Connect with us

ඡායාරූප සටහන

කැලණියේ කණ්ඩුල ජනරජ ලාංඡනය වඩම්මයි (ඡායා)

Published

on

ශ්‍රී ලංකා නිදහස ලබා වසර 75 පිරිම නිමිත්තෙන් ජනධිපති රනිල් වික්‍රමසිංහ මහතාගේ විශේෂ ඉල්ලීම පරිදි ඓතිහාසික ශ්‍රී දළදා මාලිගාව මගින් සංවිධානය කළ ජනරජ පෙරහර ඊයේ (19) වීථි සංචාරය කළේය.

පෙරහරේ ජනරජ ලාංඡනය කැලණිය රජමහා විහාරයේ කණ්ඩුල හස්තියා වැඩම කළහ.

දෑල හස්තීන් වශයෙන් දළදා කණ්ඩුල සහ අත්තනගල්ලේ රජමහා විහාරයේ ගැමුණු හස්තියා ගමන් කළේය.

මෙම ජනරජ පෙරහර පැවැත්වෙන්නේ වසර තිස් හතරකට පසුවයි.

75 වන නිදහස් දින සැමරුමට සමගාමීව සංවිධානය කෙරුණු පෙරහරේ සමාරම්භක අවස්ථාවට ජනාධිපති රනිල් වික්‍රමසිංහ, අග්‍රාමාත්‍ය දිනේෂ් ගුණවර්ධන මහත්වරු සහභාගි වූහ.

මහනුවර මඟුල් මඩුව භූමියෙන් ආරම්භ වූ පෙරහර දළදා වීදිය, යටිනුවර වීදිය, කන්ද වීදිය ඔස්සේ පැමිණ රජ වීදියට පිවිස, නැවත මාළිගාවට ගෙවදීමෙන් පෙරහරේ කටයුතු අවසන් විය.

අලි ඇතුන් සහ දළදා මාළිගාවේ මෙන්ම සතර මහ දේවාලවල නර්තන කණ්ඩායම් ඇතුළු සියලු පෙරහර සංස්කෘතිකාංගවලින් මෙම ජනරජ පෙරහර සමන්විතවීම විශේෂිතය.

කන්ද උඩරට රජකම් කළ පුරාණ රජවරුන් විශේෂ ආගමික අවස්ථාවන් මුල් කරගනිමින් මෙවැනි පෙරහරවල් පවත්වා ඇති අතර අපගේ රජවරුන්ගේ පාලනය ගිලිහී ගොස් 1815 දී බ්‍රිතාන්‍ය කිරීටයට මෙරට යටත් වීමෙන් පසු පළමු වරට රජ පෙරහැර පෙරහැරක් පැවැත්වූවා යැයි වාර්තා වන්නේ වේල්සයේ කුමරු යන අන්වර්ථ නාමයෙන් හැඳින්වූ වික්ටෝරියා රැජනගේ පුත් වේල්සයේ ආදිපාද වරයා කන්ද උඩරට සංචාරයක යෙදුණු 1875 වසරේදීය. 

එම ආදිපාදවරයා ඓතිහාසික පත්තිරිප්පුවේ සිට එම පෙරහැර නැරඹුවා යැයි සඳහන්ය.

ඉන් අනතුරුව රජ පෙරහැරක් පවත්වා ඇත්තේ 1854 වසරේ අප්‍රේල් මාසයේ මෙරට සංචාරයක නිරත වූ දෙවැනි එළිසබත් මහ රැජින වෙනුවෙනි. 

ඇය වත්මන් මැද්දුම බණ්ඩාර උයනේ ඩී එස් සේනානායක පිළිරුව පිහිටුවා ඇති ස්ථානයේ පත්තිරිප්පුව හැඩයට සකස් කරන ලද විශේෂ පීඨිකාවක සිට එම පෙරහර නැරඹුවා යැයි සඳහන්ය.

ඉන් අනතුරුව 1978 වසරේදී ජනාධිපති ජේ.ආර්. ජයවර්ධන මහතා වෙනුවෙන් විශේෂ පෙරහැරක් සංවිධානය කොට ඇති අතර එයද ජේ. ආර්. ජයවර්ධන මහතා විසින් ඩී එස් සේනානායක පිළිරුව අසල ඉදිකරන ලද විශේෂ පීඨිකාවක සිට නරඹා තිබේ .

ඡායාරූප සටහන

දකුණු ආසියාවේ විශාලතම මාතෘ රෝහල විවෘත වේ (ඡායා)

Published

on

By

අනාගතයට ගැළපෙන පරිදි අධ්‍යාපන හා සෞඛ්‍ය ක්ෂේත්‍ර නවීකරණය නොකර රටේ අනාගතය පිළිබඳ බලාපොරොත්තු තැබිය නොහැකි බව ජනාධිපති රනිල් වික්‍රමසිංහ මහතා පැවසීය.

දශක තුනහමාරකට අධික කාලයක් අධ්‍යාපනය හා සෞඛ්‍යය සඳහා ප්‍රමාණවත් ප්‍රාග්ධන වියදම් ලැබී නොමැති බවත්  මෙම වසරේ සිට අධ්‍යාපනය හා සෞඛ්‍යය සඳහා වැඩි ප්‍රාග්ධන වියදම් ලබාදීමට සැලසුම් කර තිබෙන බවත් ජනාධිපතිවරයා පැවසීය.

