කොළඹ ඉන්දීය මහ කොමසාරිස් කාර්යාලය විසින් සුවිශේෂී සන්ධිස්ථානයක් සනිටුහන් කරමින් අමර් චිත්‍ර කතා ජාතක කතා පොත් පහක සිංහල පරිවර්තන නවම් පුන් පොහෝ දිනයේදී පූජනීය කැලණිය රජ මහා විහාරයේදී එළි දක්වන ලදී.

ඉන්දියාවේ විශාලතම චිත්‍ර කතා පොත් ප්‍රකාශන ආයතනය වන අමර් චිත්‍ර කතා ආයතනය විසින් සිංහලට පරිවර්තනය කර ප්‍රකාශයට පත් කරන ලද මෙම ජාතක පොත් ධර්මය හදාරන සිසුන් ආකර්ෂණීය මාධ්‍යයක් හරහා බුදුන් වහන්සේගේ ඉගැන්වීම් වෙත සමීප කරයි.

දහම් පාසල් ශිෂ්‍ය ශිෂ්‍යාවන් සිය ගණනක් ඇතුළු බොහෝ පිරිසක් සහභාගී වූමෙම උත්සවයේදී ජාතක කතා පොත් සඳහා ඉහළ ප්‍රතිචාරයක් හිමි විය.

පොත් එළි දැක්වීමට අමතරව, මහ කොමසාරිස් කාර්යාලය විසින් දෙවන වරටත් සංවිධානය කරන ලද ‘බුද්ධං සරණං ගච්ඡාමි’ ප්‍රදර්ශනය ද කැලණි විහාර පරිශ්‍රයේ දී පැවැත්විණ. නව දිල්ලි නුවර ජාතික නූතන කලාගාරය විසින් සම්පාදනය කරන ලද මෙම ප්‍රදර්ශනය සඳහා බුදුන් වහන්සේගේ ජීවිතයේ වැදගත් සිදුවීම් සහ බෞද්ධ ඉගැන්වීම් දැක්වෙන සම්භාවනීය සිතුවම් එකතුවක් ඇතුළත් වේ.

උතුරු පළාතේ වෛද්‍ය සහ අධ්‍යාපනික පහසුකම් වැඩිදියුණු කිරීම සඳහා ජපානය සිය සහය ලබාදීමට එකඟත්වය පලකර තිබේ.

ඊයේ (11)  දිනයේදී ජපන් තානාපති ගරු අකිඔ ඉසොමතා මහතා සිය පළමු උතුරු පළාත් සංචාරයේදී මානුෂීය සංවර්ධන සංවිධානය [Humanitarian Development Organization (HDO)] සහ නෆීල්ඩ් බිහිරි සහ අන්ධ පාසල් යන රාජ්‍ය නොවන සංවිධාන දෙකක් සමඟ " බිම් මට්ටමේ මානව ආරක්ෂණ ව්‍යාපෘති සඳහා ආධාර ප්‍රදාන (GGP)" වැඩසටහන යටතේ ආධාර ප්‍රදාන ගිවිසුම් දෙකක් අත්සන් කළේය.

ගිවිසුම් සඳහා අත්සන් තැබීම උතුරු පළාත් ආණ්ඩුකාර නාගලිංගම් වේදනායහන් මහතා ඉදිරියේ යාපනය ආණ්ඩුකාර කාර්යාලයේදී සිදු විය.

උතුරු පළාතේ වෛද්‍ය සහ අධ්‍යාපනික පහසුකම් වැඩිදියුණු කිරීම වෙනුවෙන් මෙම ව්‍යාපෘති සඳහා ජපන් රජය ඩොලර් 173,659 (ආසන්න වශයෙන් රුපියල් මිලියන 50) වෙන් කර ඇත.

විශේෂයෙන්ම අවදානම් අවම කිරීම ප්‍රවර්ධනය කිරීමේදී, ගැටුම්වලින් පීඩාවට පත් ප්‍රදේශවල සංවර්ධනයට සහායවීම ශ්‍රී ලංකාවට ලබාදෙන ජපානයේ නිල සංවර්ධන ආධාරවල ප්‍රමුඛතාවයක් ලෙස පවතී.

ඉකුත් පෙබරවාරි 05 වැනිදා දිවයිනට පැමිණි ඉතාලි නාවික හමුදාවේ ‘ANTONIO MARCEGLIA’ යුද නෞකාව, සැපයුම් හා සේවා අවශ්‍යතා සපුරාගැනීමෙන් අනතුරුව, ශ්‍රී ලංකා නාවික නෞකා සයුර නෞකාව සමඟ පැවති ඒකාබද්ධ නාවික අභ්‍යාසයකින් පසුව ඊයේ (07) දිවයිනෙන් පිටත්ව විණි.

ශ්‍රී ලංකා නාවික හමුදාව විසින් නාවික හමුදාව විසින් එම නෞකාවට සම්ප්‍රදායානුකූලව සමුදීම, කොළඹ වරායේදී සිදු කෙරිණි. 

ඒ අනුව, නෞකා පෙළ හැඩයන් ඔස්සේ ගමන් කිරීම, නෞකා අතර පණිවුඩ හුවමාරුව වැනි නාවික අභ්‍යාසයන් සාර්ථකව සිදුකිරීමෙන් අනතුරුව, නෞකා අතර ආචාර සමාචාර සිදු කිරීමෙන් පසුව, මෙම ඒකාබද්ධ නාවික අභ්‍යාසය සාර්ථකව නිමාවට පත්විය. 

මේ නෞකාව දිවයිනේ රැදීසිටි කාලසීමාව තුල එහි අණදෙන නිලධාරී කොමාණ්ඩර් Alberto Bartolomeo සහ බටහිර නාවික විධානයේ ආඥාපති රියර් අද්මිරාල් චන්දිම සිල්වා අතර නිල හමුවක් එම විධාන මූලස්ථානයේදී සිදු කෙරුණු අතර, එහි නැව්මුළුව කොළඹ සහ ගාල්ල ප්‍රදේශයේ ආකර්ෂණීය සංචාරක ස්ථාන නැරඹීම සඳහා සංචාරය කිරීමටද එක්ව තිබේ.

තවද, විදේශීය නාවික හමුදාවන්ට අයත් නෞකාවන් ශ්‍රී ලංකාවේ සිදුකරනු ලබන මෙවැනි සංචාර මඟින් දෙරටේ නාවික හමුදාවන් අතර සුහදත්වය හා සහයෝගීත්වය වැඩිදියුණු වන අතර, එම නෞකා සංචාරයන්ට සමගාමීව සිදු කරනු ලබන ඒකාබද්ධ නාවික අභ්‍යාස තුළින් හුවමාරු කරගනු ලබන නව දැනුම කුසලතා සහ අත්දැකීම් තුළින්, ඉදිරියේදී සාගර කළාපයේ සාම්ප්‍රදායික නොවන සමුද්‍රීය තර්ජන ඇතුළු පොදු සමුද්‍රීය අභියෝග සඳහා සාමූහිකව ප්‍රථිචාර දැක්වීමට ශ්‍රී ලංකා නාවික හමුදාවට හැකියාව ලැබෙනු ඇත.