ශ්‍රී ලංකාවේ රාජ්‍ය සමාගමක් වන එල්ටීඑල් හොල්ඩිංග්ස් සමාගම (LTL Holdings Limited, Sri Lanka) සහ ඉන්දියාවේ පෙට්‍රොනෙට් එල්එන්ජී සමාගම (Petronet LNG Limited, India)  අතර ගිවිසුම ලංකාවේ බලශක්ති ස්වෛරීත්වය මුළුමනින්ම පාහේ අහිමි කරන ගිවිසුමක් යැයි ජන අරගල සන්ධානයේ ජාතික විධායක සභික හා පෙරටුගාමී සමාජවාදී පක්ෂයේ අධ්‍යාපන ලේකම් පුබුදු ජයගොඩ මහතා කියයි.

ඔහු මේ බව කියා සිටියේ කෙරවලපිටිය “සොබාදනවි” ඒකාබද්ධ චක්‍රීය බලාගාරය සඳහා ද්‍රවීකෘත ස්වභාවික වායු (Liquefied natural gas – LNG) ගබඩා කිරීම සඳහා යටිතල පහසුකම් සංවර්ධනය, LNG ප්‍රතිවායුකරණය කිරීම සහ සැපයීම සම්බන්ධයෙන් අදාළ සමාගම් අතර අගෝස්තු 20 වැනිදා අත්සන් කළ ගිවිසුම පිළිබඳව සඳහන් කරමින් මහනුවරදී පැවැති මාධ්‍ය හමුවකදීය.

ආණ්ඩුව මැතිවරණ උණුසුමෙන් ජනතාව හිරිවට්ටවා ලංකාවේ ආර්ථික සහ දේශපාලන ස්වෛරීත්වය විනාශ කරන ගිවිසුම් අත්සන් කරමින් සිටින බවට ද චෝදනා කළේය.

LNG හෙවත් ද්‍රවීකෘත ස්වභාවික වායුව ගෙන්වීම මේ ඉන්දීය සමාගමට ලබාදී ඇත්තේ ටෙන්ඩර් කැඳවීමකින් තොරව තරගකාරී මිල කැඳවීම සහ අවම මිලට අවස්ථාව ලබාදීම යන ප්‍රසම්පාදන නීති උල්ලංඝනය කරමින් බවට ද පුබුදු ජාගොඩ මහතා චෝදනා කළේය.

ඒ අනුව ඉහළ මිල ගණන් වලට ඉන්ධන මිලදී ගෙන අමතර බරක් විදුලි පාරිභෝගිකයා මත පැටවීමට නියමිත බවට ද ඔහු අනතුරු ඇඟවීය.

ඉන්දියාව සිදු කරන දේශපාලන හා ආර්ථික බලහත්කාරය ගැනත් ලංකාවේ ආණ්ඩුව ඒ ඉදිරියේ දණ ගැසීම ගැනත් ආණ්ඩුව වගේම විපක්ෂයත් නිහඬ බවද ඔහු පැවසීය.

එහිදී අදහස් දැක්වූ ඔහු මෙසේ ද කීවේය.

‘‘ලංකාවේ ජනතාවගේ ඇස් මැතිවරණ මල් වෙඩි සංදර්ශන වලින් නිලංකාර කර ලංකාවේ බලශක්ති ස්වෛරීත්වය මුළුමනින්ම පාහේ අහිමි කරන ගිවිසුමක් ඉන්දියානු සමාගමක් සමග අත්සන් කර තිබෙනවා. රාජ්‍ය සමාගමක් වන LTL holdings සමාගම සහ ඉන්දියාවේ Petro net LNG සමාගම අතර ගිවිසුමක් අත්සන් කළ බව කීවද එය අත්සන් කර ඇත්තේ විදුලි බල හා බලශක්ති ඇමැති කාංචන විජේසේකර සහ ඉන්දියානු මහ කොමසාරිස්වරයා අතරයි. මෙහි ප්‍රශ්න ගණනාවක් තිබෙනවා. පළමුවැන්න මේ ගිවිසුම කුමක්දැයි ජනතාවට හෙළිදරව් නොකිරීම. මේක මැතිවරණ උණුසුම මැද හොරෙන් අත්සන් කළේ.

දෙවැන්න ලංකාවට LNG හෙවත් ද්‍රවීකෘත ස්වභාවික වායුව ගෙන්වීම මේ ඉන්දීය සමාගමට ලබාදී ඇත්තේ ටෙන්ඩර් කැඳවීමකින් තොරව තරගකාරී මිල කැඳවීම සහ අවම මිලට අවස්ථාව ලබාදීම යන ප්‍රසම්පාදන නීති උල්ලංඝනය කරමින්. මේ නිසා ඉහළ මිල ගණන් වලට ඉන්ධන මිලදී ගෙන අමතර බරක් විදුලි පාරිභෝගිකයා මත පැටවීමට නියමිතයි.

ලෝක වෙළෙඳපොළෙන් අවම මිල ගණන් යටතේ LNG මිලදී ගත හැකිව තිබියදී මෙවැනි ගිවිසුමක් අත්සන් කරන්නේ ඉන්දියාවේ දේශපාලන බලපෑමක් මත බව පැහැදිලියි. ඉන්දියාව සිදු කරන දේශපාලන හා ආර්ථික බලහත්කාරය ගැනත් ලංකාවේ ආණ්ඩුව ඒ ඉදිරියේ දණ ගැසීම ගැනත් ආණ්ඩුව වගේම විපක්ෂයත් නිහඬයි. ඔක්කොගෙම කටේ පිට්ටු. ඉන්දියාව හැමෝගෙම කටේ පිට්ටු ඔබලා තියෙන්නේ. ජනාධිපතිවරණයේ අපේක්ෂකයෝ ගොඩක් හිටියට ප්‍රතිපත්තිමය කඳවුරු දෙකයි තියෙන්නේ. ජනාධිපති වෙන්න සූට් මහන අපේක්ෂකයෝ ඔක්කොම එක පැත්තක. මේ කොල්ලකාරී සහ විනාශකාරී ගමනට එරෙහි කඳවුරේ කොඩිය ඔසවාගෙන සිටින්නේ ජන අරගල සන්ධානයේ නුවන් බෝපගේ සහෝදරයා පමණයි.’’