ජනාධිපති  රනිල් වික්‍රමසිංහ මහතා මේ බව සඳහන් කර සිටියේ දකුණු ආසියානු කලාපයේ  විශාලතම මාතෘ රෝහල ලෙස සැලකෙන ගාල්ල කරාපිටියේ ඉදිකරන ලද “ජර්මන් – ශ්‍රී ලංකා මිත්‍රත්ව නව කාන්තා රෝහල”   ජනතා අයිතියට පවරාදීමේ අවස්ථාවට අද (27) පෙරවරුවේ එක් වෙමිනි.

මහල් හයකින් යුත් මෙම රෝහල ඇඳන් 640කින්,  ශල්‍යාගාර 6කින්,  හදිසි ප්‍රතිකාර ඒකක, දැඩි සත්කාර ඒකක, රසායනාගාර, ළදරු දැඩි සත්කාර ඒකක, විශේෂ ළමා ඒකක, ඇතුළු සියලු නවීන වෛද්‍ය පහසුකම්වලින් සමන්විත අතර  අප ජලය පිරිසිදු කර මුදා හැරිමේ ඒකකයකින් ද යුක්ත ය.

නිවාඩුවක් සඳහා 2004 වසරේ දෙසැම්බර් මාසයේ දී මෙරටට පැමිණ හබරාදූව, තල්පේ ප්‍රදේශයේ සංචාරක හෝටලයක නැවති සිටි ජර්මනියේ හිටපු චාන්සලර් හෙල්මුට්කෝල් මහතා සුනාමියෙන් දකුණු පළාතේ විශාලතම මාතෘ රෝහල වූ ගාල්ල මහමෝදර රෝහලට සිදුවූ හානිය සියැසින් දැක ගැනීමෙන් අනතුරුව මෙම නව මාතෘ රෝහල ලබා දීම සඳහා ඉදිරිපත් විය.

රෝහල ඉදි කිරිම සඳහා ජර්මන් රජය විසින් දෙන ලද ණය ආධාර මුදල යුරෝ මිලියන විසි පහකි. (රුපියල් කෝටි 357කි)

මුල් අවස්ථාවේ රෝහලේ ඉදිකිරීම් සඳහා වෙන් කෙරුණේ පර්චස් අටසියක් වුව ද පසුව තවත් ඉඩම් කට්ටි දෙකක් ලබා ගැනීම සිදු වූ අතර මේ වන විට රෝහලේ සමස්ථ භූමි ප්‍රමාණය  පර්චස් දහසකට ආසන්න ය.
නව මාතෘ රෝහල විවෘත කිරීමෙන් අනතුරුව ජනාධිපති රනිල් වික්‍රමසිංහ  මහතා  එහි නවීන ශල්‍යාගාර ඇතුළු පහසුකම් නිරීක්ෂණය කිරීමට ද එක් විය.

ජර්මානු රජයෙන් ලැබුණු මෙම පරිත්‍යාගය වෙනුවෙන් ශ්‍රී ලංකාවේ සිටින ජර්මානු තානාපති ආචාර්ය ෆෙලික්ස් නියුමන් (Felix Neumann)  මහතා වෙත සිහිවටන තිළිණයක් පිළිගැන්වීම ද ජනාධිපති රනිල් වික්‍රමසිංහ මහතා අතින් සිදු කෙරිණි. 

එම උත්සව සභාව ඇමතූ ජනාධිපති රනිල් වික්‍රමසිංහ මහතා මෙසේද පැවසීය.

එදා අපගේ වෛද්‍යවරුන්ට සිදු වුණේ මැලේරියාවට එරෙහිව සටන් කිරීමටයි. නමුත් දැන් වැඩිහිටි ජනතාවගේ සංඛ්‍යාව ඉහළ යාම සහ විවිධ රෝග ඇතිවීම නිසා සේඛ්‍ය ක්ෂේත්‍රයේ අභියෝග වැඩි වී තිබෙනවා. ඒ නිසා ඊට අනුරූපිව සෞඛ්‍ය සේවාවද පරිවර්තනය විය යුතුයි. 

ඒ වගේම මෙරට අධ්‍යාපන ක්‍රමයද පරිවර්තනයකට ලක් විය යුතුයි. අධ්‍යාපනය සහ සෞඛ්‍ය සඳහා මෙතෙක් වැය කෙරුණු ප්‍රාග්ධන මුදල් සීමා සහිත වුණා. එදා ප්‍රමාණවත් පරිදි සෞඛ්‍ය සහ අධ්‍යාපනය වෙනුවෙන් මුදල් යෙදවුණේ නැහැ. ඊට හේතුව යුද්ධයට විශාල මුදලක් වෙන් කිරීමට සිදු වීමයි. 

දෙවනුව අප ලබාගත් විශාල ණය ප්‍රමාණය නිසා එම පොළි ගෙවීමට වැඩි මුදලක් යෙදවීමට සිදුව තිබෙනවා. 1980 – 1989 මම අධ්‍යාපනය අමාත්‍යවරයා ලෙස කටයුත් කරන සමයේ අධ්‍යාපනය සඳහා වැඩි මුදලක් වෙන් කර ගැනීමට කටයුතු කළා. නමුත් පසුව විවිධ හේතු නිසා අධ්‍යාපනය වෙනුවෙන් වැඩි මුදලක් වැය කිරීමට අපට අවස්ථාව ලැබුණේ නැහැ. නමුත් අප ඉදිරියේ දී මේ කෙරෙහි වැඩි අවධානයක් යොමු කළ යුතුයි.

