ශ්‍රී ලංකාවේ වියළි හා අතරමැදි කලාප වලට අයත් හඳුනාගත් දිස්ත්‍රික්කවල කුඩා ප්‍රමාණයේ වී ගොවීන් ගේ නිෂ්පාදන ධාරිතාව ශක්තිමත් කිරීම සඳහා ජපාන රජය ඩොලර් 4,629,629 මෙරටට ලබා දීමට නියමිතය.

ජපන් රජය විසින් මෙම මුදල ලබා දෙනු ලබන්නේ එක්සත් ජාතීන්ගේ ආහාර හා කෘෂිකර්ම සංවිධානය (FAO) හරහාය.

මේ වැඩසටහන හරහා, ඉහත ප්‍රදේශ වල අක්කරයක් දක්වා භූමිභාගයක ගොවිතැන් කරන කුඩා ප්‍රමාණයේ වී ගොවීන් 250,000කට මහ කන්නය වෙනුවෙන් යූරියා පොහොර කිලෝග්‍රෑම් 50ක් දක්වා  ලබාදීමට නියමිතය.

නොමිලේ ලබා දෙන මෙම පොහොර අතර කෘෂිකර්ම අමාත්‍යාංශයේ සහ ගොවිජන සංවර්ධන දෙපාර්තමේන්තුවේ සහයෝගය ඇතිව බෙදා හැරීම සිදුකිරීමට නියමිත අතර, මෙම ව්‍යාපෘතිය මඟින් කුඩා ප්‍රමාණයේ වී ගොවීන්ට නිෂ්පාදනය උපරිම කිරීම සඳහා පොහොර කාර්යක්ෂමව භාවිතා කිරීමට හැකි වනු ඇති බවද FAO නිවේදනයක දැක්වේ.

මෙහිදී අදහස් දක්වමින් මෙරට සිටින ජපන් තානාපති මිසුකොෂි හිදෙඅකි මහතා පවසා ඇත්තේ විදේශ විනිමය හිඟය හේතුවෙන් හිඟ වී ඇති පොහොර ලබාදීමට අතිරේක මානුෂීය ආධාර ලබාදීමට ජපන් රජය ගත් තීරණය සතුටින් ප්‍රකාශ කරන බවයි. මේ හරහා ශ්‍රී ලංකාවේ ආහාර නිෂ්පාදන ධාරිතාව පූර්ව අර්බුද මට්ටම් දක්වා වැඩිදියුණු කිරීමටත්, කුඩා වතු හිමියන්ට වඩා හොඳ ජීවනෝපායක් සහතික කිරීමටත්, රට පුරා සිටින සියලුම පුරවැසියන්ට අත්‍යවශ්‍ය ආහාර සඳහා ස්ථාවර ප්‍රවේශයක් ලබා ගැනීමටත් හැකි වනු ඇතැයි බලාපොරොත්තු වන බවත් ඔහු වැඩිදුරටත් පවසා ඇත.

තවද, ශ්‍රී ලංකාව හා මාලදිවයින සඳහා වන FAO නියෝජිත –  විම්ලේන්ද්‍ර ශරන් මහතා මෙසේ අදහස් දක්වා ඇත. “FAO ලෙස අපි අපගේ හවුල්කරුවන් සමඟ කටයුතු කරන අතර අවදානමට ලක්විය හැකි ගොවීන්ට සහ ධීවරයින්ට ඔවුන්ගේ ජීවනෝපාය දිගටම සිදුකරගෙන යාමට හැකි වන අයුරෙන් සහය දීමට සෑම මට්ටමකින්ම පෙනී සිටිමු. ශ්‍රී ලංකාවේ ආහාර සුරක්‍ෂිතතාව සහ පෝෂණය පිළිබඳ තත්ත්වය වඩාත් යහපත් ලෙස දිස්වන නමුත්, සම්පූර්ණයෙන්ම යථා තත්ත්වයට පත්වීමට තවත් වගා කන්න තුන හතරක කාලයක් ගත විය හැකිය.”

ශ්‍රී ලංකාව වෙත ලබාදුන් සහයට ජපාන රජයට ස්තූතිවන්ත වන අතරම, එම සහය 2023 වසරේ නිෂ්පාදනය ඉහළ නැංවීමට උපකාරී වනු ඇති බවට කිසිදු සැකයක් නොමැති බවද ඔහු වැඩිදුරටත් පවසා තිබේ.