Sathosa

May 21, 2017

'FCID ය පුස් පැටියෙක් කරන්න හදනවා' - කැෆේ

පොලිස් මුල්‍ය අපරාධ විමර්ශන කොට්ඨාශය (FCID නිකම්ම නිකන් පූස් පැටියෙක් බවට පත්කිරීමේ කුමන්ත්‍රණයක් ක්‍රියාත්මක වෙමින් පවතින බව දුෂණ විරෝධී පෙරමුණ උපදේශක කීර්ති තෙන්නකෝන් මහතා කියයි.

අල්ලස් කොමිසම, මහා පරිමාන දුෂණ කොමිසම, දුෂණ ලේකම් කාර්යාලය දැන් බෝඩ් ලෑලි විතරක් සිමා ඇති බවත්, එෆ්.සී.අයි.ඩී.ය වහන්න එදා හොරුත් මෙදා හොරුත් සැදී පැහැදී සිටිනා බවත් ඔහු කියා සිටියි.

ලැසිල් ද සිල්වා ලේකම් ධූරයෙන් ඉවත් කරලා මාසයක් යනකොට 'බරපතල වංචා දුෂණ විමර්ශන ජනාධිපති කොමිෂන් සභාව බෝඩ් ලෑල්ලක් වුණා. දිල්රුක්ෂි ඩයස් ඉවත් කිරීමෙන් පසුව 'අල්ලස් හෝ දුෂණ විමර්ශන කොමිෂන් සභාවේ නඩු පැවරීම් සම්පූර්ණයෙන්ම පාහේ නැවතී තිබෙනවා. දුෂණ විමර්ශන ලේකම් කාර්යාලයේ ප්‍රතිපාදන කැපුවාම 'එෆ්.සී.අයි.ඩී.ය' නිකම්ම පූස් පැටියෙක් බවට පත් වෙනවා. යහපාලන රජයේ අල්ලස් හෝ දුෂණ විමර්ශනය දැන් බෝඩ් ලෑල්ලක් විතරයි. එදා ආණ්ඩුවෙත්, මෙදා ආණ්ඩුවෙත් හිටපු අන්ත දුෂිතයින් දැන් එකම පිගානේ දුෂණය වලදනවා යැයි කීර්ති තෙන්නකෝන් මහතා පැවසුයේ, රාජගිරියේ අද පැවති පුවත්පත් සාකච්ඡාවක් අමතමිනි.

දමයන්ති පැන්නේ ඇමතියෙකුගේ පිහිටෙන් !

තවදුරටත් අදහස් දැක්වූ තෙන්නකෝන් මහතා මෙසේද පැවසිය.

'බරපතල වංචා, දුෂණ, විමර්ශන ජනාධිපති කොමිෂන් සභාව' හිටපු ජනාධිපති මහින්ද රාජපක්ෂ, ගෝඨාභය, බැසිල්, නාමල්, ශෂින්ද්‍ර, මහින්දාන්නද, විමල් විරවිංශ, සරත් කුමාර, ජගත් පුෂ්පකුමාර, සේමසිංහ වැනි තෝරු මෝරු ගැන විමර්ශන කළා. කැදවා ප්‍රශ්න කළා.

දමයන්ති ජයරත්න අතිරේක ලේකම්වරිය කැබිනට් අමාත්‍යවරයෙකුගේ පිහිටෙන් රටින් පනින්නේ ජනාධිපති කොමිසමේ කැදවීමට බිය වූ නිසයි.

රිෂාක් ගේ ලක්සතොස නිසා කොමිසමේ ලේකම් ලැසිල් ද සිල්වා ඉවත් කලා. අද එය බෝඩ් ලෑල්ලක් විතරයි. එකම නඩුවක් වත් පවරලා නෑ. මුදල් ගිලින, විශ්‍රාමිකයින්ට පඩි ගෙවන ජනතා බදු මුදල් ගිලින වැඩ නැතිව පඩි ලබන තැනක් වෙලා. බෝඩ් ලෑලි කොමිසමක් වෙලා.

දෙකේම වැඩ නෑ සද්දේ විතරයි:

ඊලගට දිල්රුක්ෂි ඩයස් වික්‍රමසිංහට අල්ලස් කොමිෂන් සභාවේ වැඩ කරන්න බැරි තැනට පත් කලා. ඉල්ලා අස්වෙන්න සැලැස්වුවා. දේශපාලනික වශයෙන් සංවේදී විමර්ශන 22 ක් ඇය අවසන් කර තිබුණා. ඇය ඉවත් කාලාට පස්සේ අද මහින්ද ගේ අල්ලස් කොමිෂන් සභාවෙත්, මෛත්‍රී ගේ අල්ලස් කොමිසමෙත් කිසිම වෙනසක් නෑ. දෙකේම වැඩ නෑ සද්දේ විතරයි.

දැන් මේ සන්තෑසියම දුෂණ විමර්ශන ලේකම් කාර්යාලයට සිදු කරලා තියෙනවා. විමර්ශන නිලධාරීන්ට වාහන නෑ. ගමන් වියදම් නෑ. එහි සෘජු බලපෑම සිදු වුණේ 'එෆ්.සී.අයි.ඩී. එකටයි. තව ටික කාලෙකින් එයත් බෝඩ් ලෑල්ලක් විතරයි.

එජාපයට මහින්ද රකින්නට අවශ්‍යයි :

යහපාලනය හොරු අල්ලන්නේ මෙහෙමයි. ලොකු කථා වේදිකාවල කියනවා. දක්ෂ අවංක නිලධාරීන් තමන්ගේ උපරිමය කරලා හොරු අල්ලනකොට ඒ ආයතන අක්‍රීය කරනවා.

එජාපයට මහින්ද රාජපක්ෂ පවුල රකින්නට අවශ්‍යයි. ඔවුන් සමග සිටි නිලධාරීන් රකින්න අවශ්‍යයි. දේශපාලන පළිගැනීම්වලට ලක් වුණු එක්සත් ජාතික පාක්ෂිකයින් සහන නැති වුනාට ඔවුන් පීඩා කරපු නිලධාරීන් ඉහළම තැන්වල දැන් හොදින් වැජඹෙනවා.

දුෂිතයින්ට කැබිනට් ඇමතිකම් :

යහපාලන ආණ්ඩුවක් කියලා මහින්ද රජයේ හොරකම් උපරිමයෙන් සිදු කරපු අන්ත දුෂිතයෝ රැසකට ශ්‍රීලනිප වෙනුවෙන් කැබිනට් අමාත්‍යාංශය ලැබුණා. ඔවුන් තමන්ගේ මිතුරන්, පරණ ස්වාමියන් රැකගන්න දැන් සියළු දේ කරනවා. මේ ආණ්ඩුව දැන් වංචා දුෂණ ගැන කථා කරන්නේ 'අනේ උඹලා වගේ මෝඩයෝ රැලක්' කියන්නා වගේ ජනතාවට හිනාවෙන ගමන් යැයි ද තෙන්නකෝන් මහතා පැවසීය.

මෙම අවස්ථාවට ලංකා බැංකුවේ හිටපු සභාපති රැසිරිපාල තෙන්නකෝන් හා ක්‍රිෂ්මාල් වර්ණසුරිය යන මහත්වරුන් ද සහභාගි විය.

Leave a comment

Make sure you enter all the required information, indicated by an asterisk (*). HTML code is not allowed.

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top