ශ්‍රී ලංකාව සහ අවට මුහුදු ප්‍රදේශ ආශ්‍රිතව වර්ධනය වෙමින් පවතින පෙර මෝසම් කාලගුණික ලක්ෂණ හේතුවෙන් වැසි සහ සුළං තත්ත්වයේ වැඩිවීමක් බලාපොරොත්තු විය හැකි බව කාලගුණවිද්‍යා දෙපාර්තමේන්තුව නිවේදනය කරයි.

බස්නාහිර, සබරගමුව, නැගෙනහිර, උතුරු සහ වයඹ පළාත්වලත් ගාල්ල සහ මාතර දිස්ත්‍රික්කවලත් විටින් විට වැසි හෝ ගිගුරුම් සහිත වැසි ඇතිවේ.

දිවයිනේ සෙසු ප්‍රදේශවල දහවල් 12.00 න් පමණ පසු තැනින් තැන වැසි හෝ ගිගුරුම් සහිත වැසි ඇති වේ.

බස්නාහිර, සබරගමුව, මධ්‍යම, නැගෙනහිර සහ ඌව පළාත්වල ඇතැම් ස්ථානවල මි.මී. 100 ක පමණ තද වැසි ඇතිවිය හැක.

ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් කාරුණිකව ඉල්ලා සිටිනු ලැබේ.

ලෝක විදුලි සංදේශ හා තොරතුරු සමාජ දිනය අදට (17) යෙදී තිබේ.

මෙවර එහි තේමාව වන්නේ  “තිරසාර සංවර්ධනය සඳහා ඩිජිටල් නවෝත්පාදනය” යන්නයි.

විශේෂයෙන් තොරතුරු සමාජ දියුණුව සදහා තොරතුරු සන්නිවේදන තාක්‍ෂණයේ දායකත්වය අද දිනයේදී සිහිපත් කෙරේ.

සෑම වසරකම මැයි මස 17වනදා මෙම දිනය යොදා ගෙන ඇත්තේ 1865 වසරේ මැයි මස 17වනදින පළමු ජාත්‍යන්තර විදුලි සංදේශ පණිවුඩ සම්මුතියට පැරීසියේ දී අත්සන් තැබීම පදනම් කර ගෙනය.

ජාත්‍යන්තර විදුලි සංදේශ සංගමය බිහිවීම ද එදින සිදුවිය. 

කටුනායක ගුවන්තොටුපළේ ගුවන් මගීන්ගේ ගමන් මලු ප්‍රවාහනය කරන පෝටර් වරයකුට කුඩා හා මධ්‍ය පරිමාණ ව්‍යවසාය සංවර්ධන රාජ්‍ය අමාත්‍ය ප්‍රසන්න රණවිර මහතා විසින් කනට පහරදීමේ සිද්ධිය සම්බන්ධයෙන් ආරක්ෂක අංශ CCTV පරික්ෂා කිරීමට සූදානම්වන බව වාර්තා වේ.

කෙසේවුවද, මේවන විට අමාත්‍යවරයා තමා පෝටර්වරයා‍ට කනේ පහරක් ගැසු බව පිළිගෙන තිබේ.

රාජ්‍ය අමාත්‍යවරයා ඉකුත් 14 වැනිදා අලුයම් කාලයේ සිය බිරිය සහ ඇමති ආරක්ෂකයින්ද සමඟ කටුනායක ගුවන් තොටුපොළට ගොස් ඇත්තේ බිරිඳ විදේශ ගත කිරීම සඳහා බව පැවසේ.

ගුවන් තොටුපළේ ප්‍රධාන දොරටුවෙන් රාජ්‍ය ඇමතිවරයා ගිනි අවි අතැති ආරක්ෂකයින් සමඟ ඇතුල් වීමට උත්සාහ කිරීමේදී එසේ ගිනි අවි සමඟ ඇතුල් වීමට ඉඩදිය නොහැකි බව ගුවන් තොටුපළ ආරක්ෂක නිලධාරීන් රාජ්‍යඇමතිවරයාට පවසා තිබේ.

එහිදී රාජ්‍ය අමාත්‍යවරයා ගුවන් තොටුපොල ආරක්ෂක නිලධාරීන්ට බැණ වැදී ඇති බවද පැවසේ. 

මේ අතර ඔහුගේ බිරිඳගේ ගමන් මලු රැගෙන ගිය පෝටර්වරයාට ප්‍රසන්න රණවීර මහතා පහරදීමක් සිදු කර තිබේ.

ඊට හේතු වී ඇති පෝටරවරයාට ගෙවිය යුතු වූ රුපියල් දහසක මුදල වෙනුවට ඔහු විසින් රුපියල් හත්සීයක මුදලක් ලබාදීම සම්බන්ධයෙන් පෝටර් සිය විරෝධය පළ කිරීම බවද කියැවේ. 

ගුවන් තොටුපළේ සේවා සපයන පෝටර්වරයකුට රුපියල් දහසක මුදලක් ගෙවිය යුතු බව දැන්වීම් පුවරු මගින් ප්‍රදර්ශනය කර ඇත.

රාජ්‍ය අමාත්‍යවරයා පෝටර්වරයා කම්මුල් පාරක් එල්ල කිරීමෙන් පසු ගුවන් තොටුපළ පරිශ්‍රයෙන් පිට වගොස් ඇත. 

පහර කෑ පෝටර්  ගුවන්තොටුපොල  පොලිසියට සිද්ධිය සම්බන්ධයෙන් පැමිණිලි කිරීමට ගොස් ඇත ඔහු කුරුණෑගල අලව්ව ප්‍රදේශයේ පදිංචිකරුවකු බවද පැවසේ.

මෙම සිදුවීම සම්බන්ධයෙන් රාජ්‍ය “අමාත්‍ය ප්‍රසන්න රණවීර මහතා පැවසුවේ මට ඒ වෙලාවේ කේන්ති ගියා. මම කතා කරලා ඔහුව පැත්තකට ඇදන් ගියා මම කනේ පාරක් ගැහුවා ඒක ඇත්ත”.

අදාළ පැමිණිල්ල  කිරීමට පොලිසියට ගිය පහර කෑ තැනැත්තාට පොලිසිය නිලධාරින් පවසා ඇත්තේ එම අවස්ථාවේ දී ස්ථානාධිපතිවරයා නොමැති බැවින් පසු දින ඇවිත් පැමිණිලි කරන ලෙසය.

එහෙත් කුමන හෝ හේතුවක් මත එම තැනැත්තා ඉන්පසුව පොලිසියට ගොස් නොමැති බවද වාර්තාවේ.

කෙසේවුවද, කට කතා පැතිර ඇත්තේ පොලිසි ගියහොත් අදාළ පහර කෑ තැන්තාගේ රැකියාව මාස 6කට නැති කරන බවට රාජ්‍ය අමාත්‍යවරයා කර ඇති තර්ජනයකට බියෙන් ඔහු පොලිසිය‍ට යාමෙන් වැලැකී ඇති බවයි.

ඉකුත් මැයි 09 වැනිදා සිද්ධියේදී ප්‍රසන්න රණවීර ඇමතිවරයාගේ නිවසද කලහකාරීන් විසින් ගිනිතබා තිබිණි.