පසුගිය සමයේ අපට විශාල ලෙස ණය ගැනීමට සිදුවීම නිසා අපේ ආදායමෙන් 50%ක් වැය වන්නේ ණය සහ පොළී ගෙවීමටයි. මෙම වසරේ අයවැයෙන් ට්‍රිලියන 07කට වැඩි ප්‍රමාණයක් වැය කිරීමට නියමිතව තිබුණා. නමුත් එයින් ට්‍රිලියන 3.9ක් ණය ගෙවීමට වැය කිරීමට සිදුව තිබෙනවා. එයින් තුනෙන් එකක් ණය ආපසු ගෙවීමට සහ තුනෙන් දෙකක් පොළිය ගෙවිමට වැය කෙරෙනවා. ඒ වගේම තවත් ට්‍රිලියන 1.2ක් වැටුප් ගෙවීමට වැය වෙනවා. තවද පුනරාවර්තනය වියදම් වෙන් කළ පසු ඉතිරි වන්නේ ඉතා සුළු ප්‍රමාණයක්. එයිනුත් වාරිමාර්ග ඇතුළු එම කටයුතුවලටත් මුදල් වෙන් කළ යුතුයි.

මෙම තත්ත්වය සමග අපට රටක් ලෙස ඉදිරියට යාමට නොහැකියි. ජාත්‍යන්තර මූල්‍ය අරමුදල, ලෝක බැංකුව සහ ආසියනු සංවර්ධන බැංකුව කඩිනමින් ප්‍රතිව්‍යුහගතකරණයකට යොමු වන ලෙස අපට දැනුම් දී තිබෙන්නේ එම නිසයි. රට තුළ ආර්ථික ස්ථාවරභාවයක් ඇති කිරීමේ දී පළමු තීරණය වූයේ මේ වසරේ වියදමට අවශ්‍ය මුදල් රට තුළින් උපයා ගැනීමයි. අපට කෙසේවත් දැන් මුදල් මුද්‍රණය කිරීමට අවස්ථාවක් නැහැ. ඒ වගේම රාජ්‍ය බැංකුවලින් මුදල් ලබා ගැනීමට බැහැ. අපට අවශ්‍ය ආදායම් රට තුළින්ම උපයාගෙන ඉදිරියට යාමට සිදුව තිබෙනවා. 

එහිදී තිබූ එකම මාර්ගය වූණේ බදු වැඩි කිරීමයි. සියලුදෙනා අපට දොස් කිව්වා. නමුත් මෙම පියවර නිසා පළමු වතාවට අයවැය සඳහා මුදල් මුද්‍රණය කිරීමට අපට සිදු වුණේ නැහැ. මෙහිදී සියලුදෙනා මුහුණදුන් අසීරුතාව පිළිබඳ අපට අවබෝධයෙක් තිබෙනවා. නමුත් බදු මුදල් වැඩි කිරීම නිසා අද අපට අය වැය සඳහා ණය ලබා ගැනීමට සිදුවුණේ නැහැ. එහි ප්‍රතිඵල අද රට තුළ දක්නට තිබෙනවා. ඩොලරයට සාපේක්ෂව 370ට තිබු රුපියලේ අගය දැන් 300ට පහළ බැස තිබෙනවා. ඉදිරියේදී තවත් එය පහළ අගයකට එනවා. එවිට රුපියල ශක්තිමත් වෙනවා. 

ඒ වගේම උද්ධමනය අඩුවීම නිසා පොලි අඩු කිරීමට හැකියාව ලැබී තිබෙනවා. එවිට ව්‍යාපාර දියුණු වෙනවා. ව්‍යාපාර දියුණුවීමත් සමඟ රට දියුණු වෙනවා. අසීරුවෙන් වුවත් ගත් පියවර නිසා අද රටට ප්‍රතිලාභ ලැබී තිබෙනවා. ඒ වගේම රාජ්‍ය අංශයේ වැටුප් වැඩි කිරීමට අප පියවර ගත්තා. ඒ වගේම අඩු ආදායම් ලාභීන්ට ලබාදෙන් අස්වැසුම ප්‍රතිලාභය තුන් ගුණයකින් ඉහළ නැංවීමට මෙන්ම ප්‍රතිලාභීන්ගේ සංඛ්‍යාව වැඩි කිරීමට අප කටයුතු කළා. මේ හා සමගාමීව පුද්ගලික අංශයේ ද වැටුප් වැඩි කිරීමට කටයුතු කර තිබෙනවා. මෙම වැඩපිළිවෙළ සමග තව වසර 02ක් පමණ ඉදිරියට  යන විට අපට ණය ගෙවීමට තිබෙන ප්‍රමාණය ක්‍රමයෙන් අඩු වෙනවා. එම මුදල් රටේ සංවර්ධනයට යෙදවීමට හැකියාව ලැබෙනවා. 

අධ්‍යාපනය සහ සෞඛ්‍ය ක්ෂේත්‍රය තුළ නවීකරණයක් නොකර අනාගතය පිළිබඳ බලාපොරොත්තුවක් තැබිය නොහැකියි. 30 දශකයේ අප දියුණුවක් ලැබුයේ අධ්‍යාපන සහ සෞඛ්‍ය ක්ෂේත්‍රයේ තිබු දියුණුව නිසයි. ඒ වගේම 80 දශකයේ අප ඉදිරියට ගියේ අධ්‍යාපනය සහ සෞඛ්‍ය නිසයි. අද ලංකාව තුළ පමණක් නොවෙයි එක්සත් රාජධානියේ සෞඛ්‍ය ක්‍රමය ද ක්‍රියාත්මක වන්නේ අපේ වෛද්‍ය සේවාවන් නිසා. ඒ නිසා සෞඛ්‍ය සහ අධ්‍යාපන අංශය වෙනුවෙන් අවශ්‍ය මුදල් අපම උපයා ගනිමින් එම ක්ෂේත්‍රවල සීග්‍ර සංවර්ධනයක් ඇති කරමු කියා මම ප්‍රකාශ කරනවා. 

