කොවිඩ් සමයේ මෙරටට ගෙන්වනු ලැබූ ෆයිසර් එන්නත් ලක්ෂ හැත්තෑ පහකට අධික ප්‍රමාණයක් භාවිතයට නොගැනීම හේතුවෙන් විනාශ කිරීමට සුදානම් වන බව වාර්තා වේ.

කල් ඉකුත් වී ඇති එම එන්නත් තොග මේවන විට ජාතික රුධිර පාරවිලයන මධ්‍යස්ථානයේ එලිමහනේ ඇති බහාලුමක ගබඩා කර ඇති බවද පැවසේ.

කොවිඩ් ව්‍යාප්තිය සමග 2021 වසරේ ජූලි මස සිට දෙැසැම්බර් මස දක්වා කාලය තුළ ෆයිසර් එන්නත් මාත්‍රා දෙකෝටි අසූ අටදහස් පනහක් (20088050) අවස්ථා කිහිපයකදී මෙරටට ගෙන්වා ඇත.

ඉන් භාවිතයට නොගෙන ඉතිරිව තිබු ෆයිසර් එන්නත් ලක්ෂ හැත්තෑ පහක් මාස හතක පමණ කාලයක් ජාතික රුධිර පාරවිලයන මධ්‍යස්ථානයේ ශිතකරණ තුළ ගබඩා කර තිබුණි.

එම එන්නත් තොග කල් ඉකුත්වීමත් සමග පසුගිය වසරේ ඔක්තෝබර් මස 31 වැනිදා සිට භාවිතයෙන් ඉවත් කිරීමට කටයුතු යොදා තිබිණ.

එසේ වුවද මෙම එන්නත් ජාතික රුධිර පාරවිලයන මධ්‍යස්ථානයේ ශිතකරණ තුළ ගබඩා කර තිබු නිසා එම ආයතනයට මිලියනයකට ආසන්න අමතර විදුලි බිලක් ගෙවීමටද සිදුව ඇති බව ආරංචි මාර්ග සඳහන් කරයි.

මෙම තත්ත්වය මත පසුගිය මැයි තිස් එක් වැනිදා (31) ජාතික රුධිර පාරවිලයන මධ්‍යස්ථානය වසංගත රෝග විද්‍යා අංශය⁣ට මෙම එන්නත් තොගය රැගෙන යන ලෙස දැනුම් දී ඇත.

එම දිනයේදිම ජාතික රුධිර පාරවිලයන මධ්‍යස්ථානය ආදාළ ශිතකරණවලට විදුලිය සැපයීම නතර කිරිමට කටයුතු කර තිබේ.

පසුව වසංගත රෝග විද්‍යා අංශයේ බලධාරින් පසුගිය සතියේ පැමිණ අදාළ එන්නත් තොගය ශිතකරණවලින් ඉවත් කර රුධිර පාරවිලයන මධ්‍යස්ථානයේ එලිමහනේ ඇති බහාලුමක ගබඩා කර ඇති බව ආරංචි මාර්ග සඳහන් කරයි.

එම එන්නත් එම පරිශ්‍රයෙන් රැගෙන යාම සඳහා යම්කිසි කාලයක් අවශ්‍ය බවට වසංගත රෝග විද්‍යා අංශය ජාතික රුධිර පාරවිලයන මධ්‍යස්ථානයෙන් ඉල්ලීමක්ද කර තිබේ.