විශේෂාංග
ලිංගික අපචාර චෝදනාවෙන් ධනුෂ්ක නිදොස්කොටම නිදහස්ද?
ලෝක කුසලාන විස්සයි20 තරගාවලියට ශ්‍රී ලංකාව නියෝජනය කරමින් පසුගිය වසරේ අගභාගයේදී ඔස්ට්‍රේලියාවට ගිය ආරම්භක පිතිකරු ධනුෂ්ක ගුණතිලක එරට කාන්තාවකට ලිංගික අතවර සිදු කළ බවට සිඩ්නි නුවර අධිකරණයේ විභාගයට ගත් ස්ත්‍රී දූෂණ නඩුවෙන් නිදහස් විය.
දින 327කට පසු යළි ශ්‍රී ලංකාවට පැමිණීමට අවස්ථාව දැන් ඔහුට උදා වී තිබේ.
ධනුෂ්ක ගුණතිලක ස්ත්‍රී දූෂණ චෝදනාවට නිවැරදිකරු බවට අධිකරණයෙන් තීන්දු වීම බහුතර ශ්‍රී ලාංකිකයන්ගේ අමන්දානන්දයට හේතුවකි.
ඊයේ පෙරේදා සමාජ මාධ්‍ය ජාලයේ පළ වුණු කොමෙන්ටුවලින් එය පැහැදිලිය.
එය සතුටට හේතු විය යුත්තේ වරද කුමක් වුව ද ශ්‍රී ලාංකිකයකු විදෙස් භූමියක සිරකරුවකු බවට පත්වීමේ ශෝචනීය තත්ත්වයෙන් බේරීම නිසා පමණි.
මන්ද එසේ නිදහස ලැබූ පමණින් ධනුෂ්ක ගුණතිලක සිදු කළ වරද සාධාරණීකරණය කළ නොහැකි බැවිනි.
වරද වන්නේ මාතෘභූමිය නියෝජනය කරමින් විදෙස් ගත වූ තානාපතිවරයකු බඳු ක්‍රීඩකයකු මෙවැනි දුරාචාරයක නිරතවී මව්බිමේ කීර්තිය හා ගෞරවය කෙළෙසීමය.
අනිත් අතට අපමණ දුක් කන්දරාවක් විඳ දරා ගනිමින් හැදූ වැඩූ මවුපියන් ලජ්ජාවට පත් කිරීමකි.
කුඩා වියේ සිටම අපමණ කැපවීමකින් යුතුව ක්‍රීඩාව කියාදුන් පුහුණුකරුවන්ගේ කීර්තිය අභියෝගයට ලක් කිරීමකි.
වරද වන්නේ ක්‍රීඩාව සමඟ නිතැතින්ම බැඳී පවතින ‘විනය‘ මෙවැනි හැසිරීමකින් හෑල්ලුවට පත් කිරීමය.
ශ්‍රී ලංකාවට කීර්තියක් අත්කරදීමේ අරමුණින් සිය කණ්ඩායම සමඟ ජාතික කර්ත්‍යවයකට ඔස්ට්‍රේලියාවට ගොස් එසේ අයාලේ යෑම ගැටලු සහගතය.
ගියා මදිවට පොලිස් කූඩුවේ ද සිට ශ්‍රී ලාංකේය ක්‍රිකට් ක්‍රීඩාව අවමානයට ලක් කිරීමය.
ලිංගික ඇසුරට ලොල් පුද්ගලයන් සඳහාම වෙන් වු ‘ටින්ඩර්‘ නමැති වෙබ් අඩවියක ආරූඨ නමකින් ගිණුමක් ආරම්භ කළ ධනුෂ්ක එසේ කළේ කුමක් අපේක්ෂාවෙන් දැයි අමුතුවෙන් කිවයුතු ද නැත. අතවරයට ලක් වූ බවට පැමිණිලි කළ 29 හැවිරිදි කාන්තාව ද එම වෙබ් අඩවියේ ගිණුමක හිමිකාරිණියක වීම නිසා ඇගේ පැටිකිරිය ගැනත් විමසීමට දෙයක් නැත.
කාරණාව වන්නේ දෙදෙනා එක්ව කැමැත්තෙන් කළ ‘රාජකාරිය‘ට ධනුෂ්ක එක් වූයේ ශ්‍රී ලංකා වෙනුවෙන් ක්‍රීඩා කිරීමට ගොස් සිටි අවස්ථාවක වීමය. ඒ වන විට ඔහු ආබාධයකට ලක්ව විවේක ගනිමින් සිටීම නිදහසට කරුණක් ද නොවේ.
සැබැවින්ම ධනුෂ්ක ගුණතිලක යනු ශ්‍රී ලංකාවෙන් බිහි වූ විශිෂ්ට පිතිකරුවකු බවට සැකයක් නැත.
එහෙත් විනය විරෝධී ලෙස හැසිරෙන්නේ නම් එවැනි ක්‍රීඩකයන්ගෙන් ඇති ඵලක් ද නැත.
අනික් අතට ඔහු විනය කඩ කළ අවස්ථා සිදුවීම් කිහිපයක්ම මීට පෙර ද වාර්තා වී තිබේ.
කවුරුත් දන්නා පරිදි ඔහු එංගලන්ත සංචාරයක් අතරතුර එවකට ක්‍රීඩකයන්ට පනවා තිබූ ජෛව බුබුළු සෞඛ්‍යාරක්ෂිත ක්‍රමවේදය උල්ලංඝනය කරමින් කුසල් මෙන්ඩිස් සහ නිරෝෂන් දික්වැල්ල සමඟ ලන්ඩන් නුවර වීදි පුරා අයාලයේ යෑමෙන් වසරක ක්‍රිකට් තහනමකට ලක් වූ ක්‍රීඩකයෙකි.
එම දඬුවම පසුව ලිහිල් කිරීම වෙනම කතාවකි.
වැඩි දෙනකු නොදන්නා පරිදි දකුණු පළාතේ එක්තරා හෝටලයක පැවැති විවාහ උත්සවයක් අතරතුර බීමත්ව බලහත්කාරයෙන් තරුණියකගේ අතින් ඇදීමේ සිදුවීමක් නිසා ගැටුමකට ද මුල් වූ බවට තොරතුරු වාර්තා වී තිබුණු අතර, කොළඹ එක්තරා ප්‍රසිද්ධ හෝටලයකදී බ්‍රිතාන්‍ය පුරවැසියකු වන ශ්‍රී ලාංකික පුද්ගලයකු නෝර්වේජියානු තරුණියක් අපයෝජනයට ලක් කිරීමට උත්සාහ ගැනීමේ සිදුවීමක ද ඔහුගේ නම ගෑවි තිබිණි.
