මහල් නිවාස සංකීර්ණ හා මිශ්‍ර ව්‍යාපෘතිවල නිවාස හා ව්‍යාපාරික ස්ථාන අලෙවිය (සහාධිපත්‍ය වෙළෙඳාම) මේ වසරේ මුල් කාර්තුවේ දී පසුගිය වසරට සාපේක්ෂව සියයට 91කින් පහත වැටී ඇතැයි මහබැංකු වාර්තාවලින් අනාවරණය වේ.
මෙය පසුගිය වසරේ අවසන් කාර්තුවට සාපේක්ෂව සියයට 40ක පහත වැටීමක් බව ද එම වාර්තාවෙන් හෙළිව තිබේ.
එම වාර්තාවලට අනුව මේ වසරේ පළමු කාර්තුවේ සිදුවූ සහාධිපත්‍ය වෙළෙඳාමෙන් සියයට 50ක්ම රුපියල් මිලියන 25ත් 50ත් අතර වටිනාකමින් යුත් නිවාස හා ව්‍යාපාරික ස්ථාන වන අතර රුපියල් මිලියන 75ට වැඩි විනාකමින් යුත් නිවාස හා දේපළ මිල දී ගැනීම් සිදුවී තිබෙන්නේ සියයට 7ක් පමණි.
එය පසුගිය වසරේ අවසන් කාර්තුවේ දී සියයට 16ක්ව පැවැතී ඇත.
මහල් නිවාස හා ව්‍යාපාරික ස්ථාන මිල දී ගැනීම් පහත වැටීමට ප්‍රධාන ලෙසම බලපා ඇත්තේ ඒවායේ මිල ගණන් ඉහළ යාම බව ද කොළඹ දිස්ත්‍රික්කයේ මිල ගණන් පසුගිය වසරට සාපේක්ෂව සියයට 24කින් ද පසුගිය කාර්තුවට සාපේක්ෂව සියයට 10 කින් ද ඉහළ ගොස් තිබේ.
මිලදී ගන්නා දේපළවලින් සියයට පනහකට ආසන්න ප්‍රමාණයක් මෙරට ක්ෂණික පදිංචිය සඳහා වන අතර සියයට 28 ක් පමණ අනාගත පදිංචිය සඳහාය.
මහබැංකු වාර්තාවට අනුව ආයෝජන ලෙස මෙම දේපළ මිල දී ගැනීම් පසුගිය වසරට සාපේක්ෂව සියයට අටකින් පමණ පහත වැටී ඇත.
මේ අතර, විශාල වශයෙන් ලාංකිකයන් රටහැර යාම බැංකු ණය පොලී අධිකිවීම යන කාරණා මත මේ තත්ත්වය තවත් වැඩිවදේනු ඇතැයි ක්ෂ‌ේත්‍ර ආරංචි මාර්ගවලින් වාර්තා වේ.
එසේම, දේපල වෙළඳාම් සමාගම් බංකොළ‌ොත්වීමේ තත්ත්වයක් ඇතිවිය හැකි බවට ද ඔවුන් අනතුරු අඟවයි.
ඒ් බොහෝ දේපල වෙළඳාම් සමාගම් ඔවුන්ට දැරිය නොහැකි තරමේ බැංකු ණය ලබා ගනිමින් අදාළ ව්‍යාපාර පවත්වාගෙන යාම නිසාය.
ලංකාවේ පසුගිය කාලයේ දේපල සමාගම් අතර ඉදිරියෙන්ම සිටි සමාගම්ක් වූ බ්ලූමවුන්ටන් සමාගම මෙසේ අධික ණය ලබා ගැනීම හේතුවෙන් බංකොළොත් භාවයට එක් ආයතනයකට උදාහරණ සපයන බවද ඔවුන් කියා සිටී.
