photographic 2
Jul 25, 2018

කාංචනා මෙන්ඩිස් නිවාඩුවට ඇවිත්

විවාහයෙන් පස්සේ විදෙස් ගත වූ කාංචනා මෙන්ඩිස් කාලෙකට පස්සේ ආයෙමත් ලංකාවට ඇවිත්. කාලයක් තිස්සේ පුංචි තිරයේ වගේම රිදී තිරයේත් දස්කම් පාමින් රටේම ආදරය දිනාගත් කාංචනා දැන් දරුවන් තුන් දෙනෙක්ගේ මවක්. හැබැයි එදා තිරයෙන් අප දුටු ඇගේ ලස්සන තවමත් ඒ වගේමයි.

කාංචනා කාලෙකට පස්සේ නේද මව් රටට ආවේ?

25660177 1968277986754006 7578695219815010919 nඔව්. පුතාලගේ පාසල් නිවාඩුව එන්නේ ජූලි අගෝස්තු මාසවල. ඒ කාලයේ තමයි අපිට ලංකාවට එන්න ලැබෙන්නේ. අවුරුදු 03කට පස්සේ තමයි මෙදා සැරේ ලංකාවට ආවේ.

නිවාඩුවට ලංකාවට එන හැම වතාවකම කලා කටයුත්තකට සම්බන්ධ වෙන්න ඔබට ආරාධනා ලැබෙනවා නේද ?

ඇත්තටම ඔව්. කලින් වතාවේ ආවම සුදත් අයියගේ (සුදත් රෝහණ) ගිරිකුල ටෙලි නාට්‍යයට සම්බන්ධ වුණා. ඒ වසරේ සුමති සම්මාන උළෙලෙහි හොඳම නිළියටත් මාව නිර්දේශ වුණා. මේ වතාවේ මම ලංකාවට ආවේ ජූලි 10 වැනිදා. ජූලි 15 වැනිදා මීගමුවේ පැවැත්වූ තරු සමග රිදී රැයක් ප්‍රසංගයට එකතු වුණා. ඒ ප්‍රසංගයේදී මමයි ජීවන් අයියයි (ජීවන් කුමාරතුංග) ඈත දිලිසෙන හිරු සඳු රන්තරු සින්දුවට නර්තනයක් ඉදිරිපත් කළා. කලා ලොවේ රැසක්ම මේ ප්‍රසංගයේදී මට හමු වුණා.

මේ නිවාඩුවට ආපු වෙලාවේ ටෙලි නාට්‍යයක චිත්‍රපටයක, රඟපාන්න ආරාධනාවක් ලැබුණේ නැද්ද?

දවස් 35ක් විතර තමයි මම ලංකාවේ ඉන්න බලා‍පොරොත්තුව. ඒ කාලෙදි රොෂානුයි පුතාලයි එක්ක නිදහසේ ගත කරන්න ඕනේ. ලංකාවේ ලස්සන තැන් නරඹන්න යන්න ඕනේ. ඒ අතරතුරේ ප්‍රසංග වගේ දේකට ආරාධනා ලැබුණොත් නම් බාරගන්නවා. රඟපාන්න නම් මට කාලයක් හොයාගන්න බැරි වේවි.

 එංගලන්තයේ ලන්ඩන් නුවර නිවසේ ගෙවී යන ජීවිතය මොන වගේද?

ටිකක් විතර කාර්ය බහුලයි. රොෂාන් උදෙන්ම වැඩට යනවා. ලොකු පුතයි දුවයි ඉස්කොලෙ යනවා. මමයි පුංචි පුතයි තමයි ගෙදර ඉතුරු වෙන්නේ. ගේ දොර කටයුතු ළමයින්ගෙයි සැමියගෙයි කටයුතු කරද්දී කාලය ගත වෙනවා තේරෙන්නේ නැහැ. ඒත් ලංකාවට වඩා පහසුකම් එහෙ තියෙන හින්දා. වැඩ ටික තනියම කරන එක ටිකක් පහසුයි.

