Sathosa

May 05, 2017

''ෆොනීව හමුදාපති කලේ මිනීමරු මානසිකත්වය නිසා'' Featured

ආරක්ෂක අමාත්‍යංශයේ හිටපු ලේකම් ගෝඨාභය රාජපක්ෂ මහතා, සරත් ෆොන්සේකා මහතාව යුධ හමුදාපති කලේ යුද්ධය මෙහෙයවීමට මිනීමරන මානසිකත්වයක් තියෙන කෙනෙක් අවශ්‍ය නිසා යයි පාර්ලිමේන්තු මන්ත්‍රි ප්‍රසන්න රණතුංග මහතා පවසයි.

හෙතෙම මේ බව පැවැසුවේ බත්තරමුල්ල නෙලුම් පෙදෙසේ පිහිටි පොදුජන පෙරමුණ පක්ෂ කාර්යාලයේදී ඊයේ (04) පැවැති මාධ්‍ය හමුවකට එක් වෙමිනි.

''ෆොන්සේකා හමුදාවෙන් විශ්‍රාම යන්න හදන වෙලාවේ මිනීමරන මානසිකත්වයක් තියෙන කෙනෙක් අවශ්‍ය නිසා තමයි ගෝඨාභය ඔහුව පත් කළේ. ඔහු යුද්ධය මෙහෙයවන කාලේ ඉඳන් හමුදාව ඇමෙරිකාවට පාවා දෙන්න කටයුතු කළා. දැන් රටේ මිනිසුන්ගේ විරෝධතා මර්දනය කරන්න ඒකකයක් භාරදෙන්න යනවා ඔහුට. රටේ පුරවැසියන්ගේ ආරක්ෂාව පවා අද තර්ජනයකට ලක්ව තිබෙනවා.'' යයි මන්ත්‍රීවරයා එහිදී කියා සිටියේය.

මන්ත්‍රිවරයා එහිදී මෙසේද පැවැසීය.

මහින්දගේ ජිවිතේ අනතුරේ :

''අද මහින්ද රාජපක්ෂ මැතිතුමාගේ ජීවිතේ අනතුරක දාලා තියෙනවා. ජනාධිපතිවරණය පැරැදුණාට පස්සේ ආරක්ෂක මණ්ඩලය මැදිහත් වෙලා එල්.ටී.ටී.ඊ. ත්‍රස්තවාදය පරාජය කළ නායකයාට ආරක්ෂාව ලබාදෙන හැටි කැබිනට් මණ්ඩලයෙන් අනුමත කරලයි එතුමට ආරක්ෂාව දුන්නේ.

එසේ දීලා තියෙද්දී කාලයකට පෙර පැවැති රැස්වීමට පහුවදා ලබාදී තිබූ හමුදාව ඉවත් කළා. පසුගිය මැයි දෙවැනිදා වෙනකොට විදේශීය පුහුණුව ලත් ආරක්ෂකයෝ ටික ඉවත් කළා.

මේ කාරණා දෙකට සමගාමීව ෆොන්සේකා කරපු ප්‍රකාශ මොනවාද..? සාටකයෙන් එල්ලනවා කිව්වා. ජීවිතයට හානියක් කරන බව තමයි වක්‍රාකාරයෙන් කිව්වේ. රාජිත සේනාරත්නත් කිව්වේ එයමයි.

මේවා අහඹු ලෙස සිදුවෙන දේවල් නෙවෙයි. සැලසුම් සහගතව විදේශ හා දේශීය කුමන්ත්‍රණ හරහා මහින්ද රාජපක්ෂ මැතිතුමාගේ ජීවිතයට අනතුරකට පත්කරනවා.

 යුරෝපය ඇතුළු ප්‍රබල රටවල්වලට ලොකු වුවමනාවක් තියෙනවා මහින්ද රාජපක්ෂව දේශපාලනයෙන් ඉවත් කරන්න. ඒ නිසා තමයි මෙවැනි දේවල් කරන්නේ.''

''ඇමරිකාව මහින්ද එලවන්න මුදල් වෙන් කරලා''

එහිදී අදහස් දැක්වූ පාර්ලිමේන්තු මන්ත්‍රි සී.බී. රත්නායක මහතා, 2015 දී පැවති ජනාධිපතිවරණයේදී මහින්ද රාජපක්ෂ මහතා පරාජයට පත් කිරීම සදහා එවකට පැවති බැරැක් ඔබාමා පාලනය ඇමෙරිකානු අයවැවෙන් මිලියන 454 ක මුදලක් වෙන් තිබූ බව වත්මන් ඇමරිකා ජනාධිපති ඩොනල් ට්‍රම්ප් මහතා විසින් හෙලි කර ඇතැයි පැවසීය.

''මහින්ද රාජපක්‍ෂ ආණ්ඩුව පරද්දන්න ඇමෙරිකාව වගේ රටවල් කුමන්ත්‍රණයක් දියත් කලා. ඒ සදහා ඇමෙරිකාව මිලියන 454ක මුදලක් යෙදවූ බව අපි පහුගිය කාගේ දැන ගත්තා. මේ අය මහින්ද මහත්තයව එලෙව්වේ රූකඩ ආණ්ඩුවක් ගේන්න ඕන නිසයි. අද බලයේ ඉන්නේ ඒ රූකඩ ආණ්ඩුවයි.'' මන්ත්‍රීවරයා වැඩිදුරටත් කියා සිටියේය.

 

Leave a comment

Make sure you enter all the required information, indicated by an asterisk (*). HTML code is not allowed.

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top