සෞඛ්‍ය සහ කර්මාන්ත අමාත්‍ය වෛද්‍ය රමේෂ් පතිරණ මහතා 
අති නවීන  අංග සම්පූර්ණ මාතෘ රෝහලක් ලබාදීම සම්බන්ධයෙන්  ජර්මන් හිටපු චාන්සලර් හෙල්මට් කෝල් මහතාට ස්තූතිවන්ත වෙනවා.  මා 2010 වසරේ පළමුවරට පාර්ලිමේන්තුවට පැමිණෙන විට  සිහින දෙකක් තිබුණා. සුනාමියෙන් විපතටමත් ගාල්ල බස් නැවතුම්පොල නැවත සකස් කිරීම සහ  එවකට වැඩ නැවතී තිබූ ජර්මන් ශ්‍රී ලංකා මිත්‍රත්ව කාන්තා රෝහල ඉදිකර ගැනීම එම සිහින දෙකයි.  2010 වසරේදී ගාල්ල බස් නැවතුම්පොළ  ඉදිකර ගැනීමට හැකි වුණා . ඒ වකවානුව වන විට මෙම රෝහලේ අත්තිවාරම් කණු  26ක් පමණක් ඉදිකර තිබුණා. මෙම රෝහල ඉදිකර ගැනීම සඳහා පැවති රජය සහාය ලබා දුන්නා. අද වන විට මෙම රෝහලේ  ඉදිකිරීම් සාර්ථක නිම කර ජනතාවට ලබාදීමට හැකි වී තිබෙනවා. 

2024 අයවැය මගින් සෞඛ්‍ය අමාත්‍යංශයට වෙන් කළ මුදලින් කරාපිටිය රෝහල සඳහා රුපියල් කෝටි 200ක මුදලක් වෙන් කර තිබෙනවා. ශල්‍ය ඒකකය, දන්ත ඒකකය, මහාචාර්ය ඒකකය සහ ආඝාත ඒකකය සඳහා  රුපියල් කෝටි100ක් හා වෛද්‍ය උපකරණ ලබා ගැනීම සඳහා තවත් රුපියල් කෝටි සීයක මුදලක් වෙන් කර තිබෙනවා. කරාපිටිය රෝහල  තාක්ෂණයෙන් සහ ප්‍රමාණයෙන් දෙවැනි වන්නේ කොළඹ ජාතික රෝහලට පමණයි. අද එකතු වන මාතෘ රෝහල සමඟ කරාපිටිය රෝහලේ සේවාවන් තවදුරටත් පුළුල් කිරීමට හැකියාව ලැබෙනවා.

විදේශ අමාත්‍ය ජනාධිපති නීතිඥ අලී සබ්‍රි මහතා 
ජනාධිපති රනිල් වික්‍රමසිංහ  මහතා මීට වසර දෙකකට පමණ පෙර රට බාරගත් දිනය සහ අද දිනය දෙස  බැලූ විට විශාල වෙනසක් රට තුළ සිදුව තිබෙනවා. එතුමාගේ තිබෙන විදේශ සබඳතා ලංකාවේ ආර්ථිකය ගොඩ ගැනීමට මහත් රුකුලක් වුණා. එහි එක් උදාහරණයක් පෙන්වා දෙනවා නම් ඉරානයට අප තිබූ ණය ප්‍රමාණය පසුගිය අගෝස්තු මාසයේ සිට ගෙවීම ආරම්භ කර අද වන විට  එම ණය ගෙවා අවසන් කර  ශ්‍රී ලංකාවේ අභිමානය ජාත්‍යන්තරය රැදවීමට කටයුතු කළා. 

සෞඛ්‍ය අමාත්‍යංශයේ ලේකම්  විශේෂඥ වෛද්‍ය පාලිත මහිපාල මහතා
නිදහස් සේඛ්‍ය සේවාවක් ලැබෙන ශ්‍රී ලංකාවේ  ජනතාවට විශේෂ වරප්‍රසාද ලැබී තිබෙනවා. ශ්‍රී ලංකාවේ ජනතාවගේ ආයු අපේක්ෂාව වර්ධනය වී තිබෙනවා. ඒ අනුව කාන්තාවකගේ ආයු අපේක්ෂාව සියයට අසූවක් වන අතර පිරිමියෙකුගේ ආයු අපේක්ෂාව 76ක් වෙනවා. රෝග ගණනාවක් මැඩලීමට අපේ සෞඛ්‍ය සේවාවන්ට මේ වන විටත් හැකි වී තිබෙනවා. ඒ බව ලෝක සෞඛ්‍ය සංවිධානය ද තහවුරු කර තිබෙනවා. ඒ වගේම විශිෂ්ට ශල්‍යකර්ම සිදු කිරීමේ හැකියාව ඇති වෛද්‍යවරුන් පිරිසක් අපගේ සෞඛ්‍ය සේවයේ සිටිනවා. එය මෙරට සෞඛ්‍ය සේවයේ ගුණාත්මක භාවයයේ එක් ලක්ෂණයක්. මේ සියලු සේවාවන් මගින් ශ්‍රී ලාංකේය ජනතාවගේ සෞඛ්‍ය මට්ටම උසස් කිරීමට හැකියාව ලැබෙන බව කිවයුතුයි.