සාමාන්‍ය ගෘහණියක් විදියට කටයුතු කරගෙන යද්දී ඒ රටේ හා මේ රටේ වෙනස ඔබට කොහොමද දැනෙන්නේ ?31084201 1034625266694414 4093778525205561344 n

පාරේ ගියත් ‍පොදු ස්ථානයකට ගියත් ඒ රටේ නීතිගරුක බවක් තියෙනවා. මාර්ග නීති අකුරටම ක්‍රියාත්මක වෙනවා. ඒ වගේම එහේ මිනිස්සු අනුන්ගේ දේවල් හොයන්නේ නැහැ. තම තමන්ගේ වැඩ කටයුතුවල තමයි ඒ අය නියැළිලා ඉන්නේ. ඒ හින්දා නිදහසත් සාමකාමී බවත් තියෙනවා. ලංකාවේ තත්ත්වය ඊට ගොඩාක් වෙනස්. හැබැයි ඉතින් මෙහේ ඉන්න කොට අපි තනිවෙලා නැහැනේ. අපේම අය ගොඩාක් ඉන්නවානේ. එංගලන්තයේදී ඒ විදියට ගොඩාක් දෙනෙක් අපි වටේ නැහැ. ඒ නිසා තරමක හුදකලා බවක් දැනෙනවා.

එංගලන්තයේ පදිංචි අපේ කලාකරුවෝ එහෙමත් කාංචනාට මුණ ගැහෙනවාද?

සසන්ති ජයසේකර, පුණ්‍යා ආන්ටි, (පුණ්‍යා හින්දෙනිය) අනෝම ආන්ටි (අනෝමා වත්තලදෙනිය) මුණ ගැහෙනවා. එහෙ පැවැත්වෙන යම් යම් කලා කටයුතු, ප්‍රසංග වගේ අංගවල මම ඒවාටත් සම්බන්ධ වෙනවා. නමුත් අර මුලින් කී ගොඩාක් දෙනා ඉන්නේ අපිට ටිකක් දුරින්. ඒ හින්දා ගෙවල්වලට යන්න එහෙම ලැබෙන්නේ නැහැ.

දරුවෝ තුන්දෙනාගෙයි රොෂාන්ගෙයි අලුත් තොරතුරු මොනවාද?

රොෂාන් සුපුරුදු විදියටම රැකියාව කරගෙන යනවා. එයා වැඩ කරන්නේ ඇමෙරිකානු කොම්පැණියක. ලොකු පුතා ටෙනිත රයන්ට දැන් අවුරුදු අටයි. එයා ඉගෙනගන්න දක්ෂයි. දුව කේශා රයිලිට වයස 5යි. එයාට හොඳට නටන්න පුළුවන්. කවදා හරි කලාව පැත්තට යයි කියලත් හිතෙනවා. බාල පුතා නිමාන රොවෙන්ට වයස අවුරුදු එක හමාරයි. එයා වෙනුවෙන් තමයි දවසේ වැඩි වේලාවක් මට ගෙවන්න වෙන්නේ.

31947875 1042825389207735 7256158761952215040 nකලාවෙන් ඈත් වෙලා ගිය හින්දා දැන් ටෙලි නාට්‍යය ගැන චිත්‍රපට ගැන උනන්දුව අඩු වෙලාද අඩුම තරමින් ඒවා නරඹන්නටත් දැන් කාලයක් නැද්ද?

කලාව ගැන තිබුණු ආශාව උනන්දුව, නම් අඩු වෙලා නැහැ. දැනටත් ලැබෙන විවේකය අනුව ටී.වී. බැලුවත් වැඩි කාලයක් වෙන් කරන්නේ ලංකාවේ වැඩසටහන් නරඹන්න තමයි.

මෑත කාලයේ ආශාවෙන් නැරඹූ ටෙලි නාට්‍යය මොනවාද?

කූඹියෝ බොහොම ආශාවෙන් නැරඹුවා. මේ දවස්වල නම් මිනි ගං දෑල අනිවාර්යයෙන්ම නරඹනවා. සිංහල චිත්‍රපට බලන්න වෙන්නේ නම් අන්තර්ජාලයෙන් ධර්ම යුද්ධයයි හෝ ගාන ‍පොකුණයි තමයි මෑත කාලයේ බැලූ චිත්‍රපට.

කාංචනාගේ අවධානය දිනූ අද පරපුරේ නළු නිළියන් කවුද?

හිමාලි සයුරංගිගේ රඟපෑමට මම ගොඩාක් කැමැතියි. ඊට අමතරව තාරුකා වන්නිආරච්චි, කලණ ගුණසේකර, තුමිඳු දොඩන්තැන්න, වගේ අයටත් කැමැතියි.

ලංකාවේ යාළු මිත්‍රයොත් මේ ගමනේදී හමුවනවාද?

මේ දවසේ 35 නිවාඩුව අතරේ ඒ අය බලන්න යන්නත් හිතාගෙන ඉන්නවා.

ආරියවංශ කුලතිලක
ලක්බිම

Leave a comment

Make sure you enter all the required information, indicated by an asterisk (*). HTML code is not allowed.

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top