ආධ්‍යාත්මික නායක – දලයි ලාමා තුමාගේ සංචාරයකින් ශ්‍රී ලංකාව සහ චීනය අතර මිත්‍රත්වය පළුදු විය හැකි බව කොළඹ චීන තානාපති කාර්යාලයේ වැඩබලන තානාපති – හූ වෙයි මහතා පවසයි.
පසුගිය සතියේ මහනුවර දිස්ත්‍රික්කය පුරා සිදුකෙරුනු ෆා ෂියෑන් පුණ්‍ය භාරයේ නවතම අදියර මහනුවර නෙල්ලිගල විහාරස්ථානයේ දී අවසන් කිරීමෙන් පසුව ‘ශ්‍රී ලංකා මිරර්’ හා විශේෂ සම්මුඛ සාකච්ඡාවකට එක්වෙමින් ඔහු මේ බව පැවසීය.
දෙරට අතර පවතින අන්‍යෝන්‍ය විශ්වාසය ‘එක් චීනයක්’ ප්‍රතිපත්තිය මත පදනම් වූවක් බව පැහැදිලි කළ හූ වෙයි මහතා යාපනය හෝ මහනුවර ශ්‍රී ලංකාවේ කොටසක් වන්නා ලෙස, ටිබෙටයද ස්වාධීන රටක් නොව චීනයේ කොටසක් බව පැහැදිලි කළේය.
මේ පිළිබඳව මාධ්‍ය වාර්තා පළ වී තිබුණු බවත්, සිය මහනුවර සංචාරයේදී මහා නායක හිමිවරුන් ඇතුළු භික්ෂූන් වහන්සේලා සමඟ මේ ගැන සාකච්ඡා කළ බවත්, ඔවුන් කිසිවෙක් එවැනි සංචාරකයකට ආරාධනයක් සිදුනොකළ බවට සහතික වූ බවත් ඔහු වැඩිදුරටත් සඳහන් කළේය.
VIDEO
ණය ගැටළුවට විසඳුම්
මේ අතර, ශ්‍රී ලංකාවේ ණය ප්‍රතිව්‍යුහගත කිරීමේ ක්‍රියාවලිය පිළිබඳව අදහස් දක්වමින් හූ වෙයි මහතා පැවසුවේ ණය ගෙවීම් නැවැත්වීම ප්‍රකාශයට පත් කළ දිනයේ සිට චීනය විසින් ශ්‍රී ලංකා රජය සමඟ සාකච්ඡා අරඹා තිබුණු නමුත්, පසුගිය වසරේදී මෙරට පැවති තත්ත්වය හා ආණ්ඩු වෙනස් වීම වැනි කරුණු සමඟ ප්‍රමාදයන් සිදු වූ බවයි.
“අතීතයේ කුමක් සිදුවූවත් ඒ ගැන ගැටළුවක් නැහැ. නමුත් අප අවධානය යොමු කිරීමට උත්සහ කරන්නේ වර්තමානයේ හා ඉදිරියට සිදුවන දේ ගැනයි. මේ වන විටත්, බීජිං හි සිටින මගේ සගයන් මෙම ණය ප්‍රශ්නයට විසඳුමක් සෙවීමට ඉතා වෙහෙස මහන්සි වී වැඩ කරනවා,” යැයි ඔහු පැවසීය.
වැඩියෙන් උදව් කළ යුතු සමයයි
ෆා ෂියෑන් ව්‍යාපෘතියේ ඉදිරි ක්‍රියාමාර්ග පිළිබඳව අදහස් දක්වමින් වැඩබලන චීන තානාපතිවරයා ප්‍රකාශ කළේ මුළු දිවයිනම ආවරණය වන ලෙස මෙම ව්‍යාපෘතිය දියත් කිරීමට බලාපොරොත්තු වන බවත්, මේ අවස්ථාවේදී ශ්‍රී ලාංකිකයන් මුහුණ දෙන දුෂ්කරතා පිළිබඳව වැඩි වශයෙන් චීන ජනතාව දැනුවත් කිරීමට බීජිං අගනුවර හා කතිකා කරන බවත්ය.
“ඉදිරියටත් සහය දීමට සිය මිත්‍රත්වයේ හස්තය තවදුරටත් දිගු කිරීමට ඔවුන් සතුටු වන බව මං සිතනවා,” යැයි පැවසූ හූ වෙයි මහතා පැවසුවේ, ජීවත් වන නගරය, වාර්ගිකත්වය හෝ ඔවුන්ගේ ආගමික විශ්වාසයන් වැනි කරුණු අදාල නොවන බවත් සියලුම ශ්‍රී ලාංකිකයන් ඔවුන්ගේ මිතුරන් බවත්ය.
“අතීතයේ අප වෙනුවෙන් කළ මෙන් මේ, ශ්‍රී ලාංකික මිතුරන් වෙනුවෙන් අප වැඩියෙන් උදව් කළ යුතු සමයයි….” යහපත් කාල වලදී සැවොම හොඳ මිතුරන් වුවත්, සැබෑ මිතුරා කවුදැයි හඳුනාගැනීමට හැකි වන්නේ අයහපත් කාල වලදී බවද වැඩ බලන චීන තානාපතිවරයා වැඩිදුරටත් පැවසීය.
ෆා ෂියෑන් පුණ්‍යා භාරයේ නවතම අදියර ජනවාරි 11 සහ 12 යන දිනවල මහනුවර දිස්ත්‍රික්කයේ දී පැවැත්වුණ අතර, මහජන චීන සමූහාණ්ඩුවේ ජනතාවගේ පරිත්‍යාගයක් ලෙස මහනුවර දිස්ත්‍රික්කයේ දළදා මාලිගාව, නෙල්ලිගල විහාරස්ථානය ඇතුළු විහාරස්ථාන කිහිපයක් හරහා පවුල් 9,600කට වියළි සලාක මළු බෙදා දෙන ලදී.
(ඡායාරූප සහ වීඩියෝ : කැළුම් ශිවන්ත | ශානිකා ජයසේකර)