ජර්මානු තානාපති ආචාර්ය ෆෙලික්ස් නියුමාන් මහතා
මෙම රෝහල නිල වශයෙන් සෞඛ්‍ය අමාත්‍යාංශය වෙත භාරදී තිබෙන අතර ගාල්ලේ සහ දකුණු පළාතේ ජනතාවගේ පූර්ණ ප්‍රයෝජනය සඳහා මෙම රෝහල පවත්වාගෙන යාමේ වගකීම දැන් ශ්‍රී ලංකා රජය  සතු වෙනවා. 
මෙම රෝහල විවෘත කිරීමේ අවස්ථාව වෙනුවෙන් ජනාධිපති රනිල් වික්‍රමසිංහ මහතා සහභාගි වීම පිළිබඳ ජර්මන් රජය විශේෂයෙන් සතුටට පත් වෙනවා. මේ වෙනුවෙන් සෞඛ්‍ය අමාත්‍යතුමාට සහ එම අමාත්‍යාංශයේ අනෙකුත් නිලධාරීන්ට මම මගේ සුබ පැතුම් පිරිනැමීමට කැමතියි. මෙම රෝහල සාර්ථකව ක්‍රියාත්මක වනු ඇතැයි මම බලාපොරොත්තු වෙනවා වගේම ඒ වෙනුවෙන් මෙහි සිටින කාර්ය මණ්ඩලයේ සියලුදෙනාටම මම සුබ පතනවා. ජර්මනිය සැමදා ශ්‍රී ලංකාවේ මිතුරෙක්. ඉදිරියටත් එම මිත්‍රත්වය අඛණ්ඩව පවතිනවා. 

දකුණු පළාත් ආණ්ඩුකාර විලී ගමගේ, රාජ්‍ය අමාත්‍යවරුන් වන මොහාන් ප්‍රියදර්ශන ද සිල්වා, ගීතා කුමාරසිංහ, පාර්ලිමේන්තු මන්ත්‍රීවරුන් වන වජිර අබේවර්ධන, සම්පත් අතුකෝරළ, හිටපු කතානායක කරු ජයසූරිය,  හෙල්මුට් කෝල් ගාල්ල මාතෘ රෝහල් පදනමේ වැඩ බලන සභාපති ජගන් වර්ත් ( Jurgen Weerth) යන මහත්වරු ඇතුළු පිරිසක් මෙම අවස්ථාවට එක්ව සිටියහ.

(ජනාධිපති මාධ්‍ය අංශය)

Continue Reading

ඡායාරූප සටහන

ලංකාවේ ඩිජිටල් පොදු යටිතල පහසුකම් හි පරිවර්තනයකට මුලපුරයි (ඡායා)

Published

on

By

ඉන්දියානු මහ කොමසාරිස් කාර්යාලය ශ්‍රී ලංකා රජයේ තාක්ෂණ අමාත්‍යාංශය හා එක්ව ඩිජිටල් පොදු යටිතල පහසුකම් (DPI) පිළිබඳව සංවිධානය කළ සමුළුවක් ඊයේ (26) කොළඹ දී පැවැත්විණ. 

සැසි තුනකින් සහ හමු කිහිපයකින් සමන්විත වූ එම සමුළුව මගින් සේවා සැපයීම යථාර්ථයක් බවට පත්කිරිම, ප්‍රජාවන් බලගැන්වීම සහ නව්‍යකරණයට ජවය ලබා දෙමින් ආර්ථිකය පෝෂණය කිරීම සඳහා ඩිජිටල් පොදු යටිතල පහසුකම් හි පරිවර්තනයක් සිදු කිරීම පිළිබඳ මෙම සමුළුවේදී අවධානය යොමු කෙරිණි.

සමුළුවේ මෙම සැසි තුන සඳහා ආරම්භක සැසියක් ද ඇතුළත් වූ අතර එහි ප්‍රධාන දේශනය පවත්වන ලද්දේ ජනාධිපති රනිල් වික්‍රමසිංහ මහතා විසිනි. මෙම සමුළුව ඉතා කාලීන බව ඒ මහතා සඳහන් ක‍ළේය. 

ශ්‍රී ලංකා ආර්ථිකය ඩිජිටල්කරණය සඳහා DPI ප්‍රධානතම සබලකාරකයක් බව ජනාධිපතිවරයා ප්‍රකාශ කළේය. ඉන්දියාවේ සාර්ථක ක්‍රියාමාර්ගයන් දේශීය වශයෙන් ක්‍රියාවට නංවමින් වර්ධනය වේගවත් කිරීමට ඇති හැකියාව ඉස්මතු කරමින් ජනාධිපති වික්‍රමසිංහ මහතා මෙම ක්ෂේත්‍රය තුළ ඉන්දියාව සමඟ සහයෝගයෙන් කටයුතු කිරීමේ අවශ්‍යතාවය අවධාරණය කළේය. 

