වයඹ ආණ්ඩුකාර නසීර් අහමඩ් මහතා ඔහුට හිමි නිල නිවාසය ⁣ඇතුළු රජයට අයත් තවත් නිල නිවාස තුනක්ම භාවිතයට ගෙන ඇති බව වාර්තා වේ.

කුරුණෑගල වැව රවුමේ පිහිටි ආණ්ඩුකාර නිල නිවස සමග වැව රවුමේම පිහිටා තිබෙන කුරුණෑගල නගරාධිපති නිල නිවස සහ වයඹ කෘෂිකර්ම අමාත්‍යාංශයට අයත් නිල නිවසක්ද මේ වනවිට ඔහු භාවිතයට ගෙන ඇති බව පැවසේ. 

මීට පෙර වයඹ පළාතේ ආණ්ඩුකාරවරයාව සිටි ලක්ෂ්මන් යාපා අබේවර්ධන මහතා මේ ආකාරයටම රජයේ නිල නිවාස කීපයක්ම භාවිත කළ අතර ඔහුට පෙර සිටි කිසිදු ආණ්ඩුකාරවරයකු මේ ආකාරයට ඔවුන්ට හිමි නිල නිවස හැර රජයේ වෙනත් නිල නිවාස භාවිත කර නොමැති බව ද පළාත් සභා ආරංචි මාර්ග සඳහන් කරයි.

මේ ආකාරයට වෙනත් නිල නිවාස භාවිතයට ගැනීම රජයේ චක්‍රලේඛ උල්ලංඝනය කිරීමක් මෙන්ම නීති විරෝධී කටයුත්තක් වේ.

ආණ්ඩුකාර නිල නිවස ආණ්ඩුකාරවරයාගේ පෞද්ගලික කාර්ය මණ්ඩලයට සහ ආරක්ෂක අංශ නිලධාරීන් සඳහා ප්‍රමාණවත් ලෙස සකසා තිබියදීත් මේ ආකාරයට වෙනත් රජයේ නිවාස භාවිත කිරීම රජයේ මුදල් හා සම්පත් අවභාවිත කිරීමක් ලෙසට ද ආණ්ඩුකාරවරයාට චෝදනා එල්ලව තිබේ.

මූලාශ්‍රය – අරුණ

ඉරාන තානාපති ආචාර්ය  ඩෙල්ක්‍රොෂ් (A Delkhosh) මහතාට පහරදී , අනතුරකට ලක්කළ ව්‍යාපාරිකයෙකු අත්අඩංගුවට ගත් බව කොම්පඤ්ඤවීදිය පොලිසිය කියයි.

තානාපතිවරයා කොළඹ සාප්පු සංකීර්ණයක රථගාලට  රථය ඇතුල් කරන අවස්ථාවේදී තවත් මෝටර් රථයක රියදුරෙක් සමඟ ආරවුලක් හටගෙන ඇති අතර එහිදී එම පුද්ගලයා තානාපතිවරයාට පහරදී එම ස්ථානයෙන් පලා යාමට උත්සාහ දරා ඇතැයි පොලිසිය කියයි.

එහිදි තානාපතිවරයා සිය මෝටර් රථයෙන් බිමට බැස  පලායාමට උත්සාහ දරන මෝටර් රථයේ බොනොට්ටුවට අත තබාගෙන පොලිස් නිලධාරීන් පැමිණෙනතුරු සිටින ලෙස මෝටර් රථයේ රියදුරුට දැනුම් දී ඇත.

 එම අවස්ථාවේදී මෝටර් රථයේ රියදුරු විසින් මෝටර් රථය පණ ගන්වා  මීටර් 15ක්දි පමණ ඉදිරියට රිය  ධාවනය කර ඇතැයි පොලිසියේ සිදුකළ විමර්ශනවලදී අනාවරණය වී ඇත.

අත්අඩංගුවට ගත් සැකකරු කොළඹ හත වෝඩ් පෙදෙසේ පදිංචි. වයස අවුරුදු තිස්තුනක පුද්ගලයෙකි.

බාප්පා,පුංචි සහ සහෝදරයා මරා මුදල් හා රන් භාණ්ඩ සොරාගත් පුද්ගලයකු අත්අඩංගුවට ගත් බව නාල්ල පොලිසිය කියයි.

අද අලුයම හතරට පමණ මාලදෙනිය ප්‍රදේශයේ නිවසකදී මෙම අමානුෂික ඝාතනය සිදුව ඇතැයි ද පොලිසිය සඳහන් කරයි.

පාපැදියකින් ගමන් ගත් පුද්ගලයකු පරීක්ෂා කළ පොලිසිය ඔහු සතුව රුපියල් ලක්ෂ 3කට ආසන්න මුදලක් සහ රන් භාණ්ඩ තිබී හමුවී ඇත.

ඒ සම්බන්දයෙන් සැකකරු අත්අඩංගුවට ගෙන පොලිසියට රැගෙන ගොස් පරීක්ෂා කිරීමේදී ඔහු සතුව තිබූ ලිපියන් සම්බන්දයෙන් පරීක්ෂා කිරීමේදී මෙම ඝාතනයේ තොරතුරු අනාවරණය වූ බව පොලිසිය සඳහන් කරයි.

මෙසේ ඝාතනය කර ඇත්තේ තම බිරියගේ බාප්පා,පුංචි සහ ඔවුන්ගේ දරුවා බව මෙතෙක් සිදු කල පරීක්ෂණවලින් අනාවරණය වන බව ද පොලිසිය සඳහන් කරයි.

(ලංකාදීප)