ලෝක කුසලාන ක්‍රිකට් තරගාවලියේ ඊයේ (15) පැවැ​ති ඉන්දු – නවසීලන්ත පළමු පූර්ව වටයේ තරගයට භාවිත කරන තණ තීරුව සම්බන්ධයෙන් කතා බහක් ඇතිව තිබේ.

ඒ ඉන්දියාවේ ඉල්ලීම අනුව මන්දගාමී තණතීරුවක් ලබා දීමට කටයුතු කර ඇති බවට එල්ලවූ චෝදනාවක් නිසාය.

මුම්බායි හි වන්කඩේ ක්‍රීඩාංගණයේ දී පැවැත්වෙන තරගයට මින් පෙර භාවත නොකළ තණ තීරුවක් ලබා දීමට කටයුතු කර තිබුණත්, ඉන්දියාවේ ඉල්ලීම අනුව එය මාරුකර ඇති බව විදෙස් මාධ්‍ය වාර්තා කරයි.

ඒ අනුව මීට පෙර තරග දෙකකට භාවිත කළ තණතීරුවක් ලබා දී ඇති බව පැවසේ.

මන්දගාමී තණතීරුවක් ලැබුණහොත් ඉන්දීය දඟ පන්දුයවන්නන්ට වැඩි වාසි අත්වන බවත්, නවසීලන්ත වේග පන්දුයවන්නන්ට අවාසි සහගත වනු ඇති බවත් මාධ්‍ය වාර්තා තිබිණි.

ඒ අනුව මුලින් පන්දුවට පහර දුන් ඉන්දීය පිල ඉතා ලෙහෙසියෙන් නවසීලන්ත පන්දු යවන්නන්ට පහර දුන්නද දෙවනුවට පන්දුවට පහර දුන් නවසීන්ත පිතිකරුවන් ඉන්දීය දඟ පන්දුවන්නන් හමුවේ අසීරුතාවයට පත්වනු දක්නට ලැබිණි.

අන්තර් ජාතික ක්‍රිකට් කවුසිලය මගින් පවත්වනු ලබන තරගවලදී තණතීරු සකස් කිරීම සිදුකරනු ලබන්නේ ඔවුන්ගේ උපදෙස් අනුවයි.

කෙසේවුවද, ම්බායි ක්‍රිකට් සංගමයේ ප්‍රකාශකයෙකු විදෙස් මාධ්‍යවෙත පවසා ඇත්තේ ඉන්දීය කණ්ඩායම විසින් මන්දගාමී තණතීරුවක් ඉල්ලා ඇති බවත් ඒ අනුව තණකොල ඉවත් කළ බවයි. 

ඉන්දියාවට ලකුණු 70ක ජයක්

2023 ක්‍රිකට් ලෝක කුසලාන තරගාවලියේ පළමු අවසන් පූර්ව තරගය ලෙස ඊයේ පැවැති ඉන්දු – නවසීලන්ත තරගයෙන්  ලකුණු 70ක ජයක් වාර්තා කළ ඉන්දියාව අවසන් මහා තරගයට සුදුසුකම් ලබා ගත්තේය.

නවසීලන්තය සමඟ වන්කඩේ ක්‍රීඩාංගණයේ පැවති තරගයේ පළමුවෙන් පන්දුවට පහර දුන් ඉන්දීය කණ්ඩායම, නියමිත පන්දුවාර 50 අවසානයේ කඩුලු 04ක් දැවී ලකුණු 397ක් රැස් කළේය.

පිළිතුරු ඉනිම සඳහා නවසීලන්ත කණ්ඩායමට සියලු දෙනා දැවී රැස් කරගත හැකි වූයේ, ලකුණු 327ක් පමණි.

නවසීලන්තය වෙනුවෙන් විශිෂ්ට ඉනිමක් ක්‍රීඩා කළ ඩරිල් මිචෙල් ලකුණු 134ක් රැස් කළේය.

පන්දු යැවීමේ දී මොහොමඩ් ෂමි ලකුණු 57කට කඩුලු 07ක් දවා ගැනීමට සමත් විය.

කඩුලු 23ක් ලබා ගත් මොහොමඩ් ෂමි, මෙවවර ලෝක කුසලානයේ වැඩිම කඩුලු ලාභින් අතර පෙරමුණේ පසු වේ.