පිළිගැනීමේ කතාව සිදු කරමින් මහ කොමසාරිස් සන්තෝෂ් ජා මහතා ඉන්දියාවේ ඩිජිටල් පරිවර්තනය සහ DPI සහ India Stack හි වැදගත්කම අවධාරණය කළ අතර ඉන්දියාවේ DPI මධ්‍යස්ථානයේ සම සභාපති ආචාර්ය ප්‍රමෝද් වර්මා මහතා ද සිය ඉදිරිපත් කිරීම අතරතුර දී ඒ සම්බන්ධයෙන් අදහස් දැක්වීය.

සමුළුවේ පළමු සැසිය Accelerating Digital Sri Lanka යන තේමාව යටතේ ද දෙවන සැසිය  Unlocking the Digital Stack යන තේමාව යට‍තේ ද පැවති අතර එම සැසි ඉන්දියාවේ, ශ්‍රී ලංකාවේ සහ කලාපයේ විද්වතුන් සහභාගී වූ සාකච්ඡාවන්ගෙන් සමන්විත විය. පළමු සැසිය ශ්‍රී ලංකාව තුළ DPI භාවිතා කිරීම සඳහා මාර්ග සිතියම සහ එහි ප්‍රතිඵලයක් ලෙස සියළු අංශවල ඊ-පාලනය වේගවත් වීම පිළිබඳව අවධානය යොමු කරන ලදී. පළමු සැසියේ ආරම්භක දේශනය සිදු කරන ලද්දේ තාක්ෂණ රාජ්‍ය අමාත්‍ය කනක හේරත් මහතා විසිනි. දෙවන සැසිය පදනම් DPI වලින් ඔබ්බට ගිය අතර ආරම්භක සමාගම් ක්ෂේත්‍රයේ ධනාත්මක බාහිරතා පිළිබඳව විශේෂ අවධානයක් යොමු කරමින් මැරින්ග් තාක්ෂණය, වෙළඳපොළ සහ පාලනය පිළිබඳව සාකච්ඡා කරන ලදී. මෙම සැසිය පාර්ලිමේන්තු මන්ත්‍රී ආචාර්ය හර්ෂ ද සිල්වා මහතා විසින් ආරම්භ කරන ලදී.

සමුළුව ඉන්දියවෙන් පැමිණි විද්වතුන් හා ශ්‍රී ලංකාවේ අදාළ පාර්ශවකරුවන් සමඟ පැවති හමු සහ අර්ථදායි සාකච්ඡා රැසකින් ද සමන්විත විය. ඩිජිටල් ඉන්දියා සහ ස්ටාට්අප් ඉන්දියා වැඩසටහන් සම්බන්ධයෙන් කටයුතු කරන ඉන්දීය රජයේ අමාත්‍යාංශවල ජ්‍යෙෂ්ඨ නිලධාරීන් ඩිජිටල් ආර්ථිකය සම්බන්ධයෙන් කටයුතු කරන ශ්‍රී ලංකා රජයේ කාර්ය කණ්ඩායම් හය මෙහෙයවන ජ්‍යෙෂ්ඨ නිලධාරීන් සමඟ පැවති සාකච්ඡාව ද මෙම වැඩසටහනේ වැදගත් අංගයක් විය.

සමුළුවට සමගාමීව ආරම්භක සමාගම් සහ කර්මාන්ත ක්ෂේත්‍රය තුළ අනාගතයට යොමු වූ සබඳතා ද ස්ථාපනය කරන ලදී. මාර්තු 26 වන දින සන්ධ්‍යා‍වේදී, ස්ටාට්අප් ඉන්දියා කණ්ඩායම ශ්‍රී ලංකාවේ ආරම්භක සමාගම් සඳහා ධාරිතා සංවර්ධන වැඩමුළුවක් පැවැත්වූ අතර ඒ සඳහා ව්‍යාපාරික අදහස් ඉදිරිපත් කිරීම සහ ඵලදායි අලෙවිකරණය පිළිබඳ ප්‍රවීණයන්ගේ සැසි ඇතුළත් විය. IIT චෙන්නායි ඉන්කියුබේටර් “ප්‍රවර්තක්” හි ප්‍රධානීතුමා ශ්‍රී ලංකාවේ ස්ටාට්අප් ඉන්කියුබේටර් ආයතන සමඟ සාකච්ඡා පැවැත්වීය. NASSCOM හි සභාපතිතුමා ශ්‍රී ලංකා ජනාධිපතිතුමා සමඟ සාකච්ඡාවක් පැවැත්වීය.

මෙම සමුළුව 2023 ජූලි මාසයේ ශ්‍රී ලංකා ජනාධිපතිතුමාගේ ඉන්දීය සංචාරය අතරතුර එතුමා සහ ඉන්දීය අග්‍රාමාත්‍යතුමා විසින් ඩිජිටල් ක්ෂේත්‍රය ඇතුළු ක්ෂේත්‍රවල සම්බන්ධකතාවය ප්‍රවර්ධනය කිරීම සඳහා එකඟ වන ලද දැක්ම ප්‍රකාශය ක්‍රියාවට නැංවීම සඳහා ගනු ලබන ක්‍රියාමාර්ග මාලාවක තවත් පියවරකි. ශ්‍රී ලංකා ඒකීය අනන්‍යතා (SL-UDI) ව්‍යාපෘතිය ස්ථාපනය කිරීම සඳහා ඉන්දියාව විසින් ලබා දෙන ප්‍රදානය ශ්‍රී ලංකාවේ ඩිජිටල් පරිවර්තනය උදෙසා DPI විසින් සවිබල ගැන්වූ ප්‍රධානතම පදනමකි. 

