විදේශ ණය (ඉවත් කිරීමේ) පනත් කෙටුම්පත සඳහා කථානායක වෛද්‍ය ජගත් වික්‍රමරත්න මහතා ඊයේ (23) සිය සහතිකය සටහන් කළේය.

විදේශ ණය (ඉවත් කිරීමේ) පනත් කෙටුම්පතට අදාළව අද පැවති දෙවැනි වර කියවීමේ විවාදයෙන් අනතුරුව, කාරක සභා අවස්ථාවේදී පනත් කෙටුම්පත සලකා බලන ලදී. ඉන්පසු පනත් කෙටුම්පත තෙවනවර කියවීමෙන් පසු ඡන්ද විමසීමකින් තොරව සංශෝධන රහිතව පාර්ලිමේන්තුවේදී සම්මත විය.

මෙම පනත් කෙටුම්පත පළමු වර කියවීම සඳහා 2025.05.08 දින පාර්ලිමේන්තුවට ඉදිරිපත් කරන ලදී.

ඒ අනුව මෙම පනත් කෙටුම්පත 2025 අංක 6 දරන විදේශ ණය (ඉවත් කිරීමේ) පනත වශයෙන් බලාත්මක වේ.

බස්නාහිර පළාත් සංවර්ධන සැලැස්ම 2025 යටතේ කොළඹ දිස්ත්‍රික් සංවර්ධන වැඩසටහනේ ව්‍යාපෘති 535ක් සඳහා රුපියල් මිලියන 1508.25ක් අනුමත වී ඇතත් මැයි 16 දින වන විටත් වැය කර ඇත්තේ එයින් රුපියල් මිලියන 8.20ක් බව කොළඹ දිස්ත්‍රික් සම්බන්ධීකරණ කමිටු රැස්වීමේ ප්‍රගති ලේඛනයේ සඳහන් වේ.

මේ වසරේ ජනවාරි 01 වන දා සිට දෙසැම්බර් 31 දක්වා කාලය සඳහා බස්නාහිර පළාත් සංවර්ධනට රුපියල් මිලියන 3,201.30 රජය වෙන්කර ඇති බව එහි දැක්වේ.

අමාත්‍යාංශ 05ක් යටතේ අනුමත කරන ලද ව්‍යාපෘති 535ක් ම මේ වනවිටත් ආරම්භ කර නොමැති බව එම ප්‍රගති ලේඛනයේ දැක්වේ.

ඒ අනුව, අධ්‍යාපන අමාත්‍යාංශය අනුමත ව්‍යාපෘති 177න් 125ක් ආරම්භ කර නොමැත.

සෞඛ්‍ය අමාත්‍යාංශය අනුමත කළ ව්‍යාපෘති 194 න් ව්‍යාපෘති 61 ක් ද, 

මහා මාර්ග අමාත්‍යාංශය අනුමත කළ ව්‍යාපෘති 61න් ව්‍යාපෘති 08ක් ද, 

පළාත් පාලන අමාත්‍යාංශය අනුමත කළ ව්‍යාපෘති 77න් ව්‍යාපෘති 43ක් ද

කෘෂිකර්ම අමාත්‍යාංශය අනුමත කළ ව්‍යාපෘති 26න් එක් ව්‍යාපෘතියක් ද වශයෙන් ඒවා ආරම්භ කර නොමැත.

මේ අතර, 2025 වර්ෂයට අදාළව අනුමත ව්‍යාපෘති 535න් ක්‍රියාත්මක මට්ටමේ පවතින්නේ ව්‍යාපෘති 283ක් බවත් වැඩ අවසන් කළ ව්‍යාපෘති ඇත්තේ 14ක් බවත් බස්නාහිර පළාත් සංවර්ධන සැලැස්මේ ප්‍රගති ලේඛනයේ වැඩිදුරටත් සඳහන් වේ.

මූලාශ්‍රය – මව්බිම

උතුරු නැගෙනහිර ජනතාවගේ ඉඩම් පවරා ගැනීමේ කිසිදු අරමුණක් රජයට නොමැති බව අග්‍රාමාත්‍ය ආචාර්ය හරිනි අමරසූරිය පවසයි.

ඇය පවසන්නේ, රජයේ අරමුණ ඉඩම් අයිතිය ඇති ජනතාවට ඒවා කඩිනමින් පවරා දීම බවය.

උතුරු නැගෙනහිර ජනතාව මුහුණ දෙන ඉඩම් හිමිකම් පිළිබඳ ගැටළු විසදීම සම්බන්ධයෙන් පාර්ලිමේන්තුවේ පැවති සාකච්ඡාවකට එක්වෙමින් ඇය මේ බව සඳහන් කළාය.

මෙතෙක් කලක් උතුරු නැගෙනහිර ඉඩම් අයිතිය නිරවුල් කිරීම වෙනුවෙන්, පැවති රජයන් ගෙන ගිය වැඩපිළිවෙල පිළිබඳ ජනතාව තුළ සැකයක් මතුව ඇති බව ද ඇය එහිදී පවසා තිබේ.

අයිතිය හිමි ජනතාව සතුව අයිතිය ඔප්පු කිරීමට ලේඛන කිසිවක් නොමැති බැවින් ජනතා විශ්වාසය දිනාගත් ක්‍රමවත් වැඩපිළිවෙළක් ඒ සඳහා අවශ්‍ය බව උතුරු නැගෙනහිර නියෝජනය කරන පාර්ලිමේන්තු මන්ත්‍රීවරුන් මෙහිදී පෙන්වා දී ඇති බව සඳහන්.

ඔවුන් පෙන්වා දී ඇත්තේ ඇතැම් පිරිස් වංචනිකව ඉඩම් අත්පත්කරගෙන ඇති බැවින් රජය විසින් අදාළ ප්‍රශ්නයට සාධාරණ විසඳුමක් ලබා දෙනු ඇතැයි ජනතාව තුළ විශ්වාසයක් පවතින බවයි.

ජනතාවගේ සැකය නැතිවන පරිදි නිසි ක්‍රමවේදයක් හඳුන්වා දෙමින් නීත්‍යානුකූලව තහවුරු කිරීම් සමග ඉඩම් අයිතිය ජනතාවට ලබාදිය යුතු බව රජයේ එකඟතාව බව අග්‍රාමාත්‍ය ආචාර්ය හරිනි අමරසූරිය මෙහිදී අවධාරණය කර තිබේ.

ඒ අනුව ජනතාව සහ අදාළ අංශ සමග සාකච්ඡා කර ඉදිරියේදී නිසි විසඳුමක් ලබාදීමට කටයුතු කරන ලෙසත් අග්‍රාමාත්‍යවරිය නිලධාරීන්ට උපදෙස් ලබාදී ඇත.