ශක්තිය නොවෙයි. රජය මානව දයාවෙන් ප්‍රශ්ණවලට විසදුම් ලබාදීමට උත්සාහ කරනවා. නමුත් වෘත්තීය සමිති එසේ කරන්නේ නැහැ. ප්‍රශ්ණ ඇති වුනත් මේ රජය කාටවත් හොලවන්නත් බැහැ.

නොසන්ඩාල වැඩ :

වෘත්තීය සමිතිවලට රෝගීන් ගැන අයිතියක් නැද්ද කියලා මම අහන්න කැමැතියි. මිනිස් ජීවිතවල වටිනාකම බිල්ලට දෙන්න එපා. වෘත්තීය සමිති කරන නොසන්ඩාල වැඩ ගැන රජය දැඩි තීන්දු තීරණ ගත යුතුයි.

මම නම් එම තීන්දුවේ තමයි සිටින්නේ. නිදහස් අධ්‍යාපනය ලබමින් වෛද්‍ය වෘත්තීයට ගොස් සිදු කරන ඇතැම් ක්‍රියා උචිත නැහැ. මේ ගැන ජනතාව දැනුවත් කළ යුතුයි.

ඇතැම් සෞඛ්‍ය සේවකයෙක් විනය වීරෝධී වැඩක් සිදු කළහොත් විනය ක්‍රියාමාර්ග ගන්නා බවට අමාත්‍යාංශය ලිපියක් යොමු කිරීමෙන් පසු වෘත්තීය සමිති ප්‍රකාශ කරනවා වර්ජන දියත් කරන බව.

වෛද්‍යවරු ඉන්නේ 19 වන ශතවර්ෂයේ :

වෛද්‍යවරු හැදෙන්නේ නැතිව අනික් සෞඛ්‍ය සේවකයින් හදන්න බැහැ. වෛද්‍යවරු ඉන්නේ 19 වන ශතවර්ෂයේ. වෛද්‍ය හොරු සාකචිඡාවට කැමැති නැහැ. හෙද ගැටළු පිළිබදව අපි රාත්‍රී කාලයෙත් සාකචිඡා පැවැත්වූවා. මම ඔබලාගෙන් ඉල්ලා සිටින්නේ මොන වෘත්තීය සමිති නායකයා කිවුවත් සාධාරණ හා අසාධාරණ බව සළකා බලා වර්ජන වලට එක්වන ලෙසයි. රෝගීන් දෙස බලන්න...

එදා වර්ජන දියත් කළේ නිදහස් සෞඛ්‍ය සේවාව බේරා ගැනීමටයි. නමුත් අද වැඩවර්ජන අවම වී තිඛෙනවා. වෘත්තීය සමිති රැසක් සංයමයෙන් කටයුතු කරනවා. නමුත් රජයේ හෙද නිලධාරීන්ගේ සංගමය සංයමයෙන් කටයුතු කරන්නේ නැහැ. එහි නායකයින් කිහිපදෙනෙකු තමයි එහෙම කරන්නේ.

සෞඛ්‍ය සේවා අධ්‍යක්ෂ ජනරාල්වරයා සමග පසුගියදා රජයේ වෛද්‍ය නිලධාරීන්ගේ සංගමය සාකචිඡාවක් පැවැත්වූවා. එහිදී සෞඛ්‍ය සේවා අධ්‍යක්ෂ ජනරාල්වරයා ප්‍රකාශ කර තිඛෙනවා රජයේ රෙගුලාසි අනුව තමයි මම වැඩකරන්නේ කියලා.

ආණ්ඩුව පෙරළනවා කියල :

එවිට රජයේ වෛද්‍ය නිලධාරීන්ගේ සංගමයේ නායකයින් ප්‍රකාශ කර තිඛෙනවා වසර 03 කින් ආණ්ඩුව පෙරළනවා. එවිට ඔබ ගැන බලාගන්නම් කියලා. රජය පෙරළන්න තමයි ඔවුන් වැඩවර්ජන දියත් කරන්නේ. එම මානසිකත්වය තුරන් කිරිමට පියවර ගත යුතුයි.

යහපාලන රජය බණ්ඩාරනායක රජය වගේ ගුටිකෑමට සුදානම් නැහැ. මනුස්සකම දුර්වලකමක් ලෙස සිතන්න එපා. රජය ජනතාව වෙනුවෙන් කැප වෙනවා. මෙම රජය සෙළවීමට කාටවත් ඉඩ ලබාදෙන්නෙත් නැහැ.”

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - [email protected] දුරකථන - +94 114 546 362

Top