ඊයේ පැවති විවිධ නියැළීම් ශ්‍රී ලංකාවේ අවශ්‍යතා සහ ප්‍රමුඛතාවයන්ට අනුව සහ ශ්‍රී ලංකාවේ ජනතාවට පුරවැසි කේන්ද්‍රීය සේවාවන් කාර්යක්ෂමව ලබා දීම සඳහා ඉන්දියාවේ DPI ප්‍රයෝජනයට ගැනීමට පවතින සුවිසල් විභවතාවය අවධාරණය කළේය.

Continue Reading

ඡායාරූප සටහන

2024 පාසල් ආහාර වැඩසටහන ඇරඹේ (ඡායා)

Published

on

By

රටේ දරුවන්ට හොඳ අධ්‍යාපනයක් ලබාදීමට නම් විෂය දැනුම ලබාදී විභාගවලට ඉදිරිපත් කිරීම මෙන්ම ඔවුන්ගේ පෝෂණය ද සුරක්ෂිත කළයුතු බව ජනාධිපති රනිල් වික්‍රමසිංහ මහතා පෙන්වා දුන්නේය.

එසේම කෘත්‍රීම බුද්ධිය ඇතුළු නවීන තාක්ෂණ දැනුම දරුවන්ට ලබාදිය යුතු බව පැවසූ ජනාධිපතිවරයා ඒ අනුව පාසල් අධ්‍යාපනයේ සහ විභාග ක්‍රමයේ වෙනසක් පිළිබඳ රජයේ අවධානය යොමුව ඇති බවද සඳහන් කළේය.

ජනාධිපති රනිල් වික්‍රමසිංහ මහතා මේ බව සඳහන් කර සිටියේ නාරාහේන්පිට සුජාතා බාලිකා විද්‍යාලයේ  අද (25) පෙරවරුවේ පැවැති “2024  වර්ෂයේ පාසල් ආහාර වැඩසටහනේ“ සමාරම්භක අවස්ථාවට එක් වෙමිනි.

දිවයිනේ 1- 5 දක්වා ශ්‍රේණිවල සියලු‍ම පාසල් සිසුන්ට පාසලේ දී ප්‍රධාන ආහාර වේලක් ලබා දීමට මේ අනුව අධ්‍යාපන අමාත්‍යාංශය පියවර ගෙන තිබේ. පෝෂණවේදීන්ගේ නිර්දේශ ද සැලකිල්ලට ගෙන දිනපතා සිසුන් අධ්‍යාපන කටයුතුවල නිරත වීමට පෙර පෙරවරු 7.30ත් 8.30 අතර කාලය තුළ මෙම උදෑසන ආහාර වේල ලබා දෙන ලෙස ජනාධිපති රනිල් වික්‍රමසිංහ මහතා විසින් උපදෙස් ලබා දී ඇත.

“නිරෝගී ක්‍රියාශීලී දරු පරපුරක්” යන තේමාව යටතේ මෙවර 2024 වර්ෂය සඳහා ක්‍රියාත්මක පාසල් ආහාර වැඩසටහන මගින් පාසල් සිසුන් අතර පෝෂණ ගැටලු‍ අවම කිරීම, සිසුන්ගේ දෛනික පාසල් පැමිණීම වර්ධනය කිරීම, යහපත් ආහාර පුරුදු හා සෞඛ්‍ය පුරුදු වර්ධනය කිරීම, අධ්‍යාපන සාධන මට්ටම් වර්ධනය සඳහා දායක වීම සහ දේශීය ආහාර සංස්කෘතිය ගොඩනැගීම යන මූලික අරමුණු ඉටු කරගැනීමට අපේක්ෂිත ය.

රජයේ පාසල් 9134ක ප්‍රාථමික ශ්‍රේණිවල සියලු‍ සිසුන් හා 100ට අඩු  සිසුන් සංඛ්‍යාවක් සිටින සියලු‍ම පාසල් ද ආවරණය වන පරිදි සිසුන් මිලියන 1.6ක් මෙවර පාසල් ආහාර වැඩසටහනේ ප්‍රතිලාභීහු වෙති. මේ සඳහා රජය රුපියල් මිලියන 16,600ක අයවැය ප්‍රතිපාදන සෘජුවම පළාත් සභා නවය වෙත වෙන් කර ඇති අතර ලෝක ආහාර වැඩසටහන හා එක්සත් ජනපද කෘෂිකර්ම දෙපාර්තමේන්තුව (USDA) ඇතුළු වෙනත් සංවිධාන විසින් ද අනුග්‍රාහකත්වය සපයනු ලබයි.

මෙම පෝෂණ වැඩසටහනට අවශ්‍ය ආහාර වර්ග ප්‍රධාන දේශීය සැපයුම්කරුවන් විසින් සපයනු ලබන අතර එය සෘජු හා වක්‍ර නව රැකියා උත්පාදනය ඔස්සේ මෙරට නිෂ්පාදන ආර්ථිකය ශක්තිමත් කිරීමට ද දායකවීමකි.

මෙම පාසල් ආහාර වැඩසටහනට අදාළ සියලු‍ මූල්‍ය පාලනයන් විනිවිදභාවයක් හා වාර්තා සහිතව පවත්වාගෙන යෑමේ යාන්ත්‍රණයක් ද ක්‍රියාත්මක වෙයි. ප්‍රතිපත්ති සම්පාදනයේ සිට එහි සියලු‍ ප්‍රධාන මෙහෙයවීම හා අධීක්ෂණ කටයුතු අඛණ්ඩව නිරීක්ෂණය කරමින් අවශ්‍ය මැදිහත්වීම් සිදු කරනු ලබන්නේ අධ්‍යාපන අමාත්‍යාංශය වන අතර අමාත්‍යාංශයේ සෞඛ්‍ය හා පෝෂණ ශාඛාවට ඊට අදාළ කාර්යන් පවරා ඇත.