එබැවින් ඔහුගේ පැටිකිරිය ගැන ආයේ අමුතුවෙන් කිවැයුතු ද නැත.
ධනුෂ්ක නඩුවෙන් නිදහස් වීම ඇතැමුන් සිතන්නේ ජයග්‍රහණයක් බවය.
එය ජයග්‍රහණයක් යැයි ධනුෂ්ක ද සිතනවා වන්නට ඇත. නිදහස ලැබීමෙන් පසු ඔහු මුහුණු පොතේ සිය ගිණුමෙහි මෙසේ සටහන් තබා ඇත්තේ එබැවින් විය යුතුය.
‘ආරම්භයේදී බොරුව ඉතා ශක්තිමත් විය හැකිය. එහෙත් එය කෙදිනක හෝ බිඳ වැටෙනු ඇත.
ජීව විද්‍යාව කියන්නේ එයටය.‘ මේ වැකිය සමඟ ඔහු ජයග්‍රාහී සිනහවකින් මුව සරසාගෙන වාර්තාකරුවන්ගේ කැමරා කාචයට මුහුණ දෙන ආකාරයේ ඡායාරූපයක් ද පළ කර තිබිණි.
නඩුවේ ස්වභාවය සහ ඔහු නිදහස් වීමට හේතුව අප දන්නා පරිදි ජීව විද්‍යාවට ඇති සම්බන්ධයක් නැත. ඔහුට එල්ල වූ චෝදනාව වූයේ ලිංගිකව හැසිරෙමින් සිටියදී උපත් පාලන කොපුව කාන්තාවට හොර රහසේ ඉවත් කිරීමය.
එය ඔස්ට්‍රේලියාවේ නීතියට අනුව කාන්තා දූෂණය යටතේ සිර දඬුවම් ලැබිය හැකි වරදකි. ඔහු නිදහස් වූයේ කාන්තාවට එය ඔප්පු කිරීමට ශක්තිමත් සාක්ෂි නොතිබීම නිසාය.
ඇතැම් විට ධනුෂ්ක නීතියේ රැහැණින් බැඳ දමා ගාණක් කඩා ගැනීමේ අදහසක් ද අදාළ කාන්තාව තුළ තිබෙන්නට ඇත.
එවැනි සිදුවීම් බොහෝ රටවල සුලබව සිදුවන්නකි. ඔය කියන කාන්තාව ගැන කිසිදු තොරතුරක් හෝ ඡායාරූපයක් මෙතෙක් ප්‍රසිද්ධියට පත් වී නැති වුවද, දෙදෙනා අතර හුවමාරු වූ ගෘංගාරාත්මක කෙටි පණිඩුව තොග පිටින් හෙළි වී තිබිණි.
බැලූ බැල්මටම ඇය ලිංගික හැසිරීමට ලොල් වූ කාන්තාවක් බව දෙදෙනා අතර හුවමාරු වූ ගෘංගාරාත්මක කෙටි පණිවුඩවලින් පැහැදිලිය.
නඩු විභාගය තමන්ගේ වාසියට තීන්දු වීම ඒ අතින් ධනුෂ්කගේ වාසනාවක් ලෙසත් සැලකිය හැකිය.
ධනුෂ්කගේ නඩු විභාගයේ කැපී පෙනෙන සිදුවීම වන්නේ මේ කිසිවක් හෝ නොව විනිසුරු සාරා හගේට් මහත්මිය ඉදිරියේ නඩුව විභාගයට ගත් දින හතරේදීම තොරතුරු අනාවරණය නොවන සුදු ජාතික තරුණියක් සමඟ අතිනත පටලාගෙන ධනුෂ්ක අධිකරණයට පැමිණීමය.
මේ පියකරු කාන්තාව කවුරුන් දැයි විදෙස් මාධ්‍ය දැඩි අවධානය යොමු කර තිබුණත් ඔහු තවත් සුදු ජාතික කාන්තාවක් සමඟ අනිතත පටලාගෙන අධිකරණයට පැමිණීම ද නඩුවට අදාළ කාරණාවක් නොවූ බැවින් ඇය ගැන කිසිදු තොරතුරක් අනාවරණය නොවීය.
කෙසේ වෙතත් කවුරුත් අනුමාන කරන්නට වූයේ ඇය ධනුෂ්කගේ නව පෙම්වතිය වන්නට ඇති බවය.
ඊයේ පෙරේදා ධනුෂ්කගේ නඩු විභාගයේ තීන්දුව ජාත්‍යන්තර මාධ්‍යවල වාර්තා වෙද්දී බ්‍රිතාන්‍ය ඩේලිමේල් පුවත් සේවය ඇගේ නම සොයා ගැනීමට සමත් වී තිබිණි. එම වාර්තාවට අනුව ඇය ධනුෂ්කගේ නව පෙම්වතිය වන ‘සෙලීන්‘ ය.
විනිසුරු සාරා හගේට් තීන්දුව ප්‍රකාශයට පත් කරද්දී ඊට කිසිදු ප්‍රතිචාරයක් නොදැක්වූ ඔහු මුළු නඩු විභාගය පුරාම තමා සමඟ සිටි එම තරුණිය සිප වැලඳ ගත් බව ඔස්ට්‍රේලියානු මාධ්‍ය වාර්තා කළේය.
දින හතරක් පුරා පසුගිය සතියේ එක දිගට පැවැති නඩු විභාගයේ තීන්දුව ලබා දීමෙන් පසු අධිකරණ භූමියේදී මාධ්‍යවේදින් ඇමතූ ධනුෂ්ක ඉතා කෙටි ප්‍රකාශයක් සිදු කළේය. ඔහු කියා සිටියේ සත්‍යය කුමක් දැයි විනිසුරුවරියගේ තීන්දුවෙන් ඔප්පු වූ බවය.
දුෂ්කර කාලයේදී තමා සමඟ සිටි සිය පවුලේ සාමාජිකයන්ට, පෙම්වතිය සහ නීතිඥ මුරුගන් තංගරාජ් ඇතුළු සෙසු නීතිඥවරුන්ට මෙන්ම කළමනාකරුට ස්තූතිය පුද කරන බව ඔහු වැඩිදුරටත් කීවේය.
‘පසුගිය මාස 11 කාලය මට දුෂ්කර කාලයක් වුණා. දැන් මගේ ජීවිතය ආපහු සාමාන්‍ය අතට පත්වීම ගැන සතුටු වෙනවා. ලංකාවට ගිහින් ආපහු ක්‍රිකට් පටන් ගන්න කල් මට ඉවසිල්ලක් නෑ‘.
ඉන් කියැවෙන්නේ ජාතික කණ්ඩායම නියෝජනය කරමින් ඔස්ට්‍රේලියාවට පැමිණ කණ්ඩායමට පනවා තිබුණු නීතිරීති කඩමින් විනය විරෝධීව රාත්‍රී කාලයේ හෝටල් කාමරයෙන් පිටව ගොස් කාන්තාවක් සමඟ දුරාචාරයේ හැසිරීම ඔහුට වගේ වගක් නැති බවය.
