Apr 13, 2019

යුද නොකරන්නේ නම් කකුල් ඉම්බත් කමක් නෑ !

අති උතුම් ශුද්ධෝත්තම ෆ්‍රැන්සිස් පාප්තුමෝ සාමය ප්‍රාර්ථනා කරමින් සහ නැවත ගැටුම්වලට නොයන ලෙස ඉල්ලමින් දකුණු සුඩාන ජනාධිපතිවරයා සහ එරට නායකයන් පිරිසකගේ දෙපා සිපගත්හ.

දකුණු සුඩානයේ පැවැති සිවිල් යුද්ධය අවසන් කරගනිමින් ඇති කරගන්නා ලද “සාම ගිවිසුමට” සහයෝගය දැක්වීමක් ලෙස අති උතුම් ශුද්ධෝත්තම ෆ්‍රැන්සිස් පාප්වහන්සේ ජනාධිපති සැල්වා කීර් මයාර්ඩිට්, උප ජනාධිපතිනි නියන්ග්ඩෙන්ග් ඩි මේබියෝර්, විපක්ෂ නායක රීක් මකාර් යන නායකයන්ගේ දෙපා සිප ගත්හ. 

දකුණු සුඩානයේ ජනාධිපතිවරයා, උප ජනාධිපතිනිය, විපක්ෂය නායකයා ඇතුළු දූත පිරිස දෙදින විශේෂ සංචාරයක් සඳහා වතිකානයට පැමිණි අතර ඔවුහු වතිකානයේ ශාන්ත මාර්තාහි පාප් වහන්සේගේ නිල නිවසේදී පාප්තුමෝ බැහැදුටුවහ. අති උතුම් ශුද්ධෝත්තම ෆ්‍රැන්සිස් පාප්තුමෝ දකුණු සුඩාන නායකයන්ගේ දෙපා සිප ගත්තේ එම අවස්ථාවේදී ය. 

“සාමයෙන් සිටින්නැයි මම ඔබෙන් සහෝදරයෙක් වගේ ඉල්ලා සිටිනවා. මම මගේ හදවතින්ම ඉල්ලා සිටිනවා. අපි එකට ඉදිරියට යමු” යැයි පාප්තුමෝ එහිදි කීහ.

ජනාධිපති සැල්වා කීර් සහ වත්මන් විපක්ෂ නායක එවකට කැරැලිකාර නායකයකු වූ රීක් මකාර් අතර 2013 වසරේ ඇති වූ ගැටුම් හේතුවෙන් සිවිල් යුද්ධයක් ඇතිවිය. සිවිල් යුද්ධය හේතුවෙන් 400,000කට වැඩි පිරිසකට ජීවිත අහිමි විය.

යුද්ධය අවසන් කරමින් පසුගිය වසරේ දී ඔවුහු සාම ගිවිසුමකට අත්සන් තැබූහ.

Leave a comment

Make sure you enter all the required information, indicated by an asterisk (*). HTML code is not allowed.

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top