මෙම අවස්ථාවට සහභාගිවීම වෙනුවෙන් විදුහල්පතිනි ප්‍රියංගිකා විජේසිංහ මහත්මිය විසින් ජනාධිපති රනිල් වික්‍රමසිංහ මහතා වෙතද සිහිවටන තිළිණයක් පිළිගැන්වූවාය.උත්සව සභාව ඇමතූ ජනාධිපති රනිල් වික්‍රමසිංහ මහතා වැඩිදුරටත් මෙසේ ද පැවසිය : 

මන්දපෝෂණය අපේ රටේ විශාල ප්‍රශ්නයක් බවට පත්ව තිබෙනවා. අප අස්වැසුම වැඩසටහන මගින් අඩු ආදායම්ලාභී ජනතාවට ලබාදෙන මුල්‍ය සහනය තුන් ගුණයකින් ඉහළ නංවා තිබෙනවා. පාසල් දරුවන් අතර මන්දපෝෂණය ඉහළයාමට ආදායම් මට්ටම පමණක් හේතු වී නැහැ. ඇතැම් සිසුන් පාසල් වෙත පැමිණීමට නිවසින් පිටත්වන්නේ උදෑසන 6.00ට පමණ. එවිට ඔවුන්ගේ උදෑසන ආහාර වේල මඟ හැරෙනවා. ඒ වගේම දිවා ආහාර වේලත් මඟ හැරි යනවා. ඒ නිසා කුමන තරාතිරමකට අයත් වුවත්, කුමන ජාතියකට, ආගමට අයත් වුවත් සියලු දරුවන් මේ ප්‍රශ්නයට මුහුණ දී සිටිනවා. ඒ නිසා සිසුන්ට පාසල තුළ ආහාර වේලක් ලබා ගැනිමට අවස්ථාව සලසා දීම ඉතා වැදගත් වෙනවා.

නවීන අධ්‍යාපන ක්‍රමයක් රට තුළ ඇති කිරීමට අප මේ වන විට කටයුතු කරමින් සිටිනවා. අප නිර්මාණය කළ යුතුතේ 2024ට පමණක් නොව 2030ට සුදුසු අධ්‍යාපන ක්‍රමයක්. එම වැඩකටයුතු දැන් අප කරගෙන යනවා. ගුරුවරු පුහුණු කිරිම, නවීන තාක්ෂණ දැනුම ලබාදීම වැනි වැඩසටහන් ක්‍රියාත්මක කර තිබෙනවා.

අධ්‍යාපන අමාත්‍ය ආචාර්ය සුසිල් ප්‍රේමජයන්ත මහතා : දුෂ්කර පළාත්වල පාසල් සිසුන් සඳහා මෙම ආහාර වැඩසටහන මීට පෙර ක්‍රියාත්මක කරමින් තිබුණා.  නමුත් මේ වසරේ සිට පළමු ශ්‍රේණියේ සිට පහ ශ්‍රේණිය  දක්වා  සිසුන්ට පෝෂණ ආහාර වේලක් ලබාදීමේ වැඩසටහන ආරම්භ කිරීමට කටයුතු කරනවා. මේ සඳහා මුදල් අමාත්‍යවරයා ලෙස රනිල් වික්‍රමසිංහ   ජනාධිපතිවරයා  රුපියල් මිලියන 16,600ක් වෙන්කර තිබෙනවා. ඊට අමතරව එක්සත් ජාතීන්ගේ සංවිධානය ආහාර වැඩසටහන මගින් ආධාර ද ලැබෙනවා. ඒ අනුව ලක්ෂ 17ක් වන ප්‍රාථමික ශ්‍රේණියේ සිසුන් සියලු දෙනාටම උදෑසන පෝෂණ ආහාර වේලක් ලබාදීමට හැකිව තිබෙනවා. නියමිත ප්‍රමිතියට අදාළ පෝෂණීය ආහාර වේලක් ලබාදීමට අදාළ අංශ වෙතට මේ වන විටත් උපදෙස් ලබා දී තිබෙනවා. ඉගැන්වීමට පෙර සියලු දරු දැරියන්ගේ කුස පිරවීම තුළින් හොදින් අධ්‍යාපන කටයුතුවල නිරතවීමට අවස්ථාව ලැබෙන අතර දරුවන්ගේ මානසික තත්ත්වය වැඩි කිරීමටත් මෙමගින් හැකියාව තිබෙනවා.

බස්නාහිර පළාත් ආණ්ඩුකාර මාර්ෂල් ඔෆ් ද එයාර් ෆෝස් රොෂාන් ගුණතිලක, රාජ්‍ය අමාත්‍යවරුන් වන විජිත බේරුගොඩ, අරවින්ද් කුමාර් යන මහත්වරු සහ අධ්‍යාපන අමාත්‍යාංශයේ නිලධාරින්, ආචාර්ය මණ්ඩලය, දෙමාපියන් ඇතුළු පිරිසක් මෙම අවස්ථාවට එක්ව සිටියහ.

(ජනාධිපති මාධ්‍ය අංශය)

Continue Reading

Trending

Copyright © 2023 Sri Lanka Mirror. All Rights Reserved