ඔහුට වැදගත් වූයේ කෙසේ හෝ නඩුවෙන් නිදහස් වීමට පමණි. නැවත ශ්‍රී ලංකාවට පැමිණීමෙන් පසු අන්තර් සමාජ තරග බිමට පිවිසීමටත්, පසුව ජාතික කණ්ඩායමට නැවත සේන්දු වීමටත් තමාට පසුබිම නිර්මාණය වන බවක් එස්.එස්.සී. ක්‍රීඩා සමාජය නියෝජනය කළ මේ ක්‍රීඩකයා කල් තියාම දැන සිටියේද?
සිය නිවෙසේදී ධනුෂ්ක බලහත්කාරයෙන් ලිංගිකව හැසිරුණු බවට සහ ඔහු ප්‍රචණ්ඩ වූ බවට පැමිණිලිකාරිනිය අධිකරණයේදී ප්‍රකාශ කළ ද විනිසුරුවරිය සිය තීන්දුව ප්‍රකාශයට පත් කරමින් කියා සිටියේ ලිංගික එක්වීමකදී උපත් පාලන කොපුව ඉවත් කිරීමට කිසිදු ඉඩක් නැති බවය.
එකදිගට ලිංගිකව හැසිරීමේදී එසේ කරන්නේ කෙසේ දැයි විනිසුරුවරියගේ අවධානයට යොමු වී තිබිණි.
පැමිණිලිකාරිනිය ඉතා බුද්ධිමත් සහ සන්සුන් ලෙස ප්‍රතිචාර දක්වන සාක්ෂිකාරිනියක බව ප්‍රකාශ කළ විනිසුරුවරිය ඇය හිතාමතා බොරු සාක්ෂි දෙන ආකාරයේ කාන්තාවක් ලෙස නොදකින බවත් අවධාරණය කළාය.
එහෙත් ඇගේ ඇතැම් සාක්ෂි විත්තිකරුට අවාසි සහගත ලෙස හැඩ ගැස්වීමේ බලවත් ආශාවකින් ඇය පසු වූ බව තමාට පැහැදිලි වූයේ යැයි ද විනිසුරුවරිය වැඩිදුරටත් ප්‍රකාශ කළාය.
ඉන් කියැවෙන්නේ වරින් වර කාන්තාව විසින් ලබා දෙන ලද සාක්ෂි පරස්පර විරෝධී බවය.
උපත් පාලන කොපුව ඇඳ අසල වැටී තිබෙනු තමා දුටු බව කාන්තාව ප්‍රකාශ කළ ද ඔහු සිය ලිංගික හැසිරීම නතර කිරීමක් හෝ උපත් පාලන කොපුව බිමට වීසි කිරීමක් හෝ දුටු බවට කිසිදු සාක්ෂියක් ලබා නොදුන් බවත් විනිසුරුවරිය සාරා හගේට් ප්‍රකාශ කර තිබිණි.
එමෙන්ම පොලිසිය විසින් කාන්තාවගේ පැමිණිල්ල සම්බන්ධව ක්‍රියා කළ ආකාරය විනිසුරුවරියගේ දැඩි අවධානයට යොමු වී තිබූ අතර, ඇගේ පැමිණිල්ල සම්බන්ධව පොලිසියේ ක්‍රියා කලාපය ගැන තමා සෑහීමකට පත් නොවන බවත් කියමින් පොලිසියට ද දොස් පැවැරීය.
විනිසුරුවරිය සිය තීන්දුව ලබාදීමට සතියක්ම කල් ගත්තේ පසුගිය සතියේ අඛණ්ඩව දින හතරක් පුරා පැමිණිලි පාර්ශ්වයේ හා විත්තිකාර පාර්ශ්වයේ සාක්ෂි හා තර්ක විතර්ක ගැඹුරින් නිරීක්ෂණය කිරීමට වන්නට ඇත. දෙදෙනා පළමුවරට සිඩ්නි නුවර ඔපෙරා බාර් අවන්හලේදී මුණ ගැසී පසුව වෙනත් අවන්හලකින් රාත්‍රී ආහාරයට පීට්සා අනුභව කර ඇගේ නිවෙසට යෑමට බෝට්ටුවක් එනතුරු බලා සිටියදීත් දෙදෙනා අතර හාදු හුවමාරුව තදේටම සිදු වී තිබිණි.
තමාට තනිව නිවෙසට යා හැකි බව නොකියා ධනුෂ්ක තම නිවෙසට කැටුව යෑම ගැන ඔහුගේ නීතිඥ මුරුගන් තංගරාජ් විමසූ විට ඇයට කට උත්තර නැති වූවාට සැකයක් නැත. එසේ නොකළ යුතුව තිබූ බව අවසානයේ පැමිණිලිකාරිණිය පිළිගෙන තිබිණි.
ඊළඟට නිවෙසට ගොස් ධනුෂ්ක විසිත්ත කාමරයේ අසුන් ගැනීමට සලස්වා වයින් පානය කිරීමටත්, පසුව ඔහු ඉදිරියේ ගිටාරය වයමින් ගී ගැයීමටත් ඇය පෙලඹුණේ මන්දැයි යන්නත්, ඔහු කැටුව නිදන කාමරයට ගොස් ඉටිපන්දම් දැල්වූයේ මන්දැයි යන්නත් ධනුෂ්කගේ නීතිඥවරයා ප්‍රශ්න කළ විටදිත් ඇය නිරුත්තර වූවාට සැකයක් නැත.
නිවෙසට යනතුරුම සහ විසිත්ත කාමරයේදි පවා ධනුෂ්කගේ විවිධ ලිංගික අඩන්තෙට්ටම් සිදු වූ බව කීවත් එසේ තිබියදිත් නිදන කාමරයට කැටුව යෑම නීතිඥ මුරුගන් තංගරාජ් අධීකරණයට පෙන්වා දීමත් තීන්දුවට බලපාන්නට ඇත.
නිදන කාමරයට යෑමෙන් පසු උපත් පාලන කොපුව පලඳින ලෙස තමා ධනුෂ්කගෙන් ඉල්ලා සිටි බවත්, උපත්පාලන කොපු භාවිතයට තමා අකමැති බව ඔහු කියා සිටි බවට පැමිණිලිකාරිණිය අධිකරණයේ සාක්ෂි දෙමින් ප්‍රකාශ කර තිබූ අතර, තමාට ගැබ් ගැනීමට හෝ ලිංගික රෝගවලට ලක් වීමට අවශ්‍යම නැති බව ඇය ඔහුට පැවසූ මොහොතේ ගැබ් නොගන්නා බවට සහ ලිංගිකව එක්වීමෙන් සම්ප්‍රේෂණය වන රෝග කිසිවක් නොවැලඳෙන බවට සහතික වන බව ඔහු තමාට කීවේ යැයි ද එම කාන්තාව අධිකරණය හමුවේ වැඩිදුරටත් ප්‍රකාශ කර තිබිණි.
