නවසීලන්ත කාන්තා ක්‍රිකට් කණ්ඩායම සමඟ පැවති පළමු විස්සයි විස්ස තරගය ජය ගැනීමට සංචාරක ශ්‍රී ලංකා කාන්තා ක්‍රිකට් කණ්ඩායමට අද (14) හැකිවිය..

ක්‍රයිස්චර්ච් හිදී පැවති මෙම තරගය නවසීලන්තය පරදා ශ්‍රී ලංකාව ජය ගත්තේ කඩුලු 07කිනි.

තරඟයේ පළමුව පන්දුවට පහර දුන් නවසීලන්ත කණ්ඩායමට පන්දුවාර 18යි පන්දු 05ක් තුළ සියලු දෙනා දැවී රැස්කර ගත හැකි වූයේ ලකුණු 101ක් පමණි.

දක්ෂ පන්දු යැවීමක නිරත වූ මල්කි මදාරා පන්දුවාර 03යි පන්දු 05ක් තුළ ලකුණු 14ක් පමණක් ලබාදෙමින් නවසීලන්ත කඩුලු 03ක් බිඳ දැමීමට සමත් වූවාය.

කවිෂා දිල්හාරි සහ ඉනෝෂි ප්‍රියදර්ශනී කඩුලු 02 බැඟින් බිඳ දැමූහ.

නවසීලන්ත ඉනිමේ වැඩිම ලකුණු ලාභිය බවට එමා මැක්ලියෝඩ් පත් වුණේ ලකුණු 44ක් රැස් කරමිනි.

 ලකුණු 102ක ජයග්‍රාහී ඉලක්කය හඹා යමින් ශ්‍රී ලංකා ක්‍රීඩිකාවන් පන්දුවට පහරදීම ආරම්හ කලේය.

කණ්ඩායම් නායිකා චමරි අතපත්තු නොදැවී ලකණු 64ක් රැස්කරමින් ශ්‍රී ලංකාව ජයග්‍රහණය කරාගෙන ගිය අතර; නිලක්ෂිකා සිල්වා සහ කවීෂා දිල්හාරි ලකුණු 12 බැගින් රැස් කලහ.

ශ්‍රී ලංකා කණ්ඩායම පන්දුවාර 14යි එක් පන්දුවක් තුළ කඩුලු 03ක් පමණක් දැවී අදාළ ඉලක්කය පසුකර යමින් මෙම තරගය ජයගැනීමට සමත්විය.

මාතර පොල්හේන ජාත්‍යන්තර ක්‍රිකට් පුහුණු පාසල හා ක්‍රීඩාංගණය ඉදිකිරීම ආරම්භ කිරීමට අවශ්‍ය මූලික කටයුතු මාසයක් ඇතුළත නිම කිරීමට පියවර ගෙන තිබෙනවා.

ව්‍යාපෘතිය ආරම්භ කිරීම සම්බන්ධයෙන් සාකච්ඡාවක් ඊයේ (13) මාතර දිස්ත්‍රික් ලේකම් කාර්යාලයේදී ශ්‍රී ලංකා ක්‍රිකට් ආයතනයේ නිලධාරීන් සමඟ පැවැත්වුණි.

මෙම අවස්ථාවට යෝජිත ඉඩමෙහි භාරකාරත්වය හිමිව ඇති අමරපුර ධර්‍මරක්ෂිත නිකායේ අතිගරු මහානායක ධූර තැන්පත් අති පූජ්‍ය  ත්‍රිකුණාමලයේ ආනන්ද මාහිමියන්ද,ශ්‍රී ලංකා ක්‍රිකට් ආයතනය වෙනුවෙන් ශම්මි ද සිල්වා මහතා, සනත් ජයසූරිය මහතා සහ සුජීව ගොඩලියද්ද මහතාද,මාතර ක්‍රීඩා සමාජයේ සභාපති ප්‍රමෝද්‍ය වික්‍රමසිංහ මහතා සහ මාතර දිස්ත්‍රික් ලේකම් චන්දන තිලකරත්න මහතා ඇතුළු රාජ්‍ය නිලධාරීන් රැසක් සහභාගී විය.

ශ්‍රී ලංකා ක්‍රිකට් ආයතනය මුදල් වෙන්කර තිබියදීත් මෙතෙක් අළුත්වැඩියා නොකළ සනත් ජයසූරිය ක්‍රීඩාංගණයේ ක්‍රීඩාගාරය ඉක්මනින් අළුත්වැඩියාව ආරම්භ කිරීමටත් මෙහිදී තීරණය කර තිබේ.

ඔස්ට්‍රේලියාවේදී හෙට (15) පැවැත්වෙන ‘සිඩ්නි ට්‍රැක් ක්ලැසික්’ තරගාවලිය සඳහා ශ්‍රී ලංකාවේ හිටපු හෙල්ල විසිකිරීම ජාතික ශූර රුමේෂ් තරංග සහ මීටර් 400 ක්‍රීඩක අරුණ දර්ශන සහභාගිවීමට නියමිතය.

මේ තරගාවලිය ලෝක මලල ක්‍රීඩා මහාද්වීපික තරගාවලි මාලාවේ ‘චැලේන්ජර් තරගාවලියක්’ ලෙස පැවැත්වෙන්නකි.

ඔවුන් දෙදෙනාම මේ වන විට ඔස්ට්‍රේලියාවේ රැඳී සිටින අතර රුමේෂ් තරංග පසුගිය සතිවල ඔස්ට්‍රේලියාවේ පැවැති තරගාවලි 2ක් සඳහා ද සහභාගී වූවේය.

එහිදී ඔහු ‘ස්ට්‍රයිව් ප්‍රෝග්‍රෑම් – ඒ’ තරගාවලියේදී මීටර් 82.66ක දක්ෂතාවක් දැක්වූ අතර ‘පර්ත් ට්‍රැක් ක්ලැසික්’ තරගාවලියේදී මීටර් 85.41ක දක්ෂතාවක් දක්වමින්, ඒ වන විට වසරේ හොඳම දක්ෂතාව දැක්වීමට සමත් විය.

මේ වන විට රුමේෂ්ගේ එම විසිකිරීම් දෙක වසරේ හොඳම විසිකිරීම් අතර දෙවැනි සහ සිව්වැනි ස්ථානවල පසු වේ.

අරුණ දර්ශනද රුමේෂ් තරග කළ ‘පර්ත් ට්‍රැක් ක්ලැසික්’ තරගාවලිය සඳහා සහභාගීවීමේ සූදානමෙන් පසු වූ නමුත් ඔහුට වීසා ප්‍රමාදය හේතුවෙන් එම තරගාවලිය සඳහා නිසි වේලාවට ළඟා වීමට නොහැකි විය.

මෙය ඔහු මෙම තරගවාරයේ සහභාගී වන පළමු තරගාවලිය වන අතර තරගාවලියේ ඉසව්ව සඳහා සුදුසුකම් ලබා සිටින ක්‍රීඩකයන් අතරින් පෞද්ගලික හොඳම කාලය (තත්පර 44.99) හිමි ක්‍රීඩකයා අරුණ වේ.

ඔහු එම කාලය පැරිස් ඔලිම්පික් උළෙලෙහිදී මූලික වටයේදී වාර්තා කරන ලදී.

මේ අතර රුමේෂ් සතු වූ ජාතික වාර්තාව පසුගිය සතියේදී අලුත් කරමින් ටෝකියෝ ලෝක ශූරතාව සඳහා ද සුදුසුකම් ලැබූ සුමේධ රණසිංහ මෙන්ම මීටර් 400 ක්‍රීඩක කාලිංග කුමාරගේ යන දෙදෙනා මෙම ‘සිඩ්නි ට්‍රැක් ක්ලැසික්’ තරගාවලිය සඳහා තෝරාගත් ක්‍රීඩක ලැයිස්තුව සඳහා ඇතුළත්ව සිටි නමුත් ඔවුන් ඒ සඳහා සහභාගී නොවනු ඇති බවට වාර්තා වේ.

හෙට ‘සිඩ්නි ඔලිම්පික් පාක්’ මලල ක්‍රීඩා සංකීර්ණයේදී හෙල්ල විසිකිරීමෙන් මීටර් 85.50 සහ මීටර් 400 ඉසව්වෙන් තත්පර 44.85 යන දක්ෂතාවලට ළඟා වුවහොත් ටෝකියෝ ලෝක ශූරතාවලිය සඳහා සෘජු සුදුසුකම් හිමිකර ගැනීමට රුමේෂ් සහ අරුණට අවස්ථාව උදා වනු ඇත.