චන්ද්‍රයා විසින් වඩා යහපත් දිවියක් සඳහා බලාපොරොත්තු රැගෙන එන අතරම, චීන හා ශ්‍රී ලාංකික ජනතාවගේ හදවත් සමීප කරමින් ජාතීන් දෙක අතර සංස්කෘතික අවබෝධයේ පාලමක් ගොඩනඟන බව ශ්‍රී ලංකාවේ චීන තානාපති – චී ජන්හොං මහතා පවසයි.

ඔහු මේ බව පැවසුවේ පසුගිය 16 වැනිදා කොළඹදී පැවැත්වුණු චීන මධ්‍ය සරත් සෘතු උත්සව සැමරුම අතරතුරේදීය.

මීට දස වසරකට පෙර දෙරට නායකයන් අතින් විවෘත වූ චීන සංස්කෘතික මධ්‍යස්ථානය, එතැන් පටන් දෙරට අතර  සංස්කෘතික හා සංචාරක හුවමාරුවන් වර්ධනය කරමින් දෙරට ජනතාවන් සම්බන්ධ කරන පාලමක් ලෙස කටයුතු කළ බවද තානාපතිවරයා මෙහිදී පැවසීය.

“අ මූන්මන්ට් ටු රිමෙම්බර්’ (A Moonment to Remember’) ලෙස නම් කර තිබුණු මෙම උත්සවයේ ප්‍රධාන අමුත්තා ලෙස කතානායක මහින්ද යාපා අබේවර්ධන මහතා එක්විය.

කොළඹ පිහිටි චීන තානාපති කාර්යාලයේ මෙන්ම චීනයේ සංස්කෘතික හා සංචාරක අමාත්‍යංශයේ සත්කාරකත්වය යටතේ පැවැත්වුණු මෙම සැමරුමට චීනයේ ග්වංෂි ජුවාං (Guangxi Zhuang) ස්වායත්තයේ කලාකරුවන් පිරිසක් එක්විය.

ඊට අමතරව, චීන බස හදාරණ ශ්‍රී ලාංකික සිසු සිසුවියන් පිරිසක්ද මෙහිදී කවියක් ඉදිරිපත් කර තිබුණි.

මෙරට පිහිටි චීන සංස්කෘතික මධ්‍යස්ථානයට දස වසරක් පිරීම නිමිත්තෙන් ඡායාරූප ප්‍රදර්ශනයක් ද මෙහි පැවැත්වුණු අතර, මූන්කේක් සෑදීම ඇතුළු සංස්කෘතික ක්‍රියාකාරකම් වලට එක්වීමටද උත්සවයේ අමුත්තන් හට හැකි විය.

චීන මැද සරත් සෘතු උත්සවය යනු චීනයේ සමරනු ලබන ප්‍රධානතම සාම්ප්‍රදායික උත්සව හතරෙන් එකකි.
චන්ද්‍ර දින දර්ශනයේ අටවන මාසයේ 15වන දින හෙවත් සරත් ඍතුවේ මැද සමයේදී සමරනු බැවින් මෙම උත්සවය මධ්‍ය සරත් ඍතු උත්සවය ලෙස හැඳින්වේ. එදිනට සිය පවුලේ සාමාජිකයන් හා එක්ව, පූර්ණ චන්ද්‍රයාගේ අලංකාරය විඳිමින්, පහන් කූඩු දල්වමින් හා මේ වෙනුවෙන්ම සෑදෙන මූන්කේක් බෙදාගනිමින් චීන ජාතිකයන් විසින් මෙම උත්සවය සමරනු ලබයි.

මධ්‍ය සරත් ඍතු උත්සවය මේ වසරේදී යෙදී තිබුණේ සැප්තැම්බර් 17 වැනිදාටය.

(ඡායා : ශානිකා ජයසේකර)

මෙරට වාහන එකලස් කිරීමේ ක්ෂේත්‍රයේ සුවි‍ශේෂී සංධිස්ථානයක් සනිටුහන් කරමින් කුලියාපිටිය වෙස්ටර්න් ඔටෝමොබයිල් ඇසෙම්බ්ලි ප්‍රයිවට් ලිමිටඩ් (WAA) නවීන වාහන එකලස් කිරීමේ කර්මාන්තශාලාව ඊයේ (17) ජනාධිපති රනිල් වික්‍රමසිංහ මහතා අතින් විවෘත කෙරුණි.

දකුණු ආසියාවේ දැවැන්ත වාහන එක්ලස් කිරීමේ කර්මාන්තශාලාවක් වන වෙස්ටර්න් ඔටෝමොබයිල් ඇසෙම්බ්ලි ප්‍රයිවට් ලිමිටඩ් කර්මාන්ත ශාලාව සඳහා වැය කර ඇති මුදල අමෙරිකානු ඩොලර් මිලියන 27කි.

මෙම කර්මාන්තශාලාවේ එකලස් කරන ලද පළමු වාහනය වන ආසන 15 ක මගී වෑන් රථයක් මෙම මාසය අවසානයේ වෙළෙඳපොළට නිකුත් කිරීමට නියමිතය.

ගෝලීය මෝටර් රථ විශේෂඥයින් විසින් නිර්මාණය කර ඇති ඉහළම මට්ටමේ ජාත්‍යන්තර යන්ත්‍රෝපකරණවලින් සමන්විත මෙම කර්මාන්තශාලාව මඟින් තරුණ තරුණියන්ට සෘජු සහ වක්‍ර රැකියා අවස්ථා රැසක් නිර්මාණය කෙරෙන බව ජනාධිපති මාධ්‍ය අංශය පවසයි.

එසේම ගෝලීය කර්මාන්ත අවශ්‍යතාවලට අනුකූලව ජාත්‍යන්තර මට්ටමේ වෘත්තීය පුහුණු ආයතනයක් ද මෙහි පවත්වාගෙන යන අතර මෙරට තරුණ තරුණියන්ට එම පුහුණුව මඟින් විදේශ රැකියාවන් සඳහා යොමුවීමට අවස්ථාව සැලසෙනු ඇත.

ඊයේ (17) පස්වරුවේ කුලියාපිටිය වෙස්ටර්න් ඔටෝමොබයිල් ඇසෙම්බ්ලි ප්‍රයිවට් ලිමිටඩ් (WAA) නවීන වාහන එකලස් කිරීමේ කර්මාන්ත ශාලාව වෙත පැමිණි ජනාධිපති රනිල් වික්‍රමසිංහ මහතා සමරු ඵලකය නිරාවරණය කර කර්මාන්ත ශාලාව විවෘත කළේය.

චීනය ඇතුළු රටවල් වල විද්‍යාත්මක පර්යේෂණ යාත්‍රා ලංකාවට ඇතුළු නොකිරීමට ගත් තීන්දුව ‘රාජ්‍ය තාන්ත්‍රික ජයග්‍රහණයක්’ ලෙස ඇතැම් රටවල් සැලකූ බව ශ්‍රී ලංකාවේ සිටින ඉහළ පෙළේ චීන රාජ්‍ය තාන්ත්‍රික නිලධාරියෙක් පැවසීය.

කොළඹ චීන තානාපති කාර්යාලයේ නියෝජ්‍ය ප්‍රධානී – යැන්වෙයි ජූ මහතා ඊයේ (සැප්. 12) කොළඹ වරාය නගරයේ දී මාධ්‍යවේදීන් පිරිසක් සමඟ පැවැති සාකච්ඡාවකදී මේ තීන්දුව සම්බන්ධයෙන් චීන සමාජ මාධ්‍ය තුළ පුළුල් කතිකාවතක් ඇති වී තිබුණු බවද කියා සිටියේය.

මිත්‍ර රටක් ලෙස ශ්‍රී ලංකාව මෙවැනි ක්‍රියාමාර්ගයක් ගැනීමට හේතුවූයේ ඇයිද පිළිබඳව චීන ජනතාව ප්‍රශ්ණ නගා තිබූ බව යැන්වෙයි මහතා මෙහිදී පැවසීය.

ස්වාධීන හා ස්වෛරී රාජ්‍යයක් ලෙස ශ්‍රී ලංකාව ගත් තීරණයට චීනය සම්පූර්ණයෙන්ම ගරු කරන නමුත්, මෙම තීන්දුව ශ්‍රී ලංකා රජය විසින් ස්වාධීනව ගනු ලැබුවක්ද යන්න පිළිබඳව ගැටළු සහගත බව ඔහු පැවසීය.

“මේ තීරණය ශ්‍රී ලංකා රජය විසින් ගෙන තිබුණේ ස්වාධීනවද නැත්නම් බාහිර බලපෑම් නිසාද කියන එක තවත් ගැටළුවක්. අපිටත් කටකතා ගොඩක් ආරංචි වුණා… ඒ නිසා ශ්‍රී ලංකා රජය එවැනි තීරණයක් ගන්නා විට චීනය නිහඬව සිටියා.. මොකද අපි අපේ මිතුරාට ගරු කරනවා… පහුගිය වසර දෙකක් පුරාවට අපේ මිතුරා මුහුණදෙන අසීරු තත්ත්වය අපට තේරෙනවා… සමහර රටවල් ශ්‍රී ලංකාවේ දුෂ්කරතාවයෙන් ප්‍රයෝජන ගෙන අපේ ශ්‍රී ලාංකික මිතුරන්ට විශාල පීඩනයක් දුන්නා…”

සිය මිතුරන්ව අපහසුතාවයට පත් කිරීමට අකමැති බැවින් චීනය නිශ්ශබ්දව සිටි බව ඔහු පැවසීය.

කෙසේ වෙතත්, ‘සමහර මිතුරන්’ විද්‍යාත්මක පර්යේෂණ යාත්‍රා තහනම් කිරීමට ගත් තීරණය ‘රාජ්‍ය තාන්ත්‍රික ජයග්‍රහණයක්’ ලෙස සැලකූ බව යැන්වෙයි මහතා පැවසීය.

සැබෑම මිත්‍රයා හා හවුල්කරුවා චීනය බව ඉතිහාසය සහ අනාගතය විසින් ශ්‍රී ලාංකික මිතුරන්ට ඔප්පු කරනු ඇති බවත්, ශ්‍රී ලංකාව සමඟ ඉදිරියටත් එකට ගමන් කිරීමට සූදානම් බවත් ඔහු වැඩිදුරටත් පැවසීය.

නෞකා විසින් සිදුකරන පර්යේෂණ චීනය විසින් තනිව සිදු කරන්නක් නොව, එම පර්යේෂණ තනිවම සිදු කිරීමට හැකියාවක් නොමැති ශ්‍රී ලංකාව සමඟ සහයෝගයෙන් සිදු කරන්නක් බවත් ඔහු පෙන්වා දුන්නේය.

ශ්‍රී ලංකාව සමඟ මේ ආකාරයෙන් ඒකාබද්ධ පර්යේෂණ සිදුකිරීමට හැකියාව සහ කැමැත්ත ඇති වෙනත් රටක් ඇතිදැයි ඔහු ප්‍රශ්න කළේය.

ශ්‍රී ලංකාවේ අවසරයකින් තොරව මෙම පර්යේෂණයේ තොරතුරු කිසිවකු සමඟ බෙදාගත නොහැකි බවද ඔහු අවධාරණය කළේය.

චීනය සමඟ සබඳතා ශක්තිමත් කිරීමට ලංකාවේ නව රජය සූදානම් නම්……

මේ අතර, මාධ්‍යවේදීන් අමතමින් ශ්‍රී ලංකාවේ චීන තානාපති – චී ජන්හොං මහතා යළිත් අවධාරණය කර සිටියේ චීනය හා ශ්‍රී ලංකාව අතර මිත්‍රත්වය වසර 2,000ක අතීතයක් දක්වා දිවෙන බවයි.

ශ්‍රී ලංකාවේ පැවැත්වීමට නියමිත මැතිවරණය පිළිබඳව අදහස් දක්වමින් තානාපතිවරයා වැඩිදුරටත් කියා සිටියේ චීනය සමඟ සබඳතා ශක්තිමත් කිරීමට ලංකාවේ නව රජය සූදානම් නම්, මිත්‍රත්වය හා සහයෝගීතාව ප්‍රවර්ධනය කිරීම සඳහා චීනය සැමවිටම කැමැත්තෙන් සිටින බවයි.

ඡායාරූප – ශානිකා ජයසේකර । කැළුම් ශිවන්ත

ඡායාරූප: කැලුම් ශිවන්ත | ශානිකා ජයසේකර)