පසුව ධනුෂ්ක නිදි යහනින් නැඟී සිටින මොහොතේ ඔහු භාවිත කළ උපත් පාලන කොපුව යහන අසල බිම වැටී තිබෙනු තමා දුටු බවත්, ඔහු එය නොපැලඳ ලිංගිකව එක්වූ බව අවබෝධ වූ බවත් ඇය සඳහන් කර තිබිණි.
සැබැවින්ම සිඩ්නි නුවර ඩව්නින් දිස්ත්‍රික් අධිකරණයේ විනිසුරුවරිය සාරා හගේට් සැලකිල්ලට ගත්තේ ධනුෂ්ක ගුණතිලක අදාළ කාන්තාව සමඟ ලිංගික හැසිරීමේදී උපත් පාලන කොපුව ඉවත් කළේ දැයි යන්න ගැන පමණක් ම බැවින් ඔය කියන විනය විරෝධී හැසිරීම යටපත් වූ බවක් ද පෙනේ.
මන්ද ශ්‍රී ලංකාව නියෝජනය කරමින් ඔස්ට්‍රේලියාවට පැමිණ රාත්‍රී කාලයේ අනාචාරයේ හැසිරීම විනිසුරුවරියට පමණක් නොව සමස්ත ඔස්ට්‍රේලියාවටම අදාළ කාරණාවක් නොවන බැවිනි. තවත් අතකින් බලද්දී උපත් පාලන කොපුව ඉවත් කිරීමේ කාරණාව ශ්‍රී ලංකාවටත් අදාළ නොවේ.
අදාළ වන්නේ රට නියෝජනය කිරීමට ගිය ක්‍රීඩකයකු කණ්ඩායමට පනවා ඇති නීති රෙගුලාසි ද උල්ලංඝනය කරමින් දුරාචාරයේ යෙදීමය. නඩු වැටුණත් නැතත් එම සිදුවීම හෙළිදරව් වූයේ නම් ඔහුට එරෙහිව විනය ක්‍රියාමාර්ග ගැනීම මෙරට ක්‍රිකට් බලධාරින්ගේ සහ ක්‍රීඩා අමාත්‍යාංශයේ වගකීමකි.
අවසානයේ නඩුවක් ද වැටිණි.
ධනුෂ්ක නිදහස් වූයේ දඬුවම් විඳීමේ එළිපත්තටම පැමිණ සිටියදීය. දැන් එළැඹිය යුත්තේ ඔහුට එරෙහිව විනය කඩ කිරීමේ චෝදනාව යටතේ දඬුවම් කිරිමේ අවස්ථාවය.
සිදුවීම අධිකරණය දක්වා දුරදිග ගිය බැවින් අමුතුවෙන් විමර්ශන හෝ පරීක්ෂණ පැවැත්වීමේ හේතුවක් ද නැත.
ශ්‍රී ලංකා ක්‍රිකට් ආයතනය ධනුෂ්ක ගුණතිලකට සියලු ආකාරයේ ක්‍රිකට් තහනමක් පනවනු ලැබුවේ ඔහු අත්අඩංගුවට ගෙන පැය විසිහතරක් ගතවීමටත් පෙරය.
ඔහු සම්බන්ධව දැඩි පියවර ගන්නා බවට ක්‍රීඩා ඇමැති රොෂාන් රණසිංහ ද එවකට ප්‍රසිද්ධියේ ප්‍රකාශ කර තිබිණි. රටක් නියෝජනය කරමින් වෙනත් රටක ක්‍රීඩාවේ නියැළීමට යන ඕනෑම ක්‍රීඩකයකු එක් අතකින් තානාපතිවරයකු බඳුය.
ඔහු සිය රාජකාරිය අකුරටම ඉටු කළ යුතුව ඇති අතරම, මව්බිමේ ගෞරවය හා කීර්තිය ආරක්ෂා කිරීමේ වගකීමට ද බැඳී සිටී.
උපත් පාලන කොපුවේ කතාව ශ්‍රී ලංකාවට අදාළ නොවන්නේ එබැවිනි.
ක්‍රීඩකයා මව්බිමට කළු පැල්ලමක් එක් කරමින් ඉතා බරපතළ ආකාරයෙන් විනය කඩ කිරීමට එරෙහිව පියවර ගැනීම බලධාරීන්ගේ වගකීමකි. ඉදිරියේදී ජාතික කණ්ඩායම නියෝජනය කරමින් ජාත්‍යන්තරයට යෑමට අපේක්ෂා කරන මෙරට සියලු ක්‍රීඩකයන්ට ආදර්ශයක් විය යුතු ආකාරයෙන් එම දඬුවම ක්‍රියාත්මක විය යුතු බව හිටපු ක්‍රිකට් ක්‍රීඩකයන්ගේ අදහස වී තිබේ.
එහෙත් දැන් දැන් ධනුෂ්කගේ නිදහස් වීම අරබයා ශ්‍රී ලංකාවේ පැතිර යන්නේ වෙනත් කතාවකි.
කෙටියෙන් කියන්නේ නම් නඩුව ජයගැනීමේ සතුටත් සමඟ ධනුෂ්ක ගුණතිලක හෙට අනිද්දා ශ්‍රී ලංකාවට පැමිණීමට නියමිත බවය.
ඊට පෙර ඔහු සිය නඩු ගාස්තු ඉල්ලා අධිකරණයට අයැදුම්පතක් යොමු කිරීමට නියමිත බවත්, සිය නීතිඥවරුන්ගේ ගාස්තු ඉල්ලා ඔක්තෝබර් මස 4 වැනිදා ඔහු නැවත අධිකරණයට පැමිණීමට නියමිත බවත් වැඩිදුරටත් වාර්තා වේ.
ඔහු ශ්‍රී ලංකාවට පැමිණෙන්නේ ඒ අතරතුරදී වන්නට ඇත. ගුවන්තොටුපොළේදී ඔහුට මල්මාලා දමා පිළිගැනීමට කිසිවකු කටයුතු කරන්නේ නම් ඒ ගැන ද පුදුම වන්නට දෙයක් නැත.
(මුලාශ්‍රය – සිළුමිණ)
කාලෙකට ඉස්සර, ග්‍රාමීය ආර්ථිකය වැඩි දියුණු කිරීම සඳහා අඩු ආදායම්ලාභී පවුල්වලට ‘වටු කුරැළු පැටවුන්’ ලබාදීමේ වැඩසටහනක් දකුණේ ක්‍රියාත්මක කරලා තිබුණා. හැබැයි, හම්බන්තොට ට බෙදපු කිසිම වටු කුරුල්ලෙක් බිත්තර දාලා නෑ ලූ. ව්‍යාපෘතිය අසාර්ථකයි.
දැන් මේ ගැන දිස්ත්‍රික්කයේම රාජ්‍ය නිලධාරීන් (2015 විතර) ඉන්න රැස්වීමක දී කේක් කමින් කතා කරනවා. මේ රැස්වීමට පිට පලාතකින් ගිහින් හිටපු නිලධාරියෙක් අර වටු කරුළු කතාව කිව්ව පශු සම්පත් නිලධාරියාගෙන් අහනවා ‘මට වටු කුරුළු පැටව් දෙන්නෙක් දෙන්න බැරිද? ගෙදර හුරතලයට හදන්න’ කියලා.
හම්බන්තොටින් පැටව් දෙන්නා, දෙනියායට ගෙනල්ලා දවස් දෙකෙන් වටු කුරුල්ලෝ බිත්තර දාන්න පටන් ගන්නවා.
අර නිලධාරියා, මේ පණිවුඩය හම්බන්තොටට පශු නිලධාරීන්ට දීලා කියනවා ‘සමහරවිට බිත්තර දාන්නේ නැත්තේ දේශගුණය නිසා වෙන්න ඇති, තෙත් කලාපයට ගෙනල්ලා බලමු ද?’ කියලා.
පණිවුඩේ ලැබිලා වටු පැටව් එකතු කරන්න හොයනකොට, බිත්තර දාන්නේ නැති නිසා වැඩි හරියක් වටුවෝ මරාගෙන කාලා. හැබැයි ඉතිරි ටික හිනිදුම, දෙනියාය පැත්තට ගෙනිච්ච පැටව් දැන් හොඳට බිත්තර දානවා!
මේ කතාව මට කිව්වේ දකුණු පළාතේ හිටපු කාලේ, එහි සේවය කළ පශු වෛද්‍යවරයෙක්. අතීත කතාවක්.
මේ දවස්වල විදේශයන්ගෙන් ගෙනාපු කිරිඑළදෙන්නු ගැන ප්‍රශ්නයක් යනවා නේ. ජනාධිපතිවරු 3, අමාත්‍යවරු 8 (හැරිසන්, විජිතමුණි, රංජිත් මද්දුම බණ්ඩාර, මහින්ද යාපා, චමල් රාජපක්ෂ, මහින්දානන්ද, අමරවීර) ක්, අමාත්‍යාංශ ලේකම්වරු 15 (රේණුකා, ජයන්ත විජේරත්න, මායාදුන්න, රුවන්චන්ද්‍ර, රත්නායක, නීල් හපුහීන්න, සුමේධ පෙරේරා, රෝහණ පුෂ්පකුමාර, මහාචාර්ය උජිත් ජයසිංහ, ගුණදාස සමරසිංහ, ජනක ධර්මකීර්ති, නිශාන්ත වික්‍රමසිංහ, ඩී.පී. වික්‍රමාරච්චි) ක්, අතිරේක ලේකම්වරු 10 (පතිරත්න, නිහාල් වෙදසිංහ, ගීතා රාජපක්ෂ, බණ්ඩාරලතා, සී.එන්. ගමගේ, සමරනායක, නිහාල් ජයවීර, අමරසිංහ, පී.එස්. ප්‍රනාන්දු) ක්, ‘පැමිණිල්ලේ විත්තිකරුවන්’ බවට පත්වෙලා. අල්ලස් හෝ දූෂණ විමර්ශන කොමිසම සහ පොලිසියේ මුල්‍ය අපරාධ විමර්ශව ඒකකය (FCID) විසින් මේ ගැන විමර්ශන දෙකක් (හෝ එයට වැඩි ගණනක්) පවත්වනවා.
ලංකා රජය විසින් ගෙවනු ලැබූ අත්තිකාරම් මුදල ඔස්ට්‍රෙිලියාවේ තිබේ. පුද්ගලික අංශය විසින් අත්තිකාරම් මුදලක් ගෙවා, එහි සැපයුම (හරක්) රටට නොලුබුණු විට සිදු කරන්නේ බේරුම්කරණ ක්‍රියාවලියකින් එම ප්‍රශ්නය විසදාගැනීමයි. නමුත්, අද දක්වාම බේරුම්කරණ ක්‍රියාවලියක් සිදු නොකර රාජ්‍ය නිලධාරීන් 86 ක් ගැන විමර්ශණයක් සිදු වෙනවා. ලංකා රජය හා ඕස්ට්‍රෙිලියන් රජය අතර සිදුවූ මුදල් හුවමාරුව රාජ්‍ය තාන්ත්‍රික මැදිහත්වීමකින් නැවත රටට ලබාගත හැකියි. නිලධාරීන් එය සිදු නොකර, හිටපු දේශපාලනඥයින්, නිලධාරීන් මඩවනවා.
ඔය හයිබ්‍රිඩ් වැස්සියෝ පුද්ගලික අංශයේ ගොවිපලවල නියමිත ප්‍රමාණයට කිරි දෙනවා. අබේවෙල විතරක් නෙවෙයි, හොඳට ප්‍රමිතියක් සහිතව කන්න බොන්න දෙන තැන්වල කැප්පෙටිපොල, හපුතලේ හොඳට කිරි දෙනවා. ලාභ ලබනවා. රාජ්‍ය අංශයේ දී පාඩු ලබනවා.
ආණ්ඩුවට ව්‍යාපාර කරන්න බැරි ඇයි කියලා ගොඩාක් දෙනෙකුට තියෙන ප්‍රශ්නයට උත්තරය මෙතන තියෙනවා.
ආණ්ඩුවේ ආයතන කරන සත්ව නිෂ්පාදන ව්‍යාපාර වලින් මිරිදිය මත්ස්‍ය පැටවුන් අභිජනනය ඉතාමත් සාර්ථක වුණා. එයින්, මිනිස්සුන්ගේ ආදායම විතරක් නෙවෙයි, මිනිස්සුන්ගේ පෝෂණ අවශ්‍යතාවයත් පිරිමැහුණා. ආණ්ඩුවේ අලුත් ප්‍රසම්පාදන හා ටෙන්ඩර් ප්‍රවේශය නිසා පලාත් කිහිපයකම ‘මිරිදිය මත්ස්‍ය’ ව්‍යාපෘති පවත්වාගෙන යන්න බැරි තැනකට පත්වෙමින් තියෙනවා.
රජයට පාඩුවක් වෙන්නෙත් නැතුව, විගණකාධිපති ගේ නිර්ණායක අනුව කටයුතු කරමින්, කෝප් කමිටුවේ ආධුනික ප්‍රශ්න කිරීම්වලිනුත් බේරිලා, ප්‍රධාන ගණන් දීමේ නිලධාරියා වන රේඛීය අමාත්‍යාංශයේ ලේකම්ගේ නිර්ණායක අනුව, අමාත්‍යවරයාගේ ඡන්ද කොට්ඨාශයේ උදවියටත් සෙතක් වෙන විදිහට බැරිනම් මාධ්‍ය ප්‍රචාරයක් හෝ ලැබෙන ආකාරයට, පුද්ගලික අංශයේ තරගකාරී ආයතන සමඟ අසමාන තරඟ බිමක බිස්නස් කරන එක ලේසි වැඩක් නෙවෙයි. එහෙම වැඩ කරන්න පුළුවන් පිරිසකට දැන් රාජ්‍ය සේවයේ හොඳ ඉල්ලුමක් ඇති වෙලා තියෙනවා!
රාජ්‍ය සේවයේ ව්‍යාපාරවල වගකීම් දරන නිලධාරීන්ට තියෙන ලොකුම ප්‍රශ්නය තමයි, ‘ලොකුම හොරකම කරපු, වැටුප් දීමනා ලබන අය’ පැමිණිලිකරු වෙලා කිසිම ප්‍රතිලාභයක් නොලැබුණු රාජ්‍ය නිලධාරීන් රොත්තකටම නින්දා, අපහාස, උපහාස විදිමින් අතින් මුදල් වියදම් කරගෙන පොලිසි උසාවි ගානේ ලගින්නට වීම.
විශේෂයෙන් ‘රාජ්‍ය ව්‍යවසාය රැක ගැනීම සිය ප්‍රතිපත්තිය විදිහට සලකන’ ආණ්ඩුවකට අද ‘තාක්ෂණික ඇගයීමක් කර ගැනීමේ, ටෙන්ඩර් එකක් අනුමත කර ගන්න බැරි තත්වයක් මතුවෙලා තියෙන්නේ මේ නිසයි.
‘රාජ්‍යයට ව්‍යාපාර කරන්න බැරි බව’ පෙන්වන හොඳම උදාහරණය වටු කුරුළු කතාව නෙවෙයි. ‘රාජ්‍ය ව්‍යාපාරවලට මැදිහත්වන නිලධාරීන්ට අත්විය හැකි අවාසනාවන්ත සහ බිහිසුණු ඉරණම තමයි, ‘කිරි හරක්’ ඇණුවුම් කිරීම පිළිබඳ සිදුවන විමර්ශනය!
රජිත් කීර්ති තෙන්නකෝන්
“මහන්සිවී අලුතෙන් සිතුවහොත් වැරදි නිවැරදි කරන්නට හැකි වූවත් ඒවායේ කැළැල් මැකෙන්නට කාලයක් ගත වෙන බවත් නිවැරදි කළ සියල්ලේ වාසිය එකවර නොලැබෙන බවත් තේරුම් ගත යුතු අතර, ලැබෙන වාසිය තේරුම් ගත හැක්කේ අතීතය සමග සැසඳීමෙන් බවත් දත යුතුය.”
අපේ රටට වැඩිම විදේශ විනිමය ප්‍රමාණයක් උපයන්නේ ආර්ථික ක්ෂේත්‍ර 03 ක බහුතර ශ්‍රමිකාවියන් ය. පැරණිම ක්ෂේත්‍රය වන්නේ සාම්ප්‍රදායික තේ වැවිලිකරයයි. එහි අති බහුතරය, සියයට 90 ක් පමණ ශ්‍රමිකාවියන් ය. දෙවැන්න ඇඟළුම් ඇතුළු අපනයන නිෂ්පාදන ක්ෂේත්‍රය ය. ඇඟළුම් කර්මාන්තයේ සෘජු සේවක සංඛ්‍යාව ලක්ෂ 03.5 කි. ප්‍රතිපත්ති අධ්‍යයන ආයතනයට අනුව ඉන් සියයට 80 ක් කාන්තාවන් ය. තෙවැන්න මැද පෙරදිග සේවයේ නියුතු සංක්‍රමණිකයින් ය. විදේශ සේවා නියුක්ති කාර්යංශයට අනුව, සාමාන්‍යයෙන් දස ලක්ෂයකට ආසන්න පිරිසක් හැම අවුරුද්දේම මැද පෙරදිග සේවයට යති. එවගේම ඕනෑම මොහොතක දස ලක්ෂ 03.5 ක් පමණ ශ්‍රී ලාංකිකයින් මැද පෙරදිග සේවය කරති. ඉන් සියයට 65 ක් කාන්තාවන් ය.
ඇඟළුම් අපනයනයෙන් ලැබෙන ආදායම, අමුද්‍රව්‍ය සඳහාවන ආනයන වියදම නොසළකා එකතු කෙරෙන හෙයින් ඒ දත්ත නිවැරදි කිරීම් සමගින් 2019 න් පසු අපගේ වාර්ෂික විදේශ විනිමය ආදායමේ මුළු එකතුව දළ වශයෙන් ඩොලර් බිලියන 14 කි. ඉන් ඩොලර් බිලියන 08 ක් පමණ, සියයට 60 ට ආසන්න ප්‍රමාණයක් උපයා දෙන්නේ දුප්පත් ග්‍රාමීය සමාජයේ හා වැවිලිකරයේ කාන්තා ශ්‍රමය මගින් ය.
ඉතිරි ඩොලර් 06 ට දායක වන පිරිමි ශ්‍රමයෙන් සැළකිය යුතු ප්‍රතිශතයක්ද දුප්පත් ග්‍රාමීය සමාජයෙන් හවුල් වන්නවුන් ය. නාගරික දායකත්වය ඇත්තේ විශේෂයෙන් තොරතුරු තාක්ෂණය වැනි සේවාවන් වල ය. ඒවායේ විදේශ විනිමය ඉපැයීම දැනට ඩොලර් මිලියන 900 ක් පමණ ය.
ඒ සියල්ල එක ප්‍රශ්නයක් වෙනුවෙන් සාරාංශගත කළහොත් මේ රටේ නිදහසින් පසු තවමත් නොදියුණුව පවතින ග්‍රාමීය සමාජයේ හා වැවිලිකරයේ දුප්පතුන් විසින් වාර්ෂිකව උපයා දෙන ඩොලර් බිලියන 08 ක විදේශ විනිමය වෙනුවෙන් ඔවුන්ට ලබා දී ඇති ප්‍රතිලාභ මොනවාද? පවතින සැබෑව නම්, දසක ගණානවකින් කිසිදු දියුණුවක් ඔවුන්ට ලැබී නැත.
ගමේ දුප්පතුන් යැයි කියන්නේ මාසික වියදම සොයා ගැනීමට සිතිය නොහැකි තරමේ දහදුක් විඳින පවුල් වලටය. නමුත් ගමේ දුප්පත්කම පවුලේ වියදම සොයා ගැනීමට නොහැකිවීම පමණක්ම නොවේ. අත්‍යාවශ්‍ය සේවාවන් ලබා ගැනීමට නොහැකිවීමත් දුප්පත්කම උග්‍ර කරන්නකි. ඒ සම්බන්ධයෙන් කදිම නිදසුනක් සතියකට පමණ පෙර අසන්නට ලැබුණි. මතකය නිවැරදි නම් ඒ නැගෙනහිර පළාතට මායිම් වූ ගමක සිදුවීමකි. සැළකිය යුතු සිසු සිසුවියන් සංඛ්‍යාවක් ඉගෙන ගන්නා ප්‍රාථමික විද්‍යාලයකි. එහි ළමුන් සයවන වසර සිට යා යුත්තේ නගරයේ තිබෙන ලොකු පාසලකට ය. ගමට බස් සේවාවක් නොමැත. නගරයේ පාසලට කිලෝ මීටර 04 ට වැඩි දුරක් ඇත. එහෙයින් නගරයේ ඒ පාසලට බොහෝ විට ළමුන් ඇතුළු කෙරෙන්නේ ඒ ගමේ යතුරු පැදියක් හෝ ත්‍රීරෝද රථයක් ඇති පවුල් වලින් ය. එනිසා හැම වසරේම ගමේ බහුතරයක් ළමුන්ගේ අධ්‍යාපනය ඒ ගමේ පාසලේ 05 වසරින් කෙළවර වන්නේය.
මේ වසරේ ගමේ විදුහලේ විදුහල්පති ලෙස පත්වීමක් ලැබ පැමිණි විදුහල්පතිවරයා දෙමාපිය රැස්වීමකදී ඊට විසඳුමක් යෝජනා කර ඇත. ඔහුගේ යෝජනාව වී ඇත්තේ (1) පාසල සාමාන්‍ය පෙළ දක්වා පංති පැවැත්වෙන මහ විදුහලක් ලෙස උසස් කිරීමට බලධාරීන්ට බල කිරීමත් (2) ළමුන්ට නගරයේ පාසලට යාමටත් ගමේ සාමාන්‍ය මිනිසුන්ගේ දෛනික ගමනා ගමනයටත් ගමට බස් සේවාවක් ඉල්ලා සිටීමත් විය. ඒ සේවා පහසුකම් දෙකම, ඒ ගමේ වැසියන්ට තිබිය යුතු වූ සේවාවන්ය. ඒවා නොතිබීමෙන් ඔවුන් දෙවේල කෑවත් දුප්පතුන් විය.
මේ දුප්පත්කම ඒ පාසලට, ඒ ගමට සීමා වූවක් නොවේ. විවෘත වෙළඳපල ආර්ථිකයෙහි සමාජ අවශ්‍යතා සැපිරෙන්නේ වෙළඳපල ඉල්ලුම හා සැපුයම මත යැයි මතවාදයක් ඇත. එබැවින් ආණ්ඩු කටයුතු කරන්නේ රජයේ වගකීම් අවම කිරීමට ය. පොදු ප්‍රතිපලය නම්, ළමුන්ට අධ්‍යාපනය සම්පූර්ණ කර ගැනීමට හැකි පහසුකම් හරියාකාරව ගමට එන්නේ නැත. සාමාන්‍ය ලෙඩ රෝග සඳහා ප්‍රතිකාර ගත හැකි රජයේ රෝහලක් ආසන්නයේ නැත. දෛනික අවශ්‍යතා සඳහා ගමන් බිමන් යෑමට පොදු ප්‍රවාහන සේවා නැත. එනිසා ගමෙහි වෙළඳපල යනු ගමෙන් පිට වූවන් ගමට එවන මුදලින් පවතින සිල්ලර වෙළඳපලකි. එහි ලාභයද ආසන්න නගරයට කාන්දු වන්නකි. ගමේ වෙළඳපල ප්‍රසාරණයට එබැවින් අළුත් එකතුවීම් නැත. එනිසා ගමට ආයෝජන රැගෙන එනවුන්ද නැත. ගමේ දුප්පත්කම තීව්‍ර වන්නේ, ආණ්ඩු විසින් ස්ථිර විසඳුම් නොදෙන ඒ සියල්ල එකතුවන විටය.
ඊළගට ඇසිය යුතු ප්‍රශ්නය වන්නේ සමස්ථ විදේශ විනිමය ආදායමෙන් වැවිලිකරයේ හා ග්‍රාමීය සමාජයේ කාන්තාවන් විසින් වාර්ෂිකව උපයා දෙන සියයට 60 ක් වන ඩොලර් බිලියන 08 ක පමණ විදේශ විනිමය ඇතුළු මුළු ඩොලර් ප්‍රමාණය වැය කෙරෙන්නේ මොනවාටද යන්නයි. ගෙවුනු දසක කිහිපයේ හැම වසරකම ලංකාවට වැඩියෙන්ම ආනයනය කර ඇත්තේ පිරිපහදු කෙරුණු ඉන්ධන හා බොර තෙල් ය. ඒ වෙනුවෙන් දළ වශයෙන් ඩොලර් බිලියන 03.4 ක් පමණ වාර්ෂිකව වියදම් වන්නේය. එයින් ඩොලර් මිලියන 680 ක පමණ මුදලක් රටම බුක්ති විඳින විදුලිය උත්පාදනය සඳහා වැය වේ. ඉතිරි ඩොලර් බිලියන 02.7 ක පමණ ඉන්ධන හා බොර තෙල් වලින් හරියාකාර මගී ප්‍රවාහන සේවාවන්ද නැති ගමට ලැබෙන වාසිය කුමක්ද?
ආනයනය කෙරෙන බොහෝ ඉන්ධන වැය කෙරෙන්නේ නගරවල පෞද්ගලික වාහන ධාවනය වෙනුවෙන් ය. ඒ අතර වන සැළකිය යුතු සුඛෝපභෝගී වාහන ප්‍රතිශතයක් කි.මීටර 04 ක් නැතිනම් 05 ක් ධාවනයට 01 ලීටරයක් පුළුස්සන්නේ ය. වසර 05 ට පසු නැවත ආනයනය කරන වාහන අතර එවැනි වාහන කොපමණ තිබේදැයි වාර්තා තවම නැත. එහෙත් ජනවාරි සිට මැයි දක්වා මාස 05 ක කාලයේ වරායෙන් නිදහස් කළ වාහන සඳහා වැය කර ඇති ඩොලර් ප්‍රමාණය මිලියන 200 කි. මේ වසර අවසාන වනවිට ඩොලර් බිලියන 01 ක් වාහන සඳහා වැය වනු ඇතැයි ආණ්ඩුව ඇස්තමේන්තු කර ඇත. ඒ සමග මේ වසරට මෙතෙක් විදුලි උත්පාදනයට අමතරව ඉන්ධන සඳහා වැය කළ ඩොලර් බිලියන 02.7 කිසිසේත් ප්‍රමාණවත් නොවනු ඇත. නියත වශයෙන්ම ඒ වියදම ඩොලර් බිලියන 03.5 ක් වත් වනු ඇත. ඒ කිසිත් පලදායි වියදම් නොවේ.
ඉන්ධන හා බොර තෙල් වලට පසු ඉකුත් වසර වල ලංකාවේ ලොකුම ආනයනය වූයේ ඇඟළුම් නිෂ්පාදන සඳහා රබර් ආලේපිත ගෙතූ රෙදි වර්ගය. 2023 වසරේ ඒ වෙනුවෙන් ඩොලර් මිලියන 765 ක් වැයකර ඇත. අනෙක් ප්‍රධාන ආනයන ලෙස ගැණෙන්නේ අසුරන ලද fඖෂධ සහ සීනි වර්ග ය. ආහාර හා බීම වර්ග ලෙස ප්‍රධාන වශයෙන් ආනයනය කෙරෙන්නේ පලතුරු බීම, ධාන්‍ය වර්ග, කිරි නිෂ්පාදන, එළවළු, මත්ස්‍ය වර්ග, බේකරි හා රසකැවිලි සහ කුළු බඩු වර්ග ය. මහ බැංකුවට අනුව 2023 වසරේ මාස 11 ක් තුල ඒ වෙනුවෙන් වැය කළ මුදල ඩොලර් මිලියන 1,541 කි. මීට අවුරුදු 05 ක් වනතෙක් මේ වාර්ෂික ආනයන ලැයිස්තුවේ ඩොලර් බිලියන කිහිපයක වාහනද විය.
මේ ඇතැම්වා අත්‍යාවශ්‍ය ආනයන ය. ඇතැම්වා වැඩි ලාභ වෙනුවෙන් නාගරික සිල්ලර වෙළඳපලට ගෙන්වන භාණ්ඩ ය. සමස්ථයක් ලෙස ගතහොත් විදේශ විනිමය වැඩියෙන් වැය කෙරෙන්නේ නාගරික පරිභෝජනය සඳහා ය. දුප්පත් ග්‍රාමීය සමාජයෙන් බහුතර කාන්තා ශ්‍රමයක් යොදා ගෙන උපයන විදේශ විනිමය නොමැත්තේ නම්, නාගරික ජීවිතයේ නිවසේ සිට වාහනයටත් වාහනයේ සිට කාර්යාලයටත් වායු සමීකරණය කෙරුණු සුඛෝපභෝගි පැවැත්ම නඩත්තු නොවනු ඇත. එවගේම මේ විවෘත වෙළඳපල ආර්ථිකය හැර වෙන කිසිත් ගැන සිතන්නට නොදන්නා දේශපාලකයින්, ආර්ථික විශේෂඥයින්, වෘත්තිකයින් හා මෙය වෙනස් කිරීමට නුසූදානම් ජාවාරම්කාරයින් ගම දියුණු කළහොත් හසුවන හෙයියම්මාරුවක් ඇත. ගම දියුණු වන්නේ නම්, ඔවුන්ට විදේශ විනිමය උපයා ගැනීමට අවශ්‍ය දුප්පත් ශ්‍රමිකයින් සොයා ගත නොහැකි වනු ඇත. ඔවුන්ට අවශ්‍ය විදේශ විනිමය ඉපැයීමට ගමේ දුප්පත්කම පැවතිය යුතුය.
අපට, මේ රටේ පුරවැසියනට එවැනි යැපීමක් අවශ්‍ය නැත. එනිසා අප උපයන විදේශ විනිමය වඩා පලදායි ලෙස, සාධනීය අවශ්‍යතා වෙනුවෙන් වැය කෙරෙන ජාතික සංවර්ධන සැළසුමක් අපට අවශ්‍යව ඇත. රුපියල් වැය කිරීමේදීද එවැනිම අනාගතවාදී ජාතික දැක්මක් තිබිය යුතුය. වැවිලිකරයේ හා ගමේ ශ්‍රමය ඉදිරි දියුණුව වෙනුවෙන් පලදායි ලෙස යොදා ගැනීමේ ග්‍රාමීය සංවර්ධන සැළසුමක් තිබීමත් අත්‍යාවශ්‍ය වන්නකි. තව දුරටත් විදේශ ණය ගැනීම් අවශ්‍ය නොවන අධ්‍යාපන, සෞඛ්‍ය, පොදු මගී ප්‍රවාහන ප්‍රතිසංස්කරණ සහ ජාතික නිවාස යෝජනා ඇතුළත් ආර්ථික සැළසුමක් සමගින් අප හෙට ගැන සිතිය යුතුය. එය ජාවාරම්කාර පැලැන්තියකට ඉඩ නොතබන, ධනේශ්වර ප්‍රජාතන්ත්‍රවාදී වර්ධනයක් සඳහා නියාමනය කෙරෙන වෙළඳපලක් සහිත නව ගමනක් විය යුතුය. එවැන්නක් ගැන සිතන්නට මහන්සි විය යුතුය. අලුත් ලෝකයක් ගැන සිතන්නට බිය නොවිය යුතුය.
කුසල් පෙරේරා
ප්‍රවීන දේශපාලන විචාරක හා මාධ්‍යවේදී
ඊශ්රායලය සහ ඉරානය සටන් විරාමයට එකඟ වෙයි
අගමැතිනිය කැනඩාවට
එක්සත් ජාතීන්ගේ මානව හිමිකම් පිළිබඳ මහ කොමසාරිස්වරයා අග්රාමාත්යවරිය හමුවෙයි.
-
පුවත්2 days agoපොලිස් ලොක්කෝ දෙකකගේ වත්කම් විමර්ශනයට
-
පුවත්5 days agoදේශපාලනඥයන් ඇතුළු 26 කගේ අයථා වත්කම් රජයට පවරා ගැනීමට විමර්ශන
-
ගොසිප්3 days agoහර්ෂණගේ අස් වීමෙන් හිස් වූ මන්ත්රී අසුනට නම් තුනක්???
-
පුවත්4 days agoපහේ ශිෂ්යත්ව විභාගය ගැන නියෝජ්ය ඇමතිගෙන් ප්‍රකාශයක්
-
පුවත්1 week agoකොළඹ නගරාධිපති පුටුව මාලිමාවට (UPDATE)