Jul 11, 2018

අයි.සී.සී.යේ ප්‍රමාදයෙන් ශ්‍රී ලංකා ක්‍රිකට් අමාරුවේ වැටිලා ! Featured

කොදෙව් සංචාරය අතරතුර තරගයකදී නායක දිනේෂ් චන්දිමාල්ට පන්දුව වෙනස් කිරීම සහ පලුදු කිරීමේ චෝදනා එල්ල වූ අවස්ථාවේදී තරග වැදීම ප්‍රතික්‍ෂේප කිරීම හේතුවෙන් චෝදනා ලැබ සිටින නායක දිනේෂ් චන්දිමාල්, පුහුණුකරු චන්දික හතුරුසිංහ, කළමනාකරු අසංක ගුරුසිංහට එරෙහිව දඬුවම් නියම කිරීම අයි.සී.සී. ය විසින් අද (11) දක්වා කල්දමා තිබේ.

අදාළ දඬුවම් නියම කිරීම ඊයේ (10) සිදු කරනු ලබන බව මීට පෙර දක්වා තිබිණි.

කෙසේවුවද, මෙසේ දඬුවම් නියම කිරීම කල් දැමීමෙන් ශ්‍රී ලංකා ක්‍රිකට් ආයතනය විශාල පරිපාලන අපහසුතාවකට ලක්ව ඇති බව පැවසේ.

ඒ හෙට (12) වැනිදා ශ්‍රී ලංකාව හා සංචාරක දකුණු අප්‍රිකානු පිල සමඟ ගාල්ලේදී ආරම්භවීමට නියමිත පළමු ටෙස්ට් තරගය ආරම්භවීමට නියමිත වුවද ඒ සඳහා නායකයා, පුහුණුකරු හා කළමනාකරු තෝරා ගැනීමට නොහැකිවීමෙනි.

මෙසේ තරගයක් ආසන්න වනතෙක්ම අදාළ තීන්දුව ලබාදීම කල් හැරීම සම්බන්ධයෙන් ශ්‍රී ලංකා ක්‍රිකට් ආයතනය අයි.සී.සී. යෙන් කිසිදු විමසීමක් සිදු කර නොමැති බවද පැවසේ.

එවැනි විමසීමක් සිදු කිරීමට තරම් දැනුම ඇත්තෙකු මේ මොහොතේ ක්‍රිකට් පරිපාලනයේ නොසිටීම මේ තත්ත්වයට හේතුව බව ක්‍රිකට් විචාරකයෝ පෙන්වා දෙති.

කෙසේවුවද ඇතැම් විචාරකයන් පෙන්වා දෙන්නේ මෙරට පරිපාලන දුර්වලතාවලින් ප්‍රයෝජන ලබාගනිමින් අයි.සී.සී.ය මෙරට ක්‍රිකට් ක්‍රිඩාව තව තවත් පරිහානියට පත් කිරීමට මෙය සිතාමතා සිදුකරන්නේද යන්න සැක සහිත බවයි.

 

 

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - [email protected] දුරකථන - +94 